سادق عەزیز: ئەوەی شەرعی و یاساییە لە كۆمەڵگەی بۆرجوازیدا هیچیتر نییە جگە لە ئامرازێكی دابینكردن و تێپەڕاندن و سڕینەوەی خودی چەمكی ” شەرعییەت”: تاڵانی هێزی كار و ئیغتیسابی سەروەت و سامان … دیمانەی بۆپێشەوە لەگەڵ بەڕێز (سادق عەزیز) سەرنووسەری رۆژنامەی“ ڕێچار“ سەبارەت بە (عێراق و كوردستان دوای هەڵبژاردنەكان)…
سادق عەزیز: ئەوەی شەرعی و یاساییە لە كۆمەڵگەی بۆرجوازیدا هیچیتر نییە جگە لە ئامرازێكی دابینكردن و تێپەڕاندن و سڕینەوەی خودی چەمكی ” شەرعییەت”: تاڵانی هێزی كار و ئیغتیسابی سەروەت و سامان …
دیمانەی بۆپێشەوە لەگەڵ بەڕێز (سادق عەزیز) سەرنووسەری رۆژنامەی“ ڕێچار“ سەبارەت بە (عێراق و كوردستان دوای هەڵبژاردنەكان)…
بۆپێشەوە: بەشداری خەڵك لە هەڵبژاردنەكاندا بەرێژەی لە ٢٠% واتە ٨٠% لەسەدی خەڵكی عێراق، هەڵبژاردنیان رەتكردۆتەوە، ئایا هەڵبژاردنێكی ئاوا هیچ شەرعیەتیكی قانوونی هەیە؟ ئەو ئەندام پەرلەمانانە نوێنەری لەسەدا بیستی خەڵكن، لەبەرامبەر بە رەتكردنەوەی هەشتا لەسەدا، ئەمە چ خوێندنەوەیەكی بۆ دەكرێت؟
سادق عەزیز: پێش ئەوەی بچینە ناو باسی شەرعیەتی ئەم هەڵبژاردنە پەرلەمانییەی كە لەم دواییانەدا ئەنجامدرا، سەرەتا پێویستە بە كورتی ئاماژەیەك بدەین بە بیرۆكەی شەرعییەت و یاساییبون لە ڕژێمە كۆمەڵایەتییە چینایەتییەكان. لەوە دڵنیاین كە چەمكی مەقولات و ئایدیۆلۆجیا و ڕۆشنفكریی و سوننەت و یاساكان ڕەنگدانەوەی ناوەرۆكی چینایەتی كۆمەڵگە چینایەتییەكانن، كە ئەویش سود ئەبینێت لەم یاسا ڕۆشنفكرییانە و پەیوەندییەكی بابەتییانەی پتەو هەیە لە نێوانیاندا، و ئەم كارلێك و ڕەنگدانەوانە بەشێوەیەكی قوڵ و بنەرەتی ڕۆڵی كاریگەری هەیە لە كۆمەڵگەی سەرمایەداری هاوچەرخدا كە لەسەر هەڵلوشین و تاڵانی زێدەبایی ڕاوەستاوە. كەواتە ئەوەی شەرعی و یاساییە لە كۆمەڵگەی بۆرجوازیدا هیچیتر نییە جگە لە ئامرازێكی دابینكردن و تێپەڕاندن و سڕینەوەی خودی چەمكی ” شەرعییەت”: تاڵانی هێزی كار و ئیغتیسابی سەروەت و سامان. سیستەمی پەرلەمانی وەك یەكێك لە شكڵ و شێوەكانی سیستەمی بورجوازی، كە هەوڵئەدات بە دابینكردنی پەیوەندی كار و سەرمایە و بەرهەمهێنانەوەی وەبەرهێنانی سەرمایە، ڕەونەق و درەوشانەوەی خۆی چەندەها دەیەیە لەدەستداوە، و دیموكراسی بورژوازیی ئیتر هیچ شتێك ناگەیەنێت جگە لە دیكتاتۆرییەتی كەمینەیەك و هەژمونداریی پارتە بۆرژوازییەكان و كارتیلاتە دارایی و بانكی و پیشەسازییەكان و خولی وەبەرهێنانەوەی سەرمایە، سەرەڕای هاتوهاواریان لەبارەی بابەتی كەمینە و زۆرینە. كەواتە ئیتر چ ” شەرعییەتێك “خۆی حەشارداوە لە پشت داماڵینی ئیرادەی جەماوەرەوە لە بەڕێوەبردنی كۆمەڵگە و گەشەسەندنی و خنكاندنی گشت داهێنان و دەستپێشخەرییە جەماوەرییە شۆڕشگێڕانەكانیدا!. ئیحتیكاری پرۆسەی هەڵبژاردن لەلایەن پیاوانی خاوەنكار و بانكەكان و جەنەراڵەكان لە كۆنترین دەوڵەتە خاوەن ئەزمونەكان لە مومارەسەی پەرلەمانی تا ئەگاتە دەوڵەتە نەخشەبۆكێشراوە نوێیەكان” خۆرهەڵاتی ناوەڕاست و ئەفریقاو ئەوانی تر” و لەسایەی كەشوهەوای سیستەمی جیهانی نیولیبرالیزمدا، درۆی دیموكراتی كردووە بە شتێكی واقعی و بابەتی بۆگەن. ئەتوانم بڵێم كە نەك هەر لەسەر ئاستی ناوخۆیی بەتەنها، بەڵكو لە ئاستی جیهانیشدا پێشوازیكردن لە پرۆسەی هەڵبژاردنە پەرلەمانییەكان تەنانەت لە دەوڵەتە “پێشكەوتووەكانیشدا” تووشی پاشەكشەیەكی گەورەبووە، و ئەوەش ئاشكرایە كە دیاردەی گوێنەدان و پشتگوێخستن و خەمساردی لەبەردەم پرۆسەی هەڵبژاردنەكان و بەشدارینەكردن لەلایەن هاووڵاتیانی ئەوروپییەوە چۆن بووەتە دیاردەیەكی سیاسی ڕوون كە ئاوێنەی نەمانی متمانەیە بە سیستەمی پەرلەمانی.
سەرەڕای ئەوەی كە تەمەن و مێژوو پرۆسە سیاسییەكانی پێشوی سیستەمی پەرلەمانی لە عێراق كۆن نین، بەڵام ئەم چەند خولەی پێشویی، جەماوەری كرێكار و گەنجانی عێراقی بە زوویی فێركرد كە ئەم شكڵەی سیستەمی پەرلەمانی و پرۆسە سیاسییەكانی یەكێكە لە خراپترین و قێزەونترین و گاڵتەجاڕترین نمونەكانی دیموكراسی بۆرژوازیی بە شێوەیەك كە تەحەمول ناكرێت. لە ساڵی٢٠٠٣ەوە خول لە دوای خول ژمارەی بەشدارینەكردن بەرەو سەرەوە چووە، و دۆزی بایكۆتكردنی سیستەمی پەرلەمانی كە وێنای ڕژێمی تایەفەگەریی و پشك پشكێنەی هێزەبۆرژوازییەكان بوو، بەشدارینەكردنی هەڵبژاردن بووە هۆشیارییەكی كۆمەڵایەتی فراوان و پایەدار. هەر بەم پێودانگەش غەلوخەوشی شەرعییەتدان ئەگەرچی “بۆرژوازییانەشە” لەسەر ئەم پرۆسەیە لە دوتوێی كەمینە و زۆرینە لە ئاستێكی فراواندا دەركەوت كە هیچ شتێكی ئەوتۆ نییە جگە لە دیموكراسییەتێكی درۆزنانە و ئابڕوبەرانە. گەشەی هۆشیاری جەماوەری شۆڕشگێڕ لە ئەزمونەكانی ساڵانی پێشو، و دەستدانە خەباتی ناڕەزایەتی جەماوەریی فراوان بە تایبەتی لە ساڵی ٢٠١٩ بە دواوە بەڕادەیەك متمانە كردنی بە سیستەمی پەرلەمانی بردە ئاستی نەمان.
بۆپێشەوە: پڕۆسەی پێكهێنانی حكومەت دوای هەڵبژاردنەكان چۆن دەبینن؟
سادق عەزیز: لە بناغەدا هەڵبژاردنی پێشوەختە، لە ئەنجام (و لەژێر كاریگەریی) فراوانبوونەوەی پانتایی ناڕەزایەتییە جەماوەرییەكان ئەنجامدرا، كە زیاتر و زیاتر قەیرانی سیاسی و ئابوریی ڕژێمی تایەفەگەریی و قەومی لە عێراق قوڵكردەوە بەشێوەیەكی گشتی، و بابەتی دەسەڵاتدارییەتیش “حكومەت” بە شێوەیەكی تایبەتیتر. نەك هەر ئەمە بەڵكو” قەیرانی سازدانەوەی حكومەتیش” كاتێكی زۆری ویست تا هەلومەرجەكە هێور بووەوە، ئەویش بە دانانی كازمی دوای شكستخواردن و ڕوخانی حكومەتەكەی عادل عبدالمهدی. بناغەی كۆمەڵایەتی و سیاسی ئەو قەیرانەی كە ڕژێمی سیاسی و كۆمەڵایەتی عێراق دەرگیری بووە، ڕۆژ لە دوای ڕۆژ قوڵتر ئەبێتەوە، تا ئەو ڕادەیەی كە وا پێشبینی ئەكرێت پێكهێنانی حكومەتی نوێ بە كاتێكی كەم، بە لانیكەمەوە تا بتوانێت كە كۆتایی بەو قەیرانە بهێنێت كە ئێستا دەرگیری بووە. هەڵبژاردنەكانی ئۆكتۆبەری ٢٠٢١ بە هیچ جۆرێك نەیتوانی یارمەتیدەربێت بە سوككردنەوەی قەیرانی سیاسی ئێستا، بەڵكو قوڵی و توندی ئەو قەیرانەی كە بۆرژوازی و پارتەكانی و هەموو هێزە سیاسییەكانی بەدەستییەوە ئەناڵێنێت و قەیرانەكەی زۆر زیاتر قوڵتر كردووەتەوە. هەموو هاوكێشە و هەوپەیمانییەكانی پێشوو ئاڵوگۆڕیان بەسەرهاتووە، لەبەرئەوە دیاردەی بوون و قوڵبوونەوەی قەیرانەكان سەرەكین و هەر ئەویش كۆنترۆڵی سروشتی حكومەتی داهاتوو ئەكات، ئەگەر شانسی بوونی هەبێت.
بۆپێشەوە: حكومەتی داهاتووی عێراق، وەكو حكومەتەكانی پێش خۆی لە ژێركاریگەری دەستێوەردانی وڵاتانی ناوچەكەدا پێك دێت، یان دەتوانێت لانی كەمی سەربەخۆیی خۆی بپارێزێت؟
سادق عەزیز: ئەوەی كە تەحەكوم بە پەیوەندی نێوان حكومەتی هەرێمی كوردستان و ناوەند ئەكات لە سیستەمی فیدرالی ئێستادا، بە هیچ جۆرێك پەیوەندی نییە بە بابەتی جیاكاری قەومی و مافی نەتەوایەتییەوە یا بە فیدرالییەتەوە، كەوایە پاراستنی دەوڵەتی فیدرالی یا بەرگری لە مافی قەومی و دەسكەوتە قەومییەكان لەباری واقعی و بابەتییەوە بەهیچ جۆرێك گرفتی پارتە بۆرژوازییە كوردی و عەرەبییەكان نییە، و ئەم بیروڕاو بۆچونانەش تەنها لەپێناو بەدەستهێنانی بەرژەوەندییە چینایەتییەكانیاندا بڵاوئەكەنەوە و پەرەی پێئەدەن، نەك هیچ شتێكی تر. لە راستیدا ئەوەی تەحەكوم بە پەیوەندی هەرێم و ناوەند ئەكات لە ناوەرۆكدا بەرژەوەندی سیاسی و ئابوری هەردوو جەمسەرەكەی بۆرژوازین لە عێراقدا. دابەشبوون و ڕكابەرییان لەسەر دەستبەسەراگرتن و پاوانكردنی سەروەت و سامان و نەوت و دەستكەوتەكانی دەروازە سنورییەكان و خێروبێری كۆمەڵگەیە. هەریەكە لەو دوو لایەنە دوای ستراتیج و سیاسەت و ئابوری تایبەت بە خۆیان كەوتوون، ئەو ئیستراتیجییەتەی كە هەڵگری دورنمای هەرێمایەتی-جیهانی و ناوخۆیی خۆی هەیە هەریەكە بەپێی خۆیان. لە سێبەری ئەو قەیرانە سیاسییەی كە ئێستا هەیە، دۆزی ڕێككەوتن و پێكهاتنی سیاسی كارێكی قورسە، نەك هەر لە نێوان ناوەند و هەرێم، بەڵكو لەناو بەرەی ماڵی كوردی و ڕیزەكانی كوردایەتیشدا ماڵێك و ڕیزێكی یەكگرتوو نەماوەتەوە، ئیتر لەو كاتەشدا باسی ماڵی شیعە و یەكێتی نیشتیمانی عێراق هەر ناكەین. قوڵی قەیرانی ئێستا بەشێوەیەكی ساناو سادە وێنا ئەكات لە تێكەڵوپێكەڵی و لێكترازان و جیابوونەوەی گشت ڕەنگ و لایەنە جۆراوجۆرەكان. لەبەر ئەمەشە كە جێگاوشوێنی حكومەتی هەرێم لە حكومەتی ئایندەی عێراقدا لە بنەچەدا بەستراوەتەوە بە ڕازیبوونی ناوەند و ئاستی ڕێككەوتنە ئابوری و دارایی وگومرگییەكان لە ڕێی دۆزینەوەی هاوپەیمانێتییەكی نوێ بەپێی بەرژەوەندی هێزە بۆرژوازییە كوردییە قەیرانگرتووەكان و ئیتر هیچ جێگاو ڕێگایەك نییە بۆ ئەندێشە و مەئساتی ملیۆنەها هاوڵاتی كورد لەم سەفەقاتانەدا.
بۆپێشەوە: چەندین خۆپێشاندان بەدژی ئاكامی هەڵبژاردنەكان لە بەشێك لە شارەكانی عێراق دەستی پێكرد، ئەم خۆپێشاندانانە تا چەندە كاریگەری لەسەر ئاكامی هەڵبژاردنەكان دەبێت؟
سادق عەزیز: لە سایەی ئەو گەشەسەندنە سیاسی و ئابورییە جیهانیانەی سەرمایە و سیستەمی سەرمایەداری هیچ جێگاوڕێگایەك نەماوەتەوە بۆ سیادەی نیشتیمانی و ناسیونالیستی و سەربەخۆیی نیشتیمانی، ئەم ڕوانگەیە جارێكیتر خراپترە لەوانەیتر كە پیربوون. پارێزەرانی سیادەی نیشتیمانی خۆیان سیادەی دەوڵەتەكانی تر ئەشكێنن هەرچۆنێك پێیانخۆشبێت و لەبەرژەوەندییان بێت، وەك چۆن زۆربەی دەوڵەتە پارێزەرەكانی تیرۆر و تۆقاندن جەنگ بەرپائەكەن و تەدەخول ئەكەن لەژێر دروشمی بەرهەڵستكاری تیرۆر. ئەو گرێوگۆڵە جیهانیانەی گەشەسەندنی سەرمایە دۆزی تەحقیقكردنی بەرژەوەندییەكانی سەرمایەی جیهانی بەستووەتەوە بە كەناڵی ڕێككەوتنی بەرژەوەندی هێزە ناوچەیی و ناوخۆییەكانەوە لەگەڵ بەرژەوەندییەكانی زلهێزە جیهانییەكان. هیچ شتێك نەماوەتەوە بە كلكایەتیكردن و بەكرێگیراو بناسرێنرێن بەو ڕێژەیەی كە هاوتابێت لەگەڵ بەرژەوەندیی و بەدەستهێنانی بەرژەوەندییەكانی ئیمپریالیزمی جیهانی و سەرمایەی جیهانی. ئەم حكومەتە نوێیەش، خراپتر لە حكومەتەكانی پێشوو، شانۆی سیاسی بەكراوەیی ماوەتەوە بۆ هێز و جەمسەرە جیهانییەكان وەك كەناڵێك بۆ تێپەڕاندنی بەرژەوەندییەكانیان و هاوتایی دروستكردنێك لەگەڵ هێزە ناوخۆییەكان. بۆیە هەر ئیدیعایەك بە پارێزگاریكردنی سیادەی عێراق و دورخستنەوەی لە ململانێی دەرەكی دەوڵەتان لە گۆڕەپانی سیاسی لە عێراق هیچ نییە جگە لە درۆیەكی شاخداری ئاشكرا و وەهمێكی گەورە. لەبەر ئەوە بوونی”دەوڵەتانی ناوچەكە و دەوڵەت و جەمسەرە جیهانییەكان” بوووە بە كارێكی واقعی و بەشێك لە سیستەمی جیهانی.
بۆپێشەوە: مقتەدا سەدر دەڵێت “دەبێت ملیشیاکان هەڵبوەشێنەوە، تا چەندە لاتان وایە میلیشیا چەکدارەکان هەڵدەوەشێنەوە، بە میلیشیاکانی سەدریشەوە؟
سادق عەزیز: بێگومانین لەوە كە ئەنجامەكانی هەڵبژاردن ئەوەی دەرخستووە كە ئاڵوگۆڕێك لە نەخشەی سیاسی هێزەكانی سەر گۆڕەپانی سیاسی عێراق ڕویداوە و بەردەوامیشە لە ئاڵوگۆڕدا. ژمارەی دەنگەكانی هەندێك لە هێزەكان كەمی كردووە لە بەرامبەر بەدەستهێنانی ئەوانی تر لە بەدەستهێنانی كورسی پەرلەمانی تازە. ئەم ئەنجامانەش جێگای ڕەزامەندی هەندێ لە “هێزە دۆڕاوە” شیعی و میلیشیاییەكان نەبوو، بۆیە بەپەلە باڵی “ڕەوتی لایەنگرانی ئێران” لە هێزە شیعییەكان یەكەمجار تانەیان دا لە ئەنجامەكانی هەڵبژاردن و دواتریش شەقامیان كرد بە ئامرازی دەستیان بۆ ناڕەزایەتی دەربڕین. بابەتی سەرەكیش لەم دیاردەیەدا، كە بۆچی ئەم هێزە كۆنەپەرست و میلیشیاییانە دەستییان برد بۆ ئەم ئامرازە و دەستیان نەبرد بۆ توندوتیژیی و چەك؟ ئەوەبوو كە ئەم هێزانە ناتوانن بە شێوەی سەربازیی و میلیشیایی ڕوبەڕوی ئەنجامەكانی هەڵبژاردن ببنەوە لە سایەی هەلومەرجی ئێستادا، بۆیە پەنایان برد بۆ ئامرازی خەباتكارانەی جەماوەریی (ناڕەزایەتی و خۆپیشاندان) و تووشی وەهم هاتن كە وەك ئامرازێكی جەماوەری خەباتكارانەی كاریگەر بەكاریبهێنن، و ویستیان ئەزمون و كاریگەریگەرییەكانی بۆ ململانییەكانیان بەكاربێنن و پێیان وابوو ئەتوانن سود وەرگرن لە ئەو هێزەی كە (حكومەتەكەی عبدالمهدی تێك ڕوخاند) و لە لایەكی تریشەوە ئەم ئامرازە خەباتكارانەیە “پیس و بەلارێدا بەرن” و فرسەتێكیش بدەنە دەسەڵاتی فەرمانڕەوا تا هێز بەكار بهێنێت بۆ سەركوت و داپڵۆسینی خۆپیشاندانەكان و بەلاڕێدابردنی خەسڵەتە شۆڕشگێڕانەكەی.
ئەم ناڕەزایەتییە كۆنەپەرستانەی میلیشیاكان هیچ نییە جگە لە ئامرازێك و فشارێك بۆ گەشتن بە دەسكەوتی باشتر لە حكومەتی داهاتودا یا لە هاوكێشەی هێزە تازەكانی سەر گۆڕەپانی سیاسی عێراق.
بۆپێشەوە: چۆن دەڕواننە لێدوانی مقتەدا سەدر سەبارەت بەوەی دەڵێت “حکومەتێکی نیشتیمانی پێکدەهێنین کە دوور بێت لە پشك پشکێنەی قەومی و تایفی؟
سادق عەزیز: ئەوە ڕون و ئاشكرایە كە ڕەوتی سەدریی هێزێكی میلیشیایی گەورەی هەیە و خاوەنی سەربازگە و شمەكی سەربازی و گەنجینەی عەتاد و تەقینەی زۆرە و ناتونرێت لەبەرچاو نەگیرێت و فەرامۆش بكرێت، بەنمونەش (ڕوداوی تەقینەوەكەی كە لە یەكێك لە حسەینییەكان لە مەدینە سەورە چەند ساڵێك پێش ئێستا ڕویدا) . لە ڕاستیدا ناتوانین دیاردەی ئامادەیی میلیشیایی هێزە سیاسییەكان لە عێراق دابڕین لە دەركەوتن و بوونی كۆمەڵایەتی و سیاسی هێزە بۆرژوازییە عێراقییەكان لە بڕگەی سیاسی عێراق، هێزە قەومی و دینییەكان باڵ و پایەی سەربازی بەهێزیان هەیە. مێژوی ڕەوتی سەدری لەو كاتەوەی كە دەركەوتن بە بینینی ڕۆڵی “دژایەتیكردنی ئەمریكا و داگیركەر” و بەشێوەیەك دەركەوتن بەو ئیعتیبارەی هیزی سەرەكی ئۆپۆزیسیۆنن لە پرۆسەی سیاسیدا و هەستی دژایەتیكردنی ئێران و ئەمریكایان لە ناوچەكەدا قۆستەوە، و بێهودە هەوڵیاندا بە سواربونی شەپۆلی جوڵانەوەی جەماوەری و ڕاپەڕینی ئۆكتۆبەر و كاتێكیش سەركەوتوو نەبوو لەم هەنگاوەیاندا لۆمپن و بەڵتەجییەكانی هێرشی دڕندانەیان كردە سەر ڕاپەڕینی ئۆكتۆبەر و چالاكوانەكانی جوڵانەوەكە و دەستیانكرد بە ڕفاندن و لێدان لە گۆڕەپانەكان و بەسەر ماڵەكانیاندا دان. ئەم ڕەوتە بە هیچ جۆرێك نەك هەوڵی چەكداماڵین و كۆتایهێنان بە بوونی حشدی شەعبی نەداوە، بەڵكو مانەوەی بەتەواوی پابەند بووە بە مانەوەی سەرایای سەلام و پیاوەكانی (میلیشیابوونی كۆمەڵگە).
تایبەتمەندێتی سەرەكی و بناغەیی ڕەوتی سەدری بریتییە لە تایەفەگەرێتی شیعی چەكدار. یەكێكیش لە ڕەوشەكانی ئەم قەیرانە كە كۆمەڵگەی عێراق بەدەستییەوە گیرۆدەیە، ئەگەڕێتەوە بۆ بوونی باڵادەستی و زاڵیی دەوڵەتانی دراوسێ و ناوچەكە و گۆڕینی عێراق بە یەكێك لە گرنگترین میحوەرەكانی كێشمەكێشی نێوان هێزە سەرمایەدارییە جیهانی و ناوچەییەكان. هەستی دوژمنایەتی لە گەڵ خۆرئاوا و ئەمریكا و دەوڵەتانی دەوروبەر، بە دیاریكراوییش (ئێران)، جیانابێتەوە لەو بڕوایە كە ڕێككەوتنی هێزە ناوخۆییەكان لەگەڵ ئەم هێزە ناوچەیی و جیهانیانەدا و كە ئەویش بۆخۆی یەكێكە لەو هۆكارانەی كە بووەتە ڕێگر لەبەردەم پرۆسەی دامركانەوە ئیستیقرار و ئاسایش و هێمنی ئەم وڵاتە، و لەبەرئەوە دروشمی “وڵاتم ئەوێت” سەرەڕای بەرتەسكی ئەو ئاسۆیەی كە ئەم دروشمەی لێ هەڵهێنجراوە، خۆبەخۆ لە بناغەوە هەڵقوڵاوە لە هەستێكی سادەی ڕەتكردنەوەی ئەم هێزانە. لەبەر ئەوە ڕەوتی سەدریی هەوڵی داوە بۆ قۆستنەوەی هەست و سۆزیی جەماوەری عێراق كە بریتییە لە ڕەتكردنەوەی هێزی دەرەكی و هەوڵدان بۆ دۆزینەوە و پەیداكردنی وڵاتێكی بە ئاسایش، كە ئاشتی و خۆشەویستی باڵ بكێشیت بەسەریدا، رەوتی سەدریش هەوڵیدا ئەم هەست و شعورەی جەماوەری عێراق بقۆزێتەوە و دەستیكرد بە پڕوپاگەندەی درۆزنانەی دروستكردنی حكومەتی نیشتیمانی سەربەخۆ و دور لە تایەفەگەرێتی و قەومپەرستی!! و وەهمی دامەزراندنی حكومەتی نیشتیمانی ناتایەفەگەریی ناقەومی كە كۆمەڵگەی عێراق ڕزگار دەكات لە ئەندێشە و ئەو ئازارانەی كە بەدەستییەوە ئەناڵێنێت، و لە دەست قەیرانی ئابوری خنكێنەر ڕزگاری ئەكات و بە چەندەها درۆ و دەلەسەی تری وەك نەهێشتنی بێكاریی و هەژاری و نەبوونی و دابینكردنی پێداویستییە سەرەتاییەكانی ژیانێكی شایستە. هەموو ئەو وەهمانەبوون كە خەباتی جەماوەر لەچەند ساڵی ڕابردودا تێكی شكاندبوون و بەدیاریكراویش ڕاپەڕینی ئۆكتۆبەری نەكوژاوە. ڕاپەڕینی ئۆكتۆبەر لە عێراقدا نموونەیەكی نوێی ژیان و ڕزگاربوونی دۆزییەوە، و بەردەوامیشە.