دۆسیەی ژمارە تاهیر حاجی حەسەن: . کۆی مێژووی ئەحزابی بەرەی کوردایەتی، مێژووی تێک شکاندنی تواناکانی کۆمەڵگە بووە، لەپێناو هەژمونداری بەرژەوەندیەکانی سەرۆک حزب و حزبەکانیان، دیمانەی بۆپێشەوە لەگەڵ هاوڕی تاهیر حاجی حەسەن سەبارەت بە” ڕیکەوتنی رژێمی سوریا و هەسەدە و ئاییندەی ئەزموونی رۆژئاوا”
بۆپێشەوە: لەگەڵ دەسپێکی هیرشی سوپای سوریا، بۆسەر ناوچەکوردنشینەکان و دەسەڵاتی خۆسەری، بەهاوکاری رژێمی تورکیا و بە هەڵکردنی گڵۆپی سەوزی ئەمریکا، خەڵکی کوردستان بەخیرایی کاردانەوەیان لەخۆیان نیشانداو هاتنە سەرشەقامەکان… وە هاۆسۆزی جیهانی بەدوای خۆیدا هێنا، هۆکاری ئەو کاردانەوە خێرایەو ئەو پشتیوانییە فراوانە جەماوەرییە چی بوو؟
تاهیر حاجی حەسەن: لەڕاستیدا بەدەنگەوە هاتنی ئەو جەماوەرە بێ شومارە هەروا لە پڕێکدا نەبوە، هێندەی ئەوەی دەرئەنجامی ئەو کۆ خەبات و بەرەنگاریە گەورانەی کۆمەڵگەی ڕۆژئاوای کوردستان و هێزە سیاسی و شەڕڤانیەکەی کە لەسەردەمی هێنانی دڕندەکانی داعشیزم و هێرشە دڕندانەکانیان بۆ سەر گەلی ئێزیدیەکان لە ساڵی دو وهەزارو چواردەو دواتریش هێرشەکانیان بۆسەر پەیەدەو یەپەژەو پەلاماردانی کۆبانێ، دواجار بینیمان بەچ ئیرادەو توانایەکی مەزن و خۆڕێکخستنێکی کەم وێنەوە، ڕووبەڕوی سوپای دڕندەی داعشیزم بونەوەو بەچ جۆرێکیش لوتیان شکاندن و کۆبانێیش لەگەڵ شەڕڤانەکاندا بوونە هێماو قەڵای هەقخوازانەی بەرگریکاران لە ژیانێکی حورمەتدارانەی مەزن. داعشیزم بۆخۆی کۆی بەرەی فاشیزمی توندڕەوی سونەی ئیسلامی سیاسی دەگرێتەوە، کە هەڵسوڕێنەرانیان لەناوچەکە، بەدەوڵەتی ئەردۆغان و دەوڵەتانی کەنداو لەگەڵ هاوپشتی شاراوەی دەسەڵاتی ئیمپریالیزمی ئەمریکی و ئیسرائیل بۆی، تا ئەوەی بتوانن لەدژی بەرەی شعیزم بوەستنەوە، لەو سەروەختەیشدا، خۆبەڕێوەبەری لەناوچە کوردیەکانی ڕۆژئاوای کوردستان، تواناو خۆهەڵسوڕێنەرەکەی هاوشێوەی پێگەی دەسەڵاتدارێتی و پێگەی حزبە باوەکانی ناو بەرەی بۆرژوا قەومی و دینی و مەزهەبیەکان نەبوو، هێندەی ئەوەی خاوەن ئەڵتەرناتیڤی کۆمەڵگەی خۆسەری دیموکرات و یەکسانیخوازو نەهێشتنی چەوساندنەوەی چینایەتی و ڕەگەزی بوو، بەکرداریش ئەو ئەڵتەرناتیڤەیان جێبەجێ کردووە، جا دەبێت لەو مێژووە دروستەی ڕابردویانەوە خوێندنەوە بۆ ئەم قۆناغەیشیان بکەین. چونکە ئەو خرۆشانە مەزنە جەماوەرییە پڕ لە ڕەنگاوڕەنگەی کەکۆی چین و توێژەکانی گرتەوە لەنەتەوەکانیتریش بۆ پشتگیری لە ئەزمونی خۆسەری دیموکرات و هێزە پێشڕەوەکەی، دژ بەو هێرشە دڕندانانەی لەلایەن سوپا میلیشیا دڕندەکانی شەرعی داعشی ترەمپیزمی کرانە سەر گەڕەکە کوردیەکانی ئەشرەفیەو شێخ مەقصود لە حەلەب، وە ئامانجیان جینۆسایدکردنی کۆمەڵگەی ڕۆژاوا بوو، وەستانەوەی قارەمانانەی شەڕڤانان لەدژی ئەو هێرشە بەربەریزمە، کارێکی وای کرد، چیتر بێ دەنگی جەماوەر و تەنها وەک بینەرێک نەبێت، هێندەی ئەوەی هاوشانی شەڕڤانان بەگشت لایەکەوە بڕژێنە مەیدان و شەقامەکان لەسەرتاسەری جیهان بهێننە لەرزە. ئەو خرۆشانە مەزنەی جەماوەری زەحمەتکێش و ئازادیخوازو یەکسانیخواز، ڕەنگدانەوەی ئەو شۆڕشە یەکسانیخوازەیە بوە کە لەنێو ئەزمونی مێژووی بزوتنەوەی سیاسی و جەماوەری پەیەدەو هەسەدەو یەپەژەو یەپەگەدا ڕەنگی داوەتەوە، سەلماندیشیان ئەوان تەواو جیاوازن بەکۆی جیهانبینی دنیای دەسەڵات و بوونی سەرۆک و بوونی دەوڵەت، ئەوانە خاوەن بەرخۆدانی مەزنن لەکۆی مێژووەکەیانداو هیچکات درۆیان لەگەڵ باوەڕو ئامانجەکانیاندا نەکردوە، لەوێیشەوەیە، هیچ دەوڵەت و دەسەڵاتێکی نێو جیهانبینی باوی سەرمایەداری و بۆرژوازی ناتوانێت تێکیان بشکێنێت.
بۆپێشەوە: دوای ١٤ ساڵ لە دەسەڵاتی خۆسەری و خۆبەڕێوەبردن و لەناوچە کوردنشینەکانی سوریا و هاوکاری ئەمریکاو غەرب بەو ئەزموونە بەتایبەتی لە جەنگی دژە داعشدا، هۆکار چییە ئەمریکاو غەرب، ئیستا پشتی دەسەڵاتی داعشی ئەحمەد شەرع و رژێمی لەرزۆکی سوریا دەگرن؟
تاهیر حاجی حەسەن: یەکێک لە ئامانجەکان بۆ دروستکردنی ڕێکخراوی تیرۆریستی داعشی و پێش داعشیش لەناوچەکەدا، لەلایەن دەوڵەتی ئیمپریالیستی ئەمریکی و دەوڵەتی ئیسرائیل و دەوڵەتانی ئەوروپایش بەگشتی، تا بتوانن ناوچەکە زیاتر بخزێننە نێو جەنگ و ململانێی مەزهەبی و برەودان بەشەڕی سونیزم دژی داعشیزم و شاردنەوەو یان ونکردنی هەر ناڕەزایەتیەک کە لە نێو ململانێ چینایەتیەکانەوە سەرچاوە دەگرێت، کە ئەوەیش لەسەردەمی کۆتایەکانی سەدەی بیستەوە سەرچاوە دەگرێت، وەک سەپاندنی خومەینی و ئیسلامی سیاسی بەسەر خواست و ئامانجەکانی شۆڕشی گەلانی ئێراندا، یان بردنی ئەلقاعیدەو تاڵیبان بۆ ئەفغانستان دژ بەسوپای ئەو کاتی سۆڤیەت، بێگومان، ئامانجی ئیمپریالیزمی ئەمریکی، هاوکاری نییە، هێندەی ملکەچ پێکردن و داگیرکاری وڵاتانە بۆ بردنی سامانی کۆمەڵگەو جێخستنی وەکیلی گوێڕایەڵی چەتەو دیکتاتۆر لەناوچەکەدا . جا دەوڵەتی ئیمپریالیزمی ئەمریکی، خۆی بەزۆر خستە نێو ژیانی هەسەدەو گەرچی کۆمەکی جبەخانەی سەربازی و مادیشی پێ کردبن، بەڵام دواجار نەیتوانی گوێڕایەڵییان پێ بکات بەپێی ئامانج و بەرژەوەندیەکانی، لێرەشەوەیە، دیسانەوە، دەوڵەتی ئەمریکا داعشیزمێک دێنێتە سەر دەسەڵات کە تا دوێنێ ملیۆنان دۆلاری دەدا تا بگیرێت یان تیرۆر بکرێت، دواجاریش دەرکەوت، ئەوە تەنها سەرقاڵ کردنی میدیاو کۆمەڵگە بوەو جۆلانی تیرۆریست خۆی لەلایەن دەوڵەتی فاشستی ئەردۆغان و ئەمریکاو ئیسرائیلەوە ڕێکخراوەو خستیانە جێگەی بەشار ئەسەدی دیکتاتۆری پیاوی دەوڵەتی پوتن، ئالێرەوەیە، دەبێت تێبگەین لەو بارودۆخ و هەلومەرجە تراژیدیانەی لەناوچەکەدا ڕوو دەدەن، لەڕاستیدا، تەنها تروسکاییەک لە سوریاو ناوچەکەدا بوونی واقعی و ماتەریاڵی خاوەن ئەڵتەرناتیڤی جیاوازی هەبێت دژ بەجیهانبینی باوی دنیای دڕندەی سەرمایەداری، ئەو ئەزمونەیە، بێگومان ناڕەزایەتییە جۆراوجۆرەکانی ناو چین و توێژەکانی خوارەوە بوونی بەردەوامیان هەیە، بەڵام چونکە خاوەن ئاسۆو ڕێکخراو بونێکی چینایەتی نین،دەبینین، لەتوانایدا نییە، نا یەکی گەورە بەدژی ئەو کۆ جەبهە دڕندانەی ناو دنیای سەرمایەداری بڵێت و خۆی وەک ئەڵتەرناتیڤ پیشان بدات، بێگومان گەر وا بزوتنەوەکیش لەمەیداندا بوونی هەبوایە، هێندەیتر ڕێگریەکانی لەبەردەم ئەزمونی ڕۆژاوای کوردستاندا ئاسانتر دەکرد بۆ تێک شکاندنی ڕێگریەکان.
بۆپێشەوە: بەهۆی هیرشی سوپای سوریاوە، بەشیکی زۆر لە زیندانیانی داعش، کە تۆمەتبارن بە کوشتار و تاوان، ئازاد بوون، چۆن دەروانە ئەم رووداوە و لێکەوتەکانی چی دەبێت؟
تاهیر حاجی حەسەن: بوونی ئەو زیندانیانە ژمارە دەیان هەزارییە، هەر لەنێو پرۆژە پیسەکانی خودی دەوڵەتی ئەمریکاو ئیسرائیلدایە بۆ هێشتنەوەی ئاڵۆزی و ناجێگیری لەناوچەکەدا، گەر وانەبوایە، زۆر ئاسان دەبوو لە ماوەی یەک دوو ساڵدا لەدوای تێک شکاندنی داعش، ئەو زیندانیانە لەڕێی دادگاو شێوازەکانی ترەوە کۆتاییان پێ بهێنرایەو کەیسەکانیان یەک لای بکرایەتەوە، بەڵام لەنەکردنی ئەو کارانەدا، ڕونە کە ئامانج لەهێشتنەوەیان هەر لەپێناو ئەو بەرژەوەندیانەدایە کە دەوڵەتی ئەمریکا دژ بەڕکابەرانی لەناوچەکەدا هەیانە، دەکرێت ئەو زیندانیانە بێگومان لەگەڵ بەشێکیتری هێزی چەکداریدا ڕێکیان بخەنەوەو دژ بەعێراق گەر پێویستیان پێی بوو، دەست بکەنەوە بەجەنگی مەزهەبی و تائیفی لە ناوچەکەدا. بۆیە دەکرێت سیناریۆ ڕەشەکان زۆر بەڕونی ببینرێن، یان دوور نەبێت جارێکیتر هێزێکی دڕندەیان لێ دروست بکەن و دژ بەهەسەدە بەکاریان بهێنن، یان گەر دەوڵەتەکەی جۆلانی نەچوە ژێرباری جێبەجێ کردنی خواستەکانی دەوڵەتی ئەمریکاو دەوڵەتی ئیسرائیل، ئەوا دژ بەو بەکاریان بهێنن. جیهانی دڕندەی سەرمایەداری، جیهانی کڕین و فرۆشتنە، جیهانی بەکاڵا بونی هێزی کارە، جیهانی برەودانە بەچەوساندنەوەی چینایەتی و ڕەگەزی و ئاینی و مەزهەبی و قەومی و کەلتوری و پەروەردەی و ڕۆشنبیری و کۆی جۆری برەودانە جۆراوجۆرەکان بەهەبونی چەوساندنەوە، لەپێناو بەرژەوەندییە قێزەونە ئابوری و سیاسیەکانی چینە چەوسێنەرە دەسەڵاتدارەکاندا.
بۆپێشەوە: چۆن دەڕوانە دوا ڕیکەوتنی نێوان رژێمی سوریا و هەسەدە و تا چەندە رژێمی سوریا پابەندی ڕیکەوتنەکان دەبێت؟
تاهیر حاجی حەسەن: پرسیارێکی دروستە، لەڕاستیدا هەمیشە دەوڵەت کە هێمایە بۆسەردەستە بونی چینێکی چەوسێنەری دەسەڵاتدار، گەر بارودۆخەکان ناچاری نەکەن، ئەوا ناچێتە ژێرباری هیچ ڕێکەوتنێکەوە کە ببێتە داگیرکردنی بەشێک لە دەسەڵاتەکەی. جا بۆ دەوڵەتە لەرزۆکەکەی جۆلانیش کە بۆیان دروست کردوە لەلایەن ئاغاکانیەوە کە ئەردۆغان و قەتەرو سعودیەو ئەمریکاو ئیسرائیل و دەوڵەتانی ئەوروپان، ناچارە بچێتە ژێر باری ئەو ڕێکەوتنەوە. هێزی خۆسەری ڕۆژاوای کوردستان، هیچکات داوای جیابونەوەی نەکردوە لەسوریا، بەڵکو خاوەن ئەڵتەرناتیڤی خۆسەری سیکولارو دیموکراتیانەیە لە خۆڕێکخستنی کۆمەڵگە لەخوارەوە بۆ سەرەوە، یانی تەواو پێچەوانەی جیهانبینی باوە، لەکۆی ئەو ئەزمونەیشی هەیەتی کاری بەو ئەڵتەرناتیڤە کردوە، بۆیەشە، ئەوان هیچکات ناترسن گەر بچنە ناو ئاوا ڕێکەوتنێکیش لەگەڵ دەوڵەتی جیهادیستەکانی وەک ئەوەی جۆلانی، بەڵام هیچکات، ئەو دەوڵەتە جێی متمانە نییەو لەهەر چرکە ساتێکدا بۆیان لەبار بێت، دەست بۆ شەڕو داگیرکردن و لەناودانی هەسەدە دەبەن، بەڵام بەپێی ئەو دەورەی لەلایەن ئاغاکانیەوە، بەتایبەتیش دەوڵەتی ئیسرائیل و ئەمریکاو تورکیاوە پێی دراوە، لەگەڵ دەوڵەتانی ئەوروپا، کەلەو نێوەیشدا بەرژەوەندیەکانیان هاوبەش بن یان پێچەوانە، بەئەندازەیەک ڕێگر دەبن لەجێبەجێ نەکردنی ڕێکەوتنەکە، بونی ئازایانەو ئازادانەی کۆمەڵگەیش بۆ خۆسەری ڕۆژاوا، وەڵامێکی دروستی دا بەگشت جیهان، کە ڕۆژاوا تەنیا نیە.
بۆپێشەوە: ئاییندەی ئەزموونی ناوچە کوردنشینەکانی سوریا چۆن دەبینێت، ئایا دەتوانرێت کۆتایی بەو ئەزموونەو هاوکات کۆتایی بە پرسی کورد لە سوریا بهینرێت؟
تاهیر حاجی حەسەن: پێ ناچێت، کارێکی سانا بێت، بۆیە مەگەر جینۆسایدی کۆی کۆمەڵگەی ڕۆژاوا بکەن، چونکە خۆسەری بۆخۆی بوەتە کۆمەڵگە، ئاخۆ ڕێی تێدەچێت، لەم سەدەیەدا جینۆسایدی گشتی کۆمەڵگەیەک بکرێت؟ لەڕاستیدا، لەنێو قۆناغی وەرچەخانداین، پشتگیری و هاوپشتی کۆمەڵگەی کوردی بۆ ئەزمونی خۆسەری بۆخۆی، بوەتە زەمین لەرزەیەک بۆ گشت دەوڵەتانی ناوچەکە، کە کۆمەڵگەی کوردی لەتوانایدایە بەکۆ خۆی لەهۆشیار بونەوەدا ببینێتەوەو چیتر ڕێگە بەکوشتن و لەناوبردنی کارێکی سانا نەبێت لەم سەدەیەدا. ئەوە پرۆسەی ئاشتیەی لە ئیمراڵی و ئەنقەرە لەبرەودایە، بۆخۆی ناوماڵی دەوڵەتی فاشیزمی تورکی داوە بەیەکداو نەدەتوانن لێی دەرچن وە نەدەشتوانن جێبەجێی پرۆسەکە بکەن، بۆیە قۆناغەکە تەواو جیاوازترە لەسەدەی بیست، گەرچی جیهانیش لەژێر هەژمونی بەربەریزمی سەرمایەداریدایە، لەگەڵیشیدا، ئەم سیستەمە دڕندەیە لەنێو قەیرانێکی هێندە قوڵدایە کە دەربازبون لێی کارێکی ئاسان نابێت، پەیدابونی جیهانی فرەجەمسەریش هەر ناتوانێت ببێتە ڕزگار هێنەری جەنگەڵستانەکە. چونکە برەودانە بەمانەوەی چەوساندنەوەی چینایەتی و تەقینەوە جەماوەریەکان لەهەر ساتێکدا قابیلی لەرزاندنی گەورەی ئەم سیستەمە دژە ژیانیەیە.
بۆپێشەوە: هەندێک شکستی ئەزموونی هەسەدەو ناوچەکورد نشینەکانی، وەکو سەرەتایەک بۆ کۆتاییهێنان بە ئەزموونی هەرێمی کوردستان لە عێراقدا تەماشا دەکەن، ئێوە لەو بارەیەوە دەڵێن چی؟
تاهیر حاجی حەسەن: خوێندنەوەکان هەر چۆنێک بن، ئەوە واقعە دەتوانێت وەڵامێکی ڕاستی بداتەوە. کۆی مێژووی ئەحزابی بەرەی کوردایەتی، مێژووی تێک شکاندنی تواناکانی کۆمەڵگە بووە، لەپێناو هەژمونداری بەرژەوەندیەکانی سەرۆک حزب و حزبەکانیان، بۆیەشە، هیچکات ناتوانرێت، گەر مرۆڤ بڕێک دوور لەڕقی کوێرانە خوێندنەوە بکات، جیاوازییە گەورەکان لەو دوو دنیابینیە جیاوازەدا نەبینێت. بزوتنەوەی سیاسی لەڕۆژوای کوردستان ڕێک پێچەوانەی کۆی مێژووی ئەوانەی هەرێمە. چونکە خۆسەپێنەر نەبون، ئەوان چینێکی بازرگان و چەتەیان تێدا پەیدا نەبووە، ئەوان سەرۆکی دیکتاتۆریان نییە، ئەوان،گرێبەستی بێ ئاگاداری کۆمەڵگەیان نییە، ئەوان هیچکات نەبونەتە خاوەن کوشک و ملیاردێرو فرۆشتنی وڵات و کۆمەڵگە، جا مرۆڤ گەر ئەو ڕێکخستنەیان لەبواری کرداریدا نەبینێت، ئەوا هەروەک ئەوانەی هەرێم خوێندەوەیان بۆ دەکات، ئەوان خیانەتیان نەکردوە، ئامادەن ڕەخنەو لێپرسینەوە لەگەڵ هەر تاکێکی بەرپرسدا بکەن، ئەوەی بەرپرسیارێتی گەورەی هەبێت، ئەرکەکەی دەیانجار قورستر دەبێت، ئەمانە چۆن بەراورد بەمێژووی ئەحزابی هەرێم دەکرێت، لەهەرێمدا بۆچی ئەحزابی ئیسلامی سیاسیان برەوپێدا، گەر ئەو حزبانە خۆ فیداکار بونایە لەپێناو برەودان بۆ پێشڕەوی کۆمەڵگە! لە ڕۆژاوا تەواو پێچەوانەیە، ئێستایش کۆی ئامانجی حزبەکانی ناو بەرەی کوردایەتی ئیسلامی هەرێم بۆ ئەوەیە، لەلایەک خۆسەری ڕۆژاوا نابوت بکەن و وەک خۆیانیان لێ بکەن، وە گەر ئەوەیشیان بۆ نەکرا، ئەوا، هەوڵ بدەن لە قەندیل دایان ببڕن، من وەک خۆم بڕاویەکی زۆرم بەو ئەزمونەی ڕۆژاوا هەیە کە تێک شکاندیان کارێکی سانا نابێت، گەرچی لەمێژوویشدا هیچ گەرەنتیەک نییە بۆ بزوتنەوە یەکسانیخوازەکان لەنێو هەژمونداری جیهانی دڕندەی سەرمایەداریدا، ئەزمونی کۆمۆنەی پاریس و شۆڕشی ئۆکتۆبەر دوو نمونەن، بەڵام دوو بومەلەرزەی گەورەن کە هەمیشە دنیای سەرمایەداری لەو شۆڕشە کۆمەڵایەتیە تۆقیوە.
بۆپیشەوە: چۆن دەکرێت هیرش و ملهوری رژێمی سوریا بۆسەر ناوچە کوردنشینەکان و هەسەدە بەری پێ بگیرێت، بەتایبەتی کە رژێمی تورکیا و هاوکات ئەمریکا و غەرب، لەچوارچیوەی بەرژەوەندی خۆیاندا بەرگری لە سوریا و ئەحمەد شەرع دەکەن؟
تاهیر حاجی حەسەن: دەستان خۆش، لەڕاستیدا، ئەم خرۆشانە مەزنەی جەماوەر، وە ئەو خۆڕاگریە مەزنەی شەڕڤان و گەلی ڕۆژاوا، وەڵامێکی مەزنی دا بەکۆی داگیرکارە دڕندەکان، کەڕۆژاوا تەنیا نییە، لەو هاتنەمەیدانە مەزنانەدا، پشتگیری بەرەی یەکسانیخوازو ڕێکخراوە جیهانیەکان تا دەگات بەپشتگیری وڵاتانی ئەمریکای لاتنین و پەرلەمانی کەتەلۆنیا دانی نا بەسەربەخۆی ڕۆژاواو ئەزمونەکەی، ئەم کۆ هاتنەمەیدانییەو دانی نا یەکی گەورە بەدژی کۆی ئاغاکانی جۆلانیدا، بۆخۆی جێی بڕوا بونێکی گەورەیە بەهاوپشتی مەزن کە لەتوانایدا دەبێت ببێتە خاوەن ئاسۆو ئەڵتەرناتیڤ دژ بەجیهانی دڕندەی سەرمایەداری. هەمیشە لەسەرپێی خۆ وەستان، پێش ئەوەی متمانەت بەهێزێکی دەرەکی هەبێت لەتوانی مانەوە زیاتر دەکات، ئەزمونی ڕۆژاوای کوردستانیش خاوەن ئەو پێگەیەیە، دەوڵەکەی جۆلانێ هیچکات نوێنەرایەتی چینەکۆمەڵایەتیە زۆرینەکەی سوریا ناکات و تەواو دژ بەخواستە ڕەواکانی گەلی سوریایە، بەڵام کاتێک لەنێو جیهانێکی کوێردا دەژین، دەبینین، وا نیشان دەدرێت، کە ئەم جیهانە، هەمیشە جیهانێکە نەتەوەو گەلەکان دوژمنی یەکتر بونەو هیچکات ناتوانرێت دوو نەتەوە یان دوو ئاین و مەزهەب لەشوێنێکدا پێکەوەو بەخواستی خۆیان ڕێک خرێن، لەکاتێکدا، ئەوە کۆی جیهانبینیە کوێرەکەی نێو هەژمونداری کاردابەشکاری کۆمەڵایەتی و خاوەنداری تایبەت بەسەر ئامرازو هۆکارەکانی ژیاندایە، بوەتە زمان حاڵ و برەودەر بەم ژیانە، لەکاتێکدا ژیانە ئەسڵیەکە ڕێک پێچەوانەی جەنگەڵستانەکەیە، وەک چۆن مارکس وتی: مێژووی مرۆڤایەتی مێژووی نێو ململانێ چینایەتیەکانە، تەنها ڕزگارهێنەریش کۆتایهێنانە بەچەوساندنەوەی چینایەتی و برەودانە بەڕێکخراوبونی چینایەتی بۆ ساتە وەختی بەرپاکردنی شۆڕشی کۆمەڵایەتی و بنیاتنانی کۆمەڵگەی هەرەوەزی و شێوازی بەرهەم هێنانی سۆسیالیستی جیهانی. خۆسەری دیموکراتی ڕۆژاوای کوردستانیش تۆوی ئەو خۆبەڕێوەبەریە هەرەوەزیەی چاندوە، بۆیەشە کۆی دەوڵەتان و جیهانی باوی سەرمایەداریش دژایەتی دەکەن، بەهیوای سەرکەوتنیان و هەمیشە پشتوپەنایان لەلایەن کۆی هێزە سۆسیالیست و ئازادیخوازەکانەوه.