کێشمەکێشی ئایندەکان

کێشمەکێشی ئایندەکان

ابراهیم حسین

١٥.١٢.٢٠٢٠

 کوردستان بەهەلومەرجێکی زۆر تایبەت و دژواری مێژووییدا تێدەپەڕێ و پوختە و جەهەری ئەم تایبەتمەندیەش بریتیە لەوەی کە (ماکسیمۆم) لانی زۆری ئەوەی کە بورژوازی و سەرمایە و دەسەڵاتی ناسیۆنالیزم دەتوانێ بیدا بە کۆمەڵگە، کەوتۆتە ناکۆکیەکی ڕاستەوخۆی ساختاری و لە چارنەهاتوو لەگەڵ (مینیمۆم) لانی کەمەکانی ژیانێکی سادە وشەرەفەتمەندانەی ئینسانی.

هەرئەم تایبەتمەندییە، هەر ئەم بەریەککەوتنە، ئەم دەسەڵات و حاکمیەتەی سەرمایەی گەیاندۆتە سەر دوا پلێت و دوا بەریەککەوتن لەگەڵ کۆمەڵگەو چاوەڕوانییە سادەکانی هاوڵاتیان لەژیانێکی ئاسایی، لەئازادی و لەچارەنوسی خۆیان. هەلومەرج و ڕاگوزەرگەیەکی سیاسی کە تێپەڕاندنی وپەڕینەوە لێی، تەنیا بە نەفی و تێکەوەپێچانی ئەم هەلومەرجە ئیمکانی هەیە.

لە هەمان کاتدا ئەمە تەنیا قەیران و بنبەستێکی حکومەتی بۆرژوازی نییە کە لە چوارچێوەی هەلومەرج وکۆمەڵگەیەکی جێگیر لە ڕووی پارەمەترە ئابوری وسیاسییەکان ڕویدابێ و دوای تێپەڕین بە هەندێک هەڵچون وداچونی سیاسی، بورژوازی بتوانێ دەسەڵات لە نێو خۆیدا، لەو دەستەیەوە بخاتە دەستەکەی تری، بە ڵکو بنبەست و قەیرانێکی قوڵتری ستراتیجیی جوڵانەوەییە، شکست و بنبەست و قەیرانی کوردایەتییە وەک جوڵانەوەی سەرەکی بورژوازی و سەرمایە لە کوردستان، لە هەلومەرجێکی زۆر تایبەت و ڕاگوزەری مێژووییدا. شکستی ئەو ئومێد و ئارەزووە میللی و ناسیۆناڵیستیەیە کە بکرێ کۆمەڵگەیەک لەسەربنەمای ئەجێندای سەرمایە و بۆرژوازی دروست بکرێ کە تیایدا ژیانێکی تاڕاددەیەک نۆرماڵ و ئەمڕۆیی هەبێ، لانیکەمی خۆشبژێوی و ئاسایشی سیاسی و ئابوری هەبێ و بازاڕی کاروکەسابەتی سەرمایە بچەرخێ و چینی کرێکارو ئەو جەماوەرەی لە ڕێگەی میکانیزمی کرێ و فرۆشی هێزی کارەوە دەژی و بەشە مەحرومەکانی کۆمەڵگە، بە سوبسیدی دابین بوونی لانی کەمەکانی ژیان و مانەوە، ئامادە بن بێدەنگی سیاسی و کۆمەڵایەتی هەڵبژێرن و قەهرو دیکتاتۆری سیاسی سەرمایە و بورژوازی، قبوڵ بکەن. مەسەلەکە هەر تەنیا ئەوەش نییە کە ئایا کرێکاران وجەماوەری بێبەشی کۆمەڵگە لە مەیداندان یان نا، مانگرتن وخۆپیشاندان دەکەن یان نا، تەنانەت ئەوەش نییە کاتێک دێنە مەیدان بە چ دەربڕینێک وبە چ زمانێک و لە شکڵ وشێوەیەکدا، گوزارشت لە خۆیان دەکەن. بەڵکوبەشێوەیەکی واقیعی مەسەلەکە بنبەست و بێ ئیعتیمادیەکی کۆمەڵایەتی و فراوانە بەوەی کە بکرێ لە چوارچێوەی ئەوشێوە ژیانە، لە چوارچێوەو بە فەڕزی درێژەکێشانی ئەم هەلومەرجە، هیچ ئاسۆیەک هەبێ بۆ ئەوەی تەنانەت ٢٥ ساڵی تریش، بتوانێ ئاو و کارەباو سیستەمێکی دروستی تەندروستی و خوێندن و پەروەردەیەکی ئەمڕۆیی و هەرجۆرە کرانەوەیەک لەژیانی ئابوری و سیاسی و فەرهەنگی، هەبێت.

سەرجەم ئەم هەلومەرجە کۆمەڵگەی گەیاندۆتە قۆناغێکی تایبەتی سەلب و (نا) وتن بە هەلومەرجی ئێستا بە مانا فراوانەکەی خۆی و ئەم جوڵانەوەی( نا)یە دەمێکە دەستی پێکردووە .

ئەگەر قبوڵی بکەین کە ئەم هەلومەرجە لە ئارادایە و ئەم جوڵانەوەی (نا)یە لەو ئاستەدا بوونی هەیە، ئەوکات کێشمەکێشی هێزە سیاسی وکۆمەڵایەتییە سەرەکیەکان، لەدەوری بە دەستهێنانی ڕابەری ئەم (نا)یەی کۆمەڵگە، چەق دەبەستێ و بێگومان هەر هێزێک بتوانێ ڕابەری ئەم حاڵەتە سەلبی و(نا)یە بگرێتە دەست، دەتوانێ کۆمەڵگە و سەردەمەکە بباتەوە و بگۆڕێ بە هێزی سەرەکی کێشمەکێش و دەعوای دەسەڵات و هێز لەم بڕگە مێژووییەدا.

بۆرژوازی کورد، بە سواربوونی مەیل و ئارەزوی ناسوناڵیستی یان ڕاستتر بڵێین بە سواربوونی خۆشباوەڕی گەورە و  فراوان بە ناسیوناڵیزم لە کۆمەڵگەدا و لە دڵی بێ نەزمی وسەرگەردانی سیاسی و حقوقی کۆمەڵگە و لە بۆشایی و نائارامی و پشێویەکی سیاسی ستراتیجی ناوچەییدا، کرایە کوێخاو مەئموری  چەک بەدەستی پاسەوانی کاتی سەرمایە و چاڵەنەوتیەکان و کۆنتڕۆڵی خەڵک و لایەکی حیساباتی سیاسی بۆرژوازی لە ناوچەکەدا، بەڵام هەرگیز بوژوازی کورد نەیتوانی لەوەتێپەڕێ و  کۆمەڵگەیەکی سەرو سەقامگرتو و دەوڵەت و سەرخانێکی سیاسی ئاسایی ئەنتگرە لە پەیکەرەی سیاسەت وئابوری سەرمایەدا پەیدا بکاو ئەم نەبوونەی ئختیار و مافی حاکمیەت بۆ بۆرژوازی کورد، تایبەتمەندییەکی دوسەرەی بە هەلومەج و، خەباتی سیاسی بۆ ئاڵۆگۆڕ بەخشیوە.

ئەگەر ئەم هەلومەرجە مەسەلەی ئاڵوگۆڕ و خەبات لە پێناو ئاڵوگۆڕدا ڕووبەڕوی کێشەو ئاڵۆزیەکی تایبەت دەکاتەوە بەراورد بە هەلومەرجی نۆرماڵ، ئەوا لەلایەکی تر کەش و هەوای کۆمەڵگە و مەسەلەی دەسەڵات و چارەنوسی کۆمەڵگە بە کراوەیی دەهێڵێتەوە کە وادەکا هێزه سیاسیە جیددیەکان، ئاسۆ و ئەڵتەرناتیفی خۆیان بخەنە بەردەم کۆمەڵگە و چینەکەی خۆیان و هەوڵ بدەن کە لەو هەلومەرجە شل و دەڵەمەیەدا، کۆمەڵگە به دەست بهێنن و بۆ بردنی بەو ئاقارەی کە دەیانەوێ پێ بنێنە مەیدانی جەنگ و دەعوای دەسەڵاتەوە.