لەبەرگری له ئازادی! لە دژی هێرشی موقەدەسی بۆرژوازی!
لەبەرگری له ئازادی!
لە دژی هێرشی موقەدەسی بۆرژوازی!
شێروان شێروانیان فڕاند. وەک هەمیشە بۆ ئەم کارە هیچ دادگا و پاساوێکیان لە هیچ مەرجەعێکی قانونیەوە پێویست نەبوو. هەر ئەوەندە بەس بوو دەستەی دەسەڵاتداری هەولێر فەرمان بدەن تا لەهەر کوێ بەردەست بوو، بیفڕێنن و ئەگەر ویستیان و فایل و تاوانی قوربانی ڕفێنراو قورس و سەخت بێت، کە ڕەنگە وتنی ڕاستیەکی سادە و دوبارە کردنەوەی ڕەخنە و ناڕەزایەتیەکی ڕۆژانە بیستراوی سەرزمانی خەڵک بێت، ئەوا لە جێگەیەک بێکەس کوژی بکەن. یاخود ئەگەر هێشتا هەلومەرجیان بۆ ئەو کارە بە گونجاو نەزانی و کردەوەی کوشتنیان بەپێویست نەزانی، بیخەنە سوچێکی تاریکەوە و له دنیای دەرەوە بێبەشی بکەن و لەو گۆشە تاریکەدا، هەر کارێک کە بیانەوێ لەگەڵ قوربانی دا بیکەن. دواتریش هەر پەروەندە و فایلێکیان بەگونجاو زانی، هەڵیبەستن. هەلومەرجێک کە تیایدا قوربانی زمانبەستراوە و لەهەر جۆرە ئازادیەک داماڵڕاوە و لە ژێر ئەشکەنجەی ترسناکی ڕۆحی و جەستەییدایە.
ئەم شێوە فاشیستیەی مامەڵەکردنی ڕەخنەگران و ناڕازیان، حاڵەتێکی تێپەڕو کاتی و بە هەڵکەوتێک نییە، بەڵکو سیاسەتێکی وشیارانەی پارتی وبورژوازی کوردە، ڕاگەیاندنی ڕەسمی ئەوەیە کە ئەگەر قەرارە کەسێک لە ناوچەیەکدا بژی کە لە ژێر دەسەڵاتی ئەواندایە پێویستە یان قەباڵەی بێدەنگی و سەرکزی خۆی ئیمزا بکا یان ناتوانێ لە ژیانی خۆی، لە ئاسایشی گیانی خۆی دڵ تەئمین بێت.
ڕووی دووەمی ئەم شێوە فاشیستیە، مانۆڕ و کەمپین و پڕۆژەی پیرۆزییەکانە کە تیایدا بورژوازی بەڕابەرایەتی پارتی، لە ڕاستیەوە بۆچەپی، لە موسڵمان و ئیمانداریەوە تا نەتەوەپەرەستی توندو کەللەشەقی تا دیموکرات و گۆڕانخوازی، لە پەیمانێکی پیرۆزدا یەکیان گرتووە تا دەمی کرێکاران وبێبەشانی کۆمەڵگە، دەمی ئازادی و ئازادیخوازی و جوڵانەوەیەکی نەویستن و ڕەتکردنەوەی هەلومەرجی ئێستا و دەسەڵاتی ئەو کەمایەتیە سەرمایەدارە، کە لە قوڵایی کۆمەڵگەدا سەری دەرهێناوە، دابخەن و بەهەرشێوەیەک بێ، ئەم قۆناغەی کە دەسەڵاتی بورژوازی کەوتۆتە بەردەم ڕەشەبای ئاڵۆگۆڕخوازی کرێکاران و بێبەشانی کۆمەڵگە، بەسەلامەتی تێپەڕێنن. دژه هێرشی بۆرژوازی لە دژی چینی کرێکارو کۆمەڵگەیەکە کە ئەو هەلومەرجەی ناوێ ئەو ژیان و دەسەڵاتە بە شایستەی خۆی نازانێ. بڕیارە ئەم پەلامارە فاشیستیە پیرۆزەی بورژوازی، ئاوی پیرۆزی بکاتە سەر دەستبردن بەبردن و پەلاماردانی پیرۆزترین شتی ئینسانیەتی کرێکار و بێبەش کە ئەویش ژیانخوازی و ئازادی و ئازادیخوازیانە.
لە وتاری (بورژوازی لە ڕاشکاویدا) لەپەیوند بە ئەجێندای بورژاوازی و دەسەڵاتەکەی ئاماژەمان بەوە کردبوو، کەسەرکوت و قەهر و ئستیبدادی سیاسی بەشێکی دانەبڕاوە لە سیاسەتی سەپاندنی هەژاری و بێمافی تەنانەت لەوەی ئێستاش فراوانتر و هەمەگیرتر؛
(تەواوکەر و ڕووی دوەمی ئەم مەهلەکەیە کە بارزانی کوڕو سەرجەم ئۆردوی بۆرژوازی خەت ونیشانی بۆ دەکێشن، سەپاندنی کۆنەپەرستی و ئیستیبدادێکی سیاسییە کە تیایدا ئازادی ئیعتراز ومانگرتن، ڕێکخراوبوون، بیروڕای ئازاد و ئازاد ئەندێشی قەدەغەیە و سیاسەت و هەول وتەقەلای سیاسی له کرێکاران و بێبەشانی کۆمەڵگە زەوتکراوە، کورتیەکەی سەپاندنی دۆڕانێکی سیاسی و کۆمەڵایەتی وفەرهەنگی و ئەخلاقی هەمەگیری چینی کرێکارو بەشەرییەتی بێبەشە به کەمایەتیەکی سەرمایەداری دژی ژیان، دژی ئازادی و دژی هەر پێشڕەویەکی سیاسی کۆمەڵایەتی و ئینسانی.)
لە کۆتاییدا هەڵسوکەوت و مامەڵەی بورژوازی، دەکرێ شتێک فێری چینی کرێکار و بێبەشان و ئۆردوی ئازادیخوازی بکا کە پوختەکەی ئەوەیە؛ وەک چۆن سەرجەمی بورژوازی، لە دەوری حیزب و هێزی سەرەکی بورژوازی، لەدەوری پەرچەمی لێبڕاوترین هێزی سیاسی بورژوازی لە هێرشیدا بۆ سەر ژیان و گوزەرانی کرێکاران و بێبەشانی کۆمەڵگەو سەپاندنی بازاڕی کاری هەرزان و موفت و هاوشانی ئەویش لەسەپاندنی ئیستیدادی سیاسی و سەرکوتی ئازادی و سەپاندنی خامۆشی و ملکەچیەکی سیاسی و، کۆمەڵایەتی بەسەر کرێکاران و کۆمەڵگەدا یەکیان گرتوە، ئەوا کرێکاران وئۆردوی ئازادیخوازیش بۆئەوەی بتوانێ سەربەرزانە بەرگری لە خۆی بکات و هەژاری و بێبەشی و ئەو ژیانە پەستیە و دەمبەستراوی و سەرکزی و بێدەنگی قبوڵ نەکات، بەڵکو تەواوی ئازادی داوا بکات، تەواوی یەکسانی و خۆشبەختی بەدەستبهێنێ و سەرەنجام لەو پێناوەدا بیەوێ سەر بکەوێ و ئەو کەمایەتیە سەرمایەدارە شکست بهێنێ، تەنیا بە بەدەستەوە گرتن و کۆبوونەوە لە دەوری کۆمۆنیزمی خۆی، دەتوانێ ئەوکارە بکاو لەو جەنگەدا سەر بکەوێ.
ئەم گرێخواردنەی چارەنووسی خەبات و بەرەنگاری چینی کرێکار و ئۆردوی بێبەشان بە کۆمۆنیزم و حیزب و پەرچەمی سیاسی ئەم کۆمۆنیزمە، هاوکێشەی کێشمەکێشی سیاسی و کۆمەڵایەتی لەسەر دەسەڵات و چارەنوسی کۆمەڵگە، لەسەر ئازادی و جۆری ژیان، لەبن و بێخەوە بە قازانجی تەقینەوەی توانای ئاڵوگۆڕبەخشی کۆمەڵایەتی دەگۆڕێ و یەکجار جوڵانەوەی ئاڵۆگۆڕخوازی، لەبێ ئاسۆیی و دەستەپاچەیی و بێ تواناییە سیاسیەکەی ئیستای تێدەپەڕێنێ و جوڵاوەی فشارو لە ژێر لێوەوە، دەگۆڕێ بە جوڵانەوەی ئیڕادەی ڕاستەوخۆ، بۆ بەدەستەوە گرتن و بڕیاڕدان لە چارەنووسی خۆ.