تاهیر حاجی حەسەن: دەوڵەتی تورکیا، نەجێی پێگەی دیموکراسی تێدا دەبێتەوە، وە نەجێگەی ژیانێکی بێ چەوساندنەوەی چینایەتیشی لەسایەی ئەو دەوڵەتە سەرمایەداریە بۆرژوا قەومی و دینیەیدا دەبێتەوە… دیمانەی بۆپێشەوە لەگەڵ نووسەری کۆمۆنیست و یەکسانیخواز تاهیر حاجی حەسەن سەبارەت “پەیامی عەبدوڵا ئۆجەلان و پرۆسەی ئاشتی و پرسی کورد…
بۆپێشەوە: بریاری هەڵوەشاندنەوەی پەکەکە… شکست و ریشەی لە بن بەستی ئەو هێزەدایە یان سەرەتای قۆناغێکی نوێیە، وەکو پەکەکە ولایەنگرانی رای دەگەیەنن؟
تاهیر حاجی حەسەن: ڕاستی پێناچێت لە بن بەست گەیشتنی پەکەکەدا بێت، هێندەی ئەوەی ئەو هێزە سیاسییە چەکدارییە، لەکۆی مێژووەکەیدا، هیچکات هاوشێوەی حزبە جۆراوجۆرە باوە قەومی و دینیەکان نەبوە. چونکە لە سەرەتای بونیەوە خاوەن ستراتیژو بڕیاری کۆی سەرکردایەتیەکەی، بەشێک بوە لەو پێگە بەهێزەی تا ئێستا توانیویەتی بونەکەی خۆی بپارێزێت. بێگومان، دروست بونی پەکەکە، بەئەندازەیەکی زۆر لەنێو قۆناغی سەردەمی دو بلۆکی و ئەو کێشمەکێش و ڕکابەریانەی لەنێو هەردوو زلهێزی ڕوسیاو ئەمریکادا لە سەردەمی شۆڕشی ئۆکتۆبەری ساڵی 1917وە، لە زۆرێک لەو وڵاتانەی لەدوای ڕوخانی ئیمپراتۆریەتی عوسمانیەوە، ئەو شۆڕشەیشوەک داینەمۆیەکی شۆڕشگێڕانە، کاریگەری لەزۆرێک لەو وڵاتانەی نێو هەژمونی ئیمپراتۆریەتی عوسمانیش داناو ئەحزابی شیوعی و قەومی تێیدا سەریان هەڵدا، پەیوەست بە پەکەکەو خودی ئۆج ئالانەوە، کە لەساڵی 1978وە بڕیاری دروست کردنی ئەو حزبە دەدات و دەچێتە دەرەوەی تورکیاو قۆناغێکی درێژ لەسوریا دەمێننەوەو لە ساڵی هەزارو نۆسەدو هەشتاو چوارەوە، بەناچاری دەست بۆ چەک دەبەن، ئیتر بەردەوامیان بەو خەباتەیان داوەو هەرچی هێزو توانای دەوڵەتی فاشستی تورکیاش هەیە، لەدژیان درێغی نەکردوە، هاوشێوەی دەوڵەتی فاشستی قەومی بۆرژوازی بەعس، چۆن هەزاران گوندی کوردستانی وێران کرد، بێ ئەویش بەو شێوەیەو دڕندانەتر دژ بەکۆمەڵگەی کوردی باکورو دژ بەو حزبە هەردەم لە دژایەتی کردنیدا بووە. بێگومان، گەر دەوڵەتی تورکیا، دانی بەمافی ڕەوای کۆمەڵگەی کوردیدا بنایە، ئەوکات پێنەدەچوو پەکەکە دروست ببوایە، یانی کۆی سەرچاوەی کێشەکان لەلایەن خودی دەوڵەتی تورکیاوەیەو، دەوڵەتی تورکیاش، بەشێکە لەناتۆو بەشێکی دانەبڕاویشە لە کۆی سیستەمی سەرمایەداری. بۆیە گرنگە لە دنیا بینیەکی واقعیانەوە پەکەکەو بونەکەی و خەباتەکەیشی ببینین و لەوێیشەوە، کۆی مێژووەکەی بناسین. بێگومان، لەماوەی ئەو چل و حەوت ساڵەی ئەو حزبەدا، نەک لاواز بووە، بگرە توانایەکی تەواو جیاوازیشی لەکۆی حزبە باوەکان هەبوەو توانیویەتی لەنێو کۆمەڵگەدا جێگەو پێگەی خۆی قایم بکات، ڕۆژئاوای کوردستان بەشێکە لەو کرداری بەکردار بونیەی ئەو حزبە لەنێو کۆمەڵگەدا، لەناو تورکیایشدا، توانیویەتی، جێ پێی خۆی لەنێو کۆمەڵگەی باکورو تورکیاو لەناو خودی تورکیاشداو تا دەگات بەو حزبانەی وەک هەدەپەو دەم پارتی ئێستا، قایم بکات، بۆیە لێرەوە گرنگە لە پێگەی ئەو حزبە وەک خوی بڕوانین، نەک وەک دیدێکی تەواو کۆمۆنیستیانە کە ئێمە هەمانە بۆ نێو ڕەوتی مێژوو، وە بۆنێو بزوتنەوەی کرێکاری و ئەرکە کۆمەڵایەتیەکەی. پەکەکە بۆخۆی بوەتە جۆرێک لە خاوەن ئەڵتەرناتیڤ و خاوەن سیستەم. پێدەچێت،ئەم خاڵەیشی پێگە بەهێزەکەی بێت، کە تا ئێستا دەوڵەتی میلیتاری بۆرژوا قەومی و دینی و ئیسلامی بۆرژوازی تورکیا نەیتوانیوە بەسەریدا زاڵ بێت. زیاد لە بیستو حەوت ساڵە ئۆج ئالان لە زینداندایە، بێگومان گرتنەکەیشی بەدوروتر لێی بڕوانین، کە پێدەچێت، دەستێکی نهێنی ئاڵۆزی دامودەزگا هەواڵگریەکانی ئەمریکاو ئیسرائیل و بەریتانیاو زۆر دەوڵەتی تری ناوچەکەو تا دەگات بەخودی دامودەزگای هەواڵگری تورکیا، لە گرتنەکەیداو ڕادەستکردنی بە دەوڵەتی تورکیا، بێجگە لەوەی بەشداری ڕاستەوخۆ بون، لەهەمان کاتیشدا، بە ئامانج ئەو کارەیان کردبێت، لەوەی هەم ڕێگە نەدەن بەدەوڵەتی تورکیا، تا وەک زلهێزێک لەناوچەکەدا ببێتە خاوەن بڕیارو خاوەن هەژمون، وە لەلایەکیتریشەوە، ڕێگە نەدان بە سزای لەسێدارە دانی ئۆج ئالان پەیوەست بەم گەیشتنی ناوچەکەشەوە بێت لەنێو ئاڵوگۆڕەکاندا، تا ئەوەی لەوەها ساتەوەختێکدا، بتوانن وەک کارتی گوشار، ئەو هێزە لە بەرانبەر دەوڵەتی تورکیا تا دەگات بەسوریاو سبەی ڕۆژیش لە بەرانبەر ئێراندا، بەکار بهێنرێن، گەرچی تا ئێستایش پەکەکەو ئۆج ئالان، وەک دوو لایەنی ناویەک تەواوکەری یەکترن لەنێو بڕیارو چۆنیەتی ئەو ستراتیژو ئامانجانەی هەیانە تا ئەوەی بگەن بەو خاڵەی دەوڵەتی تورکیاو کۆی زلهێزانی ڕکابەر، ئامادەییان هەبێت، هەم دان بنێن بەو هێزەداو، وە هەمیش دان بنرێت بەبونی کۆمەڵگەی کورد لە تورکیاداو لەو ڕێیەشەوە، ئیش لەسەر گۆڕانکاری لەو دەستورەدا بکرێت کە ماوەی سەدەیەکە، تەواو نەفی هەر گەلێکی جیاواز لەگەلی تورکیا دەکات بێجگە لە مرۆڤی تورک نەبێت. بۆیە ئەم قۆناغە، قۆناغێکی هەستیارەو، بارودۆخێک خودی دەوڵەتی قەیران گرتوی تورکیاو ئەو ئامانجانەی خودی ئەردۆغان لە بەرانبەر ڕکابەرەکانی وەک جەهەپەو مەهەپەو حزبە جۆراوجۆرەکانی تر هەیەتی، ئەویش دەیەوێت، لەنێو ئەم پرۆسەیەدا کە تەواو ناڕونە دەیەوێت بگات بەمانەوەی لەسەر کورسی دەسەڵات. بێگومان، هەرچۆنێک لێکدانەوە بکەین بۆ سبەی ڕۆژ ئەو حزبەو خودی ئۆج ئالان وەک بڕیاردەری نێو ئەم پرۆسەی خۆهەڵوەشاندنەوەو خۆ دروست کردنەوەیەکی نوێیدا، هێشتا، گەر ئەو حزبە نەبێتە بەشێک لەنێو دنیای باوی نیولیبراڵیزمی سەرمایەداریدا، ئەوا، پێ ناچێت، بتوانین بڵێین، ئەو پرۆسەیە بەپێی ئامانجێک ئەو حزبە هەیەتی دەگاتە مەبەست. چونکە، دەوڵەتی تورکیا، نەجێی پێگەی دیموکراسی تێدا دەبێتەوە، وەنەجێگەی ژیانێکی بێ چەوساندنەوەی چینایەتیشی لەسایەی ئەو دەوڵەتە سەرمایەداریە بۆرژوا قەومی و دینیەیدا دەبێتەوە. جا ماوەتەوە سەر سبەی لەوەی ئاراستەی ئاڵوگۆڕەکان بەرەو کوێ هەنگاو دەنێن. چونکە، ناهاوسەنگیەکی زۆر لەنێو ئەم پرۆسە لێڵەدا بونی هەیە!
بۆپێشەوە: پەیامی ئۆجەلان بۆ هەڵوەشاندنەوەی پەکەکەو چەک دانان… بریارێکی دڵخوازانەو ئازادانەی ئۆجەلان و پەکەکەیە، یان ئۆجەلان لە ژێر گوشاری دەوڵەتی تورکیادا ناچار بەو بریارە کراوە؟ مەنسوری حیکمەت لە ساڵی ١٩٩٩ دا لە پەیوەند بە دەستگیرکردنی ئۆجەلان دەڵێت “کێشەی تورکیا پەکەکە نییە، ئەوە شۆڤێنیزمی تورکیایە کەهۆکار و ڕیشەی پرسی کوردە لەم وڵاتەدا. حکومەتی تورکیا بەتایبەت ئیمکانی هەیە ئۆجەلان ناچار بکات داوای تەسلیم بوونی ڕێکخراوەکەی بکات” لەو بارەیەوە دەڵێن چی؟
تاهیر حاجی حەسەن: نازانم، چونکە تا ئێستا ڕێگا نەدراوە تا ئەوەی ئۆج ئالان بە زیندوی بێتە سەر شاشەی تەلەفیزێۆن و باسی پرۆسەکە بکات، هێندەی ئەوەی تەنها لەڕێی شاندی دەم پارتیەوە یانی ئەو شاندە چەند کەسیەی کە سەردانی ئیمراڵیان کردوەو قسەوباسەکانیان گواستۆتەوە. بۆ نێو میدیاکان، بەکۆی گشتی پێ ناچێت، ئۆج ئالان لەژێر گوشاردا، ئەو بڕیارەی دابێت. چونکە لەنێو ئەو کۆ پەرتوکەی لە زیندانی ئیمراڵی نووسیونی، باسی جۆرێک لە پێکەوە ژیانی ناو کۆمەڵگەی تورکیا دەکات و وەک ئەڵتەرناتیڤێکیش کۆمەڵگەی خۆبەڕێوەبەری دیموکراسیانەی بەیان کردوە، بەڵام، هەرچۆنێک لێکی بدینەوە، ئاوا ئەڵتەرناتیڤێک لەنێو نەک دەوڵەتی تورکیا، بەڵکو لەنێو پێشکەوتوترین دەوڵەتانی جیهانیشدا جێی نابێتەوە، تەنها بەو هۆکارەی دنیای باو، دنیای سیستەمی چەوسێنەری سەرمایەداریەو کۆی شێوازێکی بەرهەمهێنان بونی هەیە، ئەویش دنیای کارو سەرمایەو چەوساندنەوەی چینایەتی و هەژمونی نێو یاسا کوێرەکانی بازاڕە، یانی هەژمونی دنیای نیولیبراڵیزمی سەرمایەداریە، بۆیە، ئەو ئەڵتەرناتیڤە، تەنها لەبونی بەرپاکردنی شۆڕشێکی کۆمەڵایەتیدا دەتوانێت بەکرداریانە جێبەجێ بکرێت، ئیتر لەوێدا، جیاوازی چینایەتی بونی نەماوە، بەڵام بۆ ئەمەی لەنێو دەوڵەتی باوی تورکیادا، کارێکی ئەستەمە. وەک ئەو ئاماژەی مەنصوری حیکمەت داویەتی لەکاتی خۆیدا واقعیەتی هەیە. دەوڵەت، پڕاوپڕ لە دنیا بینی شۆفێنیزمە، جا گەر ئەم پرۆسەیە سەر بگرێت و دان بنرێت بەبونی کۆمەڵگەی کوردی و لەنێو یاساو ڕێساکانی تورکیادا جێگیر بکرێت بەشێوەیەکی فەرمی، یانی لانی کەم هێندەی ئەو یاساو ڕێسایانەی لەنێو یاساکانی عێراقیشدا هەیە، بەڕای من، بەئەندازەی شۆڕشێکی گەورەیە لەو بارەیەوە. ئەم قۆناغە، قۆناغی دوای سەدەیەکە لەو دابەشکاریەی دەوڵەتانی زلهێزی ڕکابەری ئیمپراتۆریەتی بەریتانی و فەرەنسی لەنێو جەنگی یەکەمی جیهانەوە لەناوچەکەدا کردیان، ئێستا پێدەچێت، بەرژەوەندیەکانی دەوڵەتانی زلهێزی ڕکابەر، جارێکیتر دیزاینی ناوچەکە بکەنەوەو جەنگەکانیشیان هەر لەو پێناوەدایەو ئیشیان بەئەندازەیەکیش لابردنی کۆسپی بەردەم پرۆژەکانیانەو کوردیش و حزبە کوردیەکانیش، لەنێو ئەو دیزاینەدا جێگەو ڕێگەیەکیان پێ بدرێت، بەڵام، ئەم دیزاینەیان گەر سەر بگرێت، بەمانای ئەوە نایەت، لەبەرژەوەندی چینە چەوساوەکانی ناوچەکە بێت، هێندەی ئەوەی ئیشەکە لەسەر پاراستنی بەرژەوەندی کۆمپانیا زلهێزەکانی ناو دەوڵەتانی سەرمایەداریە. هەرچۆنێکیش بێت، کۆتایهێنان بەجەنگ، پێدەچێت، بەئەندازەیەکی باشیش لەبەرژەوەندی چین و توێژە چەوساوەکانی ناو تورکیا دەبێت، گەر ئەم پرۆسەیە بگاتە سەرکەوتن.
بۆپێشەوە: روداو و ئاڵوگۆرەکانی یەک ساڵی رابردوو لەوانە لاواز بوونی پیگەی ئیران و هیزە نیابەتیەکانی لە ناوچەکە، روخاندی رژێمی بەشار ئەسەد….تاد، چ کاریگەری و پەیوەندیەکی بەدۆخی ئێستا و لەسەر تورکیا و پرۆسەی ئاشتی هەیە؟
تاهیر حاجی حەسەن: بێگومان،7 ی ئۆکتۆبەری دوو هەزارو بیستوسێ، قۆناغی وەرچەرخانە لەناوچەکەدا. ئەو جەنگەی حەماس و حزبوڵای سەر بەئێران پێی هەستان لەهێرش کردنە سەر ئاهەنگێک لە ئیسرائیل، بۆ دەوڵەتی ئیسرائیل وەک گەورەترین پاداشت بووە. چونکە، ئیتر پاساوی داوە بەدەوڵەتی ئیسرائیل تا بە هێرشە بەرفراوانە کاولکاریەکەی هەستێت و دەست ببات بۆ پرۆژەی ئیبراهیمی، ئەو ناوچەیە، تا دەگات بەسوریاو باکورو عێراق و پڕ لەسامانی جۆراوجۆرن. ڕێگەدان بە بەشار ئەسەدی دیکتاتۆری بچوک، تا لە ساڵی دوو هەزارو یازدەدا، ڕەشەکوژی خەڵکی زەحمەتکێشی ڕاپەڕیوی سوریا بکات، بێگومان، گڵۆپی سەوز هەڵکردن بۆی لەلایەن خودی دەوڵەتانی وەک ئەمریکاو ڕوسیاو هاوپەیمانەکانیانەوە بوە، تا ئەوەی هەرچی بۆیان دەکرێت مەدی شۆڕشگێڕێتیەکەی جەماوەری خۆ سەری ناڕێکخراو تێک بشکێنن، وەک بینیمان تێکیشیان شکاند، لەڕێی گروپە دڕندە تیرۆریستیە ئیسلامیەکانی سەر بەدەوڵتی تورکیاو دواتریش دروست کردنی داعش، گەیاندنی پەیامی دڕندانەی ئەو زلهێزانەی سەرمایە بو بۆ زۆرینە زەحمەتکێشەکان لەناوچەکەو سوریایش بەتایبەتی. ڕوخانی دەوڵەتی بەشار ئەسەدیش لە سیناریۆیەک زیاتر هیچیتر نەبوە. چونکە، کۆی ڕکابەریەک لەنێوان زلهێزانی وەک ئەمریکاو هاوپەیمانەکانی و دەوڵەتانی وەک چین و ڕوسیادا هەیە، لە ئۆکراینەوە تا دەگات بەکۆی ڕێگای ئاوریشمین و ڕێگای ئیبراهیمی و ناوچەکەو سوریاو تورکیاو ئێرانیش تا یەمەن و غەززەو، پەیوەستن بەیەکەوە. ئەم قۆناغەی نێو پرۆسەی ئاشتیش دابڕاو نییە لەو بارودۆخەی لق و پەلەکانی دەوڵەتی ئێران لەناوچەکە، بەدەستی دەوڵەتی ئیسرائیل شەکەت کران، بەڵام پێناچێت، دەوڵەتانی زلهێز بخوازن دەوڵەتی تورکیا بکەوێتە ناو ئاوا جەنگێکەوە، هێندەی دەیانەوێت، دەوڵەتی تورکیا، بەپێی ئەو سنورانەی بۆیان داناوە، پەلکێشی زیاتر نەکات. چونکە دەوڵەتی تورکیا، ئەندامە لەنێو دەوڵەتانی ناتۆدا.
بۆپێشەوە: تا چەندە لاتان وایە، دەوڵەتی تورکیا بەکردەوە هەنگاو بۆ ئاشتی دەنێت و وەڵامی ئەرێنی بە هەنگاوەکانی پەکەکە دەداتەوە؟
تاهیر حاجی حەسەن: ڕاستی دەوڵەتی تورکیا، هیچکات جێی متمانە نییە، مەگەر لەلێواری مەرگیدا بێت، ئیستایش پێدەچێت، زۆر لایەن لەناو دەوڵەتدا دژ بەپرۆسەی ئاشتی ڕاستەقینە بن. چونکە گەر ئەو پرۆسەیە سەر بگرێت، لەواقعدا، دەبێت ئەو دەوڵەتە لەزۆر ڕویەوە هەڵبوەشێتەوە. یانی دەبێت ئاڵوگۆڕێکی گەورەیش لەنێو پەروەردەی شۆفێنیستیەکەیدا بێنێتە گۆڕین و هەنگاو بنێت بۆ بنیاتنانی سڕینەوەی کۆی پێگە شۆفێنیستی و پێگە ڕاسیستیەکەی. ئاخۆ دەوڵەتی تورکیا ئامادەیە دەست بۆ وەها ئاوگۆڕێکی ڕیشەییانە بەرێت؟ ڕەنگە ڕۆژگاری ئاینندە وەڵامی ئەرێنی یان نەرێنی بەم پرسیارەم بداتەوە. ماوەتەوە، سەر ئەو پێویستیانەی گەر ئەم پرۆسەیە سەر نەگرێت، ئەو دەوڵەتە بەرەو کام ڕێگا مل دەنێت، لە کاتێکدا لەناو خۆیدا پڕ لە قەیران و پڕ لە ناڕەزایەتییە جەماوەریەکانە، بێگومان دەبێت ئەو خاڵەش لە یاد نەکەین، لەم نێوەدا دەورو نەخشی بزوتنەوەی کرێکاری تورکیا لەم بارەوە چۆن دەبێت. ئاخۆ ئەوانیش ئامادەن ببنە بەشێک لە سەرخستنی ئەم پرۆسەیە؟ لەکاتێکدا گەر ئەو کەشی جەنگ و بەناو تیرۆرە بەکۆتای بگات، لەکۆی گشتیدا دەبێتە دەرفەتێک بۆ خۆڕێکخستنێکی زیاتری چینی کرێکارو بزوتنەوەی سۆسیالیستی لەو وڵاتەدا. من وای دەبینم، پێدەچێت کۆی پێویستیەکانی دەوڵەتی ئەمریکاو خودی دەوڵەتی ئیسرائیلیش لە ساتێکدایە، پێدەچێت پێویستیان بەسەرخستنی ئەو پرۆسەیە هەبێت، تا لەوێیشەوە ڕێگەچارەیەکی گونجاو بۆ قەیرانی سوریاو جێگەو ڕێگەی دەوڵەتی تورکیایش دیاری بکەن، بەڵام هێشتا وەڵامێکی ڕون بۆ ئایندەی ئەم پرۆسەیە نابینرێت، مەگەر فاڵی بۆ بگیرێتەوە!
بۆپێشەوە: داننانی دەوڵەتی تورکیا بە بوونی کورد و بانگەوازی بۆ ئاشتی بەتایبەت لە زمانی نەتەوە پەرستەکانی تورکیادا، هۆکارەکەی چییە و چەند ئامانج لە داننان بە بوونی کورد و بانگەواز بۆ ئاشتی، پەیوەندی بە چارەسەری پرسی کوردەوە هەیە لە تورکیا؟
تاهیر حاجی حەسەن: وەک لەوەڵامی پرسیاری پێشوتریشدا وەڵامم داوەتەوە، قۆناغەکە هەستیارە، بەپێی ئەو ئاڵوگۆڕانەی لە ئایندەدا لەناوچەکەدا بەپێی بەرژەوەندیەکانی زلهێزان جێ کەوتە دەبن. کۆی مێژووی دەوڵەتی تورکیاو کۆی دەوڵەتانی ناوچەکە، هەمیشە بەپێی بەرژەوەندیەکانی زلهێزان ئاڵوگۆڕیان پێ کراوە، نەک بەپێی پێویستیەکانی ژیانی کۆمەڵگەکان، بۆیەشە، ئەم پرۆسەیەش بە سەرکەوتنی یان شکستی، دیسانەوە دابڕاو نییە لەنێو ئەو جیهانبینیەی پێداویستیەکانی دنیای سەرمایە دەیخوازێت لەنێوەندی دەوڵەتە ڕکابەرەکاندا. خاڵی گرنگیش بۆ دەوڵەتانی زلهێزو ئیسرائیلیش ئەوەیە، کە دەوڵەتی ئێران و دەوڵەتی تورکیا، ڕێگەیان پێ نەدرێت بەرەو توانای زلهێز بونی بڕۆن، بۆیەشە پێداویستیەکانیان وا دەکات، دەوڵەتەکانیان بڕوخێنن، یان نینۆکیان بۆ ببڕن!
بۆپێشەوە: ڕیکەوتنی دەوڵەتی تورکیا و پەکەکە تا چەندە دەتوانێت رۆڵی هەبێت لە چارسەری پرسی کورد لە تورکیا؟
بەتاهیر حاجی حەسەن: بەدڵنیای گەر ئەو پرۆسەیە بتوانێت ببێتە پرسێکی ڕۆژ لەنێو نەتەوە یەکگرتوەکاندا، ئەوا، گەر بخوازن دەشتوانن ئەو پرسە وەک مێژووی ڕابردوی ناو وڵاتانی ناوچەکە چارەسەر بکەن بەپێی بەرژەوەندیەکانی دنیای سەرمایە، جا بەشێوازی فیدراڵی بێت یان تا بگات بەوەی دەوڵەتی کوردیش دروست بکەن لە تورکیاو سێ بەشەکەی تریشدا. وەک ئامانجی گشتی کۆمەڵگەش، کۆتایهێنان بەجەنگ و کوشتار، دەرفەتێک دەدات تا هیچ نەبێت کۆمەڵگە هەناسەیەکی جیاوازتر بدات، دنیای سەرمایەداری لەم سەدە پڕ لە تەکنەلۆژیاو کاڵاو داهێنانە زۆرەکانیاندا، هیچکات گەرەنتی دنیایەکی هاوسەنگ و بێ جەنگ تێیدا جێگای نابێتەوە، بۆیەشە، نازانرێت پرۆژە شاراوەکانیان بەکوێ دەگات. چارەسەری ڕیشەییانە بۆ کۆتایهێنان بەستەمی قەومی و دینیش، پەیوەستە بە بەرپاکردنی شۆڕشی کۆمەڵایەتی چینی کرێکارەوە، نەک هەر لەتورکیاو ناوچەکەیش، بەڵکو لە گشت جیهاندا، گەرنا، ڕاستی دەبێت بازاڕ بڕیار بدات کێ دەمێنێت و کێ کۆتای پێ دەهێنرێت!
بۆپێشەوە: چەکدانان و خۆ هەڵوەشاندنەوەی پەکەکە چ کاریگەریەکی لەسەر حزبەکانی بزوتنەوەی کوردایەتی لە بەشەکانی تری کوردستاندا دەبێت؟ بەتایبەتیش لەسەر هەسەدە و دەسەڵاتی خۆجێیەکەی دەبێت؟
تاهیر حاجی حەسەن: ئەم پرۆسەیە، پرۆسەیەکی دور مەودایە، دواتر ئەمە چەک دانان و گەڕانەوە بۆ ماڵەوە نییە. چونکە ئەو بەرەیەی پەیوەستە بە پەکەکەوە، خۆیان بونەتە جۆرێک لە سیستەم و خاوەن ئەڵتەرناتیڤ، ماوەتەوە سەر سبەی ڕۆژ لەوەی لەناو ئیدارەدانی کۆمەڵگەدا چۆن ڕێکخستنی خۆیان و کۆمەڵگەش درێژە پێ دەدەن. ئەمانە، لەنێو شەڕێکی بێ کۆتایدا دەبن لە بەرانبەر دەوڵەت و دنیای باودا، جا ئەوەی چەند دەتوانن لەوێیشدا کار بۆ ئاڵوگۆڕی ڕیشەییانە بکەن، ئەوەیش دیسان ناڕونە، گەر وایش نەکەن، ئەوا دەبنە بەشێک لە دەوڵەت و کۆتای بەکۆی مێژوو وە ئەو ئەڵتەرناتیڤەشیان دەهێنن کە نیو سەدەیە ئیشی لەسەر دەکەن.!