پرسی رۆژ: چی لەپشت بڕیاری چۆڵکردنی ئۆردوگاکانی ئۆپۆزسیۆنی ئێرانیدایە؟ بەڕێز عەلی مەحمود وەڵامی داوەتەوە 

لەرێی دەزگای ئاسایشی هەرێمی کوردستانەوە، پەیامی ی.ن.ک گەیەندراوەتە ٣ هێزی سیاسی ئێرانی (کۆمەڵە- رێکخراوی کوردستانی حیزبی کۆمۆنیستی ئێران، کۆمەڵەی شۆڕشگێڕی زەحمەتکێشانی کوردستانی ئێران، و کۆمەڵەی زەحمەت کێشانی کوردستان ) بۆچۆڵکردنی ئۆردوگای نیشتەجێبوونی ئەو هێزە لە زڕگوێز وزڕگوێزەڵە بۆشوێنێکی دیکە کە تا ئێستا دیارنییە. شایانی باسە بەپێی رێککەوتنی ئەمنی نێوان عێراق-ئێران پێویستە کۆمەڵەکان لەیەک جێگە نیشتەجێبکرێن، و ناوی ناوچەی سورداش وعەربەت هاتووە. جێی ئاماژەیە بەدوای سەردانی سەرۆکی هەرێمی کوردستان (نێچیروان بارزانی) بۆئێران وسەردانی وەزیری دەرەوەی ئێران بۆهەرێم، فشارەکان چڕتربوونەتەوە.

بەپێی راگەیاندنی ئەوهێزانە، ئەو ئۆردوگایانە لەئێستادا تەنیا خێزان وکەسانی نەخۆش وپەککەوتەی ئەو هێزانەی تێدا دەژین. بەپێی رێکەوتنێکی پێشووترەوە لەگەڵ دەسەڵاتدارانی هەرێم، هێزی پێشمەرگەی ئەو لایەنانە لەشوێنی دیکەدان ودوورن لەسنوورەکانی ئێران، هەروەها بڕیاریانداوە تەنیا خەباتی سیاسی و رێکخستنی ناوشارەکان ئەنجامبدەن.

بەڕای ئێوە؛ پلانی پشتی ئەم هەنگاوە بۆچۆڵکردنی ئەو ئۆردوگایانە چییە لەلایەن کۆماری ئیسلامی ئێران؟

ئایا ئەو کارە کردەنیە؟ وە ئەگەر جێبەجێبکرێت لێکەوتە سیاسی ومرۆیی وکۆمەڵایەتیەکانی چی دەبن بەسەر ئەو هێزانە پەیوەندیان لەگەڵ هەرێمی کوردستان؟

بەڕێز (عەلی مەحمود) چالاکوانی سیاسی وەڵامی ئەم پرسەی داوینەتەوە.

عەلی مەحمود:

لە كاتێكدا كۆماری ئیسلامی ئێران فشار دەكات بۆ دەركردنی كۆمەڵەكان و دیموكرات و لایەنەكانی دیكەی رۆژهەڵات لە كامپەكانیان، كە بەشی زۆری دانیشتوانیان خەڵكی سڤیل و ژن و منداڵ و پیرو كەم ئەندامانن, وە چالاكی سەربازییان راگیراوە, لە هەمان كاتدا دەنگۆی هێنانی سەركردایەتی حەماس هەیە لە لایەن ئێرانەوە بۆ شاری بەغدا. ئەوەی جێگای سەرنج بوو هەواڵەكە لە هەمان رۆژدا بڵاو بوەوە رۆژی گیانبەختكردنی خانەی موعینی بوو لە رێكەوتی ٢١/٦/١٩٧٨ لە گوندی دڕەی نزیك شاری ماوەت. ئامانج لەم هەنگاوە ترسە لە هەڵچوونی جەماوەری خەڵک لە داهاتوو، رێگا خۆشكردنە بۆ تیرۆركردنیان وەك لە رابردوودا زیاتر لە ٤٠٠ كەسیان تیرۆر كرا. ئامانجێکی دیکە چەككرنی یەكجارەكی ئەو هێزانەی ئۆپۆزسیۆنە کە چەکدار وهێزی چەکداریان هەیە. واتا لە بێ كاریگەرییكردنەوە بۆ چەك كردنیان، وە كردنیانە لە هێزی سیاسییەوە بۆ پەنابەر، بەشێوەیەکی گشتی، واتا داماڵینی بەرگی سیاسییە لێیان. لە تەقسیماتی هەرێمی كوردستاندا (مەبەست دووهێزە سەرەکیەکەی هەرێمی کوردستانە لەیەکێتی وپارتی) سلێمانی بەر ئێران كەوتووە، بۆیە ئێران دەیەوێت كۆتایی بەم دومەڵە بهێنێت کە لە ناوچەكانی  سنووری ئەو نزیکن.  ینك یش دەیەوێت كۆتایی بەم بارە گرانە بهێنێت كە میراتی پەیوەندییەكانی شاخ وهاوپەیمانییە سیاسی وئایدۆلۆجییەكانی رابردووە.

******