خەسرەو سایە: بەبروای من لەکوردستان بزوتنەوەیەکی چینایەتی لەدژی دەسەڵاتی ئەحزابی بۆرژوازی کورد بۆ موچەو نان و مەعیشەت لەئارادایە… دیمانەی بۆپێشەوە لەگەڵ هاوڕێ خەسرەو سایە، سەرۆکی مەکتەبی سیاسی حزبی کۆمۆنیستی کرێکاریی کوردستان، سەبارەت بە گوشارەکانی بەغدا بۆسەر هەرێم و ئایندەی سیاسی کوردستان”
بەشی یەکەم
بۆپێشەوە: بڕیار و گوشارەکانی بەغدا لە دوای شەڕی داعش و ١٦ ئۆکتۆبەرەوە بۆسەر دەسەڵاتی هەرێم، بەردەوامە، هۆکاری سەرەکی ئەم گوشارانە چییە؟
خەسرەو سایە؛ هۆکاری ئەو گوشارانەی کەبەغدا لەدوای شەڕی داعشەوە بۆسەر هەرێم دەستی پێکردوە، ئەو ئاڵوگۆڕەیە کەلەهاوکێشەی هێزی نیوان حیزبە دەسەلاتدارەکانی کوردستان و لایەنە شیعی وسونی و دەستەو تاقمە میلیشیایەکانیاندا پێکهاتووە. بەواتایەکی تر ڕووداوەکانی ١٦ی ئۆکتۆبەر و دەرپەراندنی هێزەکانی ئەحزابی ناسیونالیستی کورد لەکەرکوک و ناوچە جێناکۆکەکان خۆی سەرەتایەک بوو لەلایەک بۆ بەستنی دەرگا لەبەردەم ئابوری سەربەخۆ و دەرهێنان و ناردنە دەرەوەی نەوت و دەستبردن بۆ ڕیفراندۆم و هەموو ئەو پێ لێراکێشانەی کەپارتی و لایەنە هاوئاوازەکانی لەراستای فراوانکردنەوەی قەڵەمڕەوی دەسەڵات و بازاڕی ئابوری بۆرژوازی کورد وەک ستراتیژێک لەژێر ناوی “کوردستانێکی بەهێز”دا بانگەشەیان بۆدەکرد، وە لەلایەکیتریشەوە نیشانەیەک بوو لەگۆرانی ئەو هاوکێشەیەی کەلەنێوان ناسیونالیزمی کوردو لایەنە عێراقیەکاندا، لەژێر سایەی ڕۆڵی ئەمریکا بەدوای جەنگی دووەمی کەنداو و روخانی ڕژێمی بەعسدا لەسالی ٢٠٠٣ دا هاتەکایەوەو لەچوارچێوەی دەستورێکدا جێگیر کرا. بێگومان سەرهەڵدانی ئەم هاوکێشە تازەیە کەبەدوای کۆتایی شەڕی داعشدا سەری هەڵداوە، لەگۆشەیەکی سەرەکیدا بەرئەنجامی ڕۆڵی ئەمریکاو ئێرانە لەعێراقدا، کەلەبەرتیشکی ناکۆکی و کێشمەکێشی هێزە جیهانی و ناوچەیەکاندا، هەردوولایانی بەهاوڕایی لەسەر ئیستقرار پێکردنی دۆخی عێراق و سازدانەوەی دەوڵەتێک کەبتوانێ ئارامی لەبەردەم سەرمایەو کۆمپانیا جیهانی و ناوخۆییەکان دابنێ گەیاندووە. لەجەرگەی ئەم دۆخەشدا، لایەنە عیراقیەکان و حکومەتی عێراقی بەوە گەیاندووە کەدەسەڵات مەرکەزی بکەنەوەو وردە وردە هەم ئەو دەسەڵاتەی کەناویان ناوە “قەوارەیەی هەرێم”، بچوک و لاواز بکاتەوە بۆسەر ئاستی هەرپارێزگایەکی تری عێراق و هەم ئەو ئیمتیازاتانەی کە حیزبە بۆرژوا ناسیونالیستەکان پێشوتر پێیان درابوو، وەری بگرنەوە. فشارەکانی دادگای عێراق بۆسەرهەرێم، تا لەدەست دەرهێنانی گومرگ و خاڵە سنورییەکان ومەلەفی نەوت، تا کێشە لەسەر نەوت و بودجە و دەیان بابەتی تر هەمویان ڕەنگدانەوەی ئەو گۆرانکاریانەن کە لەهاوکێشەی هێزی نیوان بەغداو حیزبە ناسیونالیستەکانی کوردو دەسەڵاتەکەیاندا ڕویانداوە.
بۆپێشەوە: گوشارە بەرەوامەکانی بەغدا بۆسەر هەرێم، بەرهەمی پابەندبوونی دەسەڵاتی ناوەندە بە فیدرالیزم و دەستورەوە، لە هاوسەنگی تازەی نێوان بەغداو هەرێمدا، یان وەکو هەندێک دەڵێن پاشگەزبوونەوەی بەغدایە لە فیدرالیزم و دەستور؟
خەسرەوسایە: وەک وتم گوشارەکان بەرئەنجامی ئەو گورانکاریەیە کە لە هێز هاوسەنگی نێوان بەغداو هەرێم و ڕۆڵی ئەمریکاو ئێراندایە لەعیراق و ناوچەکەدا سەری هەڵداوە. بەم جۆرەش بابەتەکە وا نییە کەبەغدا لە دەستورو فیدڕاڵیزم پاشگەزبۆتەوە. تەنانەت دەستورو فیدرالیزمێک کەوەک ڕێگاچارەیەکی ئەمریکایی بۆ کێشەی کورد لەعیراقد کەبەرگی دیموکراسی کردنی عێراقی بەبەردا کرا، خۆی حکومەت و دەسەلاتێکی لەسەر بنەمای بەش بەشێنەی قەومی و ئاینی و تایفەگەری و هێزە میلیشیایەکانیانی هێنایە کایەوە، کەهێندە فشۆڵ و لەرزۆک بێت نەتوانێ خۆی لەبەردەم بچوکترین گۆرانکاریدا بگرێت. بەواتایەکیتر ئەگەر لەئەزمونی دەولەتانی فیدڕالکراوی وەک یوگوسلافیا و یەکیەتی سۆڤێت وچیکۆسلۆفاکیا وگەلی ولاتی تردا زیاتر لەپەنجا وبۆ ٧٠ و٨٠ ساڵی خایاندبێت، بەلام سەرەنجام ڕوداوە جیهانی و ناوچەییەکان ئاڵوگۆڕی لەهاوکێشەی هێزدا پێکهێناوەو بەرەو هەڵوەشانەوە چووە، لەمەشدا مەسەلەکە پەشیمان بوونەوەی هێچ لایەنێک نییە. لەعێراقدا، دەستورو فیدرالیزم کاتێک پێکهات کە حکومەتی عێراق ڕوخاو هیزەکانی ناسیونالیزمی کورد لەژێڕ چەتری داگیرکاری ئەمریکا و تەواجودی لەعێراقدا، لەگەڵ لایەنە قەومی و ئاینی و تایفەگەرییەکاندا کەوتنە هاوکێشەیەکی سیاسیەوە و حکومەتی عێراقی فیدرالیان پێکهێنا و کورسیەکانی دەسەڵاتیان دابەش کرد، کاتێک ئەم هاوکێشەیە بەزەرەری ئەحزابی ناسیونالیزمی کورد گۆڕدرا، ئەوە حکومەتی مەرکەزی و لایەنە عیراقیەکانە بۆ مەرکەزی کردنەوەی دەسەڵاتیان گوشارەکانیان توندکردۆتەوە.
بۆپێشەوە: گوشارەکانی بەغدا تا چەندە کەرکوک و ناوچە کیشە لەسەرەکانی گرتۆتەوە؟ زۆرجار گوێ بیستی سیاسەتی راگواستن و تەعریب دەبین، ئەمە تا چەندە راستە؟
خەسرەوسایە: ئەگەر ئەوە قەبوڵ بکەین کەگۆڕانکاری لەهاوکێشەی هێزدا روویداوە، ئەوا گوشارەکانی بەغدا نەک هەر کەرکوک و ناوچە کێشە لەسەرەکانی گرتۆتەوە، بگرە ناکۆکی و کێشەو ململانێی نێوان ئەحزابی دەسەڵاتدار لەگەڵ دەوڵەتی مەرکەزیدا، هەموو بابەتێکی نێوانیان دەگرێتەوەو دوریش نییە لەدەوریەکدا بەشەڕ و پەلامارداندا بکەوێتەوە. بابەتی تەعریب و راگواستنیش بەتایبەتی لەکەرکوک و ناوچەکانی دەوربەری هەرلەم چوارچێوەیەدایە. خودی دانانی پارێزگارێکی فاشیستی وەک راکان جەبوری بەوەکالەت، بۆکەرکوک کەهەموو بڕیار و هەنگاوێکی بەنەعرەتەی قەومی لەدژی ناوچە کوردنشین و تورکمانەکانە، هاوکات خودی دەرکێشانی کەرکوک لەبازنەی هەڵبژاردنەکانی پێشوو خۆی بەڵگەیەکە بۆئەوەی کەحکومەتی عیراقی بۆ زاڵکردنی دەسەڵاتەکانی بەسەر ناوچە کوردنیشنەکاندا، پشتی بەدنەدان و جیاکاری قەومی بەستوە.
بۆپێشەوە: ئایا هەنگاوەکانی بەغدا لەدژی هەرێم و سیاسەتی خۆگرێدانەوەی پارتی و یەکێتی بە بەغدا، بەمانای تێکەڵ بوونەوەی بەکردەوەی کوردستانە بەعێراقەوە؟
خەسرەو سایە: ئەوە راستە کە بەغدا هەنگاوەکانی لەدژی هەرێم ڕووی لەمەرکەزی کردنەوەی دەسەڵاتە لەعیراقدا، هەروەها ئەوەش راستە کەپارتی و یەکێتی وحیزبە ئۆپۆزسیۆنەکانی تریش لەهەوڵی تەسلیم بون و گەرانەوەدان بۆ بەغدا، بەلام ئەمە بەمانای تێکەڵ بونەوەی کوردستان نایەت بەعێراقەوە، بەتایبەتی کە ئەگەر مانای “تێکەڵبوونەوە- اندماج” لەڕوانگەی خەڵکەوە وەربگرین. ئەوەی روودەدات زیاتر لکاندنەوەی بەزۆرەو لەسەرو و رای خەڵکی کوردستان و عێراقەوەیە و بەرهەمی فەشەل و بنبەستی ئەو فیدرالیزمەیە کەکوردستانی “ئیلحاق” کردەوە بەعیراقەوە، بەبێ ئەوەی پرس و ڕا بەخەڵکەکی بکرێت. بەبروای من تێکەڵکردنەوەی کوردستان بەعیراقەوە، بە دوای پڕکردنەوەی ئەو قڵشتەدا دێت کەلەلایەن ئەحزابەکانی بزوتنەوەی کوردایەتی و حکومەتە یەک لەدوایەکەکانی عیراقەوە، وەک بەرئەنجامێک لەشەڕی قەومی چەندین ساڵەی نێوانیاندا پێکهات و خەڵکی کوردستانی وەک دوژمنی خەڵکی شارەکانی عێراق وێنا کرد. ئەمەش کاتێک بەدی دێت، کەلەلایەک دەولەتێک لەعیراق دروست بێت کە هیچ ناسنامەیەکی قەومی و دینی نەبێ و دەسەڵاتێکی سکولار بێ ومافی هاولاتیان بەیەکسانی و لەدەرەوەی ناسنامە قەومیەکان بەرەسمی بۆ هەموو هاولاتیانی کوردستان و عیراق بەڕەسمی بناسێنێ، لەلایەکی ترەوە، ئەم قڵشتە کاتێک پڕ دەبێتەوە کە بزوتنەوەیەکی شۆڕشگێرانەی چینایەتی هاوبەش ڵەعیراق و کوردستاندا لەدژی ناسیونالیزم و قەومپەرستی پێ بنێتە مەیدانەوەو دەستی کرێکاران و زەحمەتکێشان هەم لەکوردستان و هەم لەشارەکانی عیراق بخاتە نێو دەستی یەکترەوەو لەسەر بەرژەوەندی وچارەنوسی هاوبەشیان لەمەیداندا ڕایان بگرێ. بەپێچەوانەی ئەم حاڵەتانەوە، نەحکومەتی عیراقی دەتوانێ خەڵکی کوردستان تێکەڵ بەدەسەڵاتەکەی خۆی بکاتەوە و نە ئەحزابی ناسیونالیستی کورد دەتوانێ ئەم “تێکەڵ بونەوەیە” لەڕیگای دانەواندنی سەری تەسلیم بۆ لایەنە عیراقیەکان، جێبەجی بکات، بگرە هەردوولایان، سود لەئایدیۆلۆژی ناسیونالیزم و قەومپەرستی وەردەگرن و هەردوولایان لەدژی “ژیانی پێکەوەیی” خەلکی کوردستان و عێراق کار دەکەن و هۆکاری ئەم بابەتەن. ڕوداوەکانی ئەم دوایانەی شاری کەرکوک بەڵگەیەکە بۆ ئەم قسانە.
بۆپێشەوە: گوشارەکانی بەغدا هەر لەدژی دەسەڵاتی سیاسی هەرێمە، یان لە دژی خەڵکی کوردستانیشە؟
خەسرەو سایە: بەبڕوای من کێشەمەکێشی نێوان بەغداو هەرێم کێشمەکێشی نیوان دوباڵ ولایەنی بۆرژوازیەو هەریەکەیان دەیەوێت مەرجەکانی خۆی بەسەر ئەوی تردا بسەپێنێ. بێگومان لەم حالەتەشدا هەردولا دەیەوێت شەڕو کێشەی نێوانیان بەشەری بەرژەوەندییەکانی خەڵک ناوزەد بکەن و بیبەنە پێشەوە، ئەحزابی بۆرژوازی کورد دەڵێت مافەکانی “گەلی کورد لەدەستوردا جێگیر کراوەو ئێمە شەری دەستور دەکەین”!. لایەنە عێراقیەکانیش دەڵێن دەستور “یەکپارچەیی خاکی عیراق”ی سەلماندوە و ئەمە خەتی سورە! و ئێمە بەرگری لێ دەکەین. بەم جۆرە هەردوولا هەوڵدەدەن شەرو ناکۆکیەکانی نێوانیان بکەنە شەری نێوان خەڵکی کوردستان و شارەکانی عیراق، بەبێ ئەوەی ئەوان ئاگادار بن و شەڕو کێشەی ئەوان بێت. کەدیارە حاڵەتێکی ئاواش لەدژیان دەبێت. واتە گوشارەکانی بەغدا بۆسەر هەرێم لەئەبعادی خۆیدا پریشکەکانی خەڵکی کوردستانیش دەگریتەوە.
بۆپێشەوە: بەشیک لەخەڵکی کوردستان بەتایبەتی موچەخۆران، دەیانەوێت بەغدا موچەیان بداتێ و لە ژێر دەسەڵاتی هەرێم نەمێنن، چەندین فراکسیۆنیش لەوانە یەکێتی و نەوەی نوێ و یەکگرتوو، کۆمەڵی دادگەری داوایان لە پەرلەمانی عێراق کردووە، کە بەغدا راستەوخۆ بە میکانیزمێکی یاسایی موچەی فەرمانبەرانی کوردستان بدات، سەرەتا بڕیاری ئەم چەند فراکسیۆنە چۆن دەبینن؟ هەروەها ئایا ئەوە کێشەی موچە چارەسەر دەکات”؟
خەسرەوسایە: بەبروای من پێناچیت ئەم پڕۆژەیە سەر بگرێت، چونکە کێشەی موچە و ئەوەی پێی دەڵێن شایستە داراییەکانی هەرێم، کێشەیەکی سیاسیە و دەکەوێتە چوارچێوەی ئەو ململانێ و ناکۆکییە سیاسیانەوە کە لەقەیرانی پەیوەندیەکانی نێوان هەرێم و بەغدادا سەری هەڵداوە و دەبێ لەبەر ڕۆشنایی ئەو گۆرانکارییەی لەهاوکێشەی هێزەکاندا، کەئاماژەمان بۆکرد، پێناسە بکرێتەوە. من لەگفتوگۆیەکی تردا ئاماژەم بەوەکردوە کەحکومەتی عیراق و لایەنە عێراقیەکان بەمەبەستی داسەپاندنی مەرجەکانی خۆیان بەسەر پارتی و حزبەکانی دەسەڵاتدا، کێشە لەسەر موچەو بەشە بودجەی هەرێم دروست دەکەن تا مەرجەکانی خۆیان لەیاسای نەوت و گازدا، کەبڕیارە ببرێتە پەرلەمانی عیراقەوە، بەسەر هەرێمدا بسەپێنن و بەتەواوی نەوت و گاز لەدەست حکومەتی هەرێم دەرکێشن. هەربۆیە مەسەلەی موچەی فەرمانبەرانی هەرێم کێشەیەکی قانونی و دەستوری نییە، بەتایبەتی کەخودی قانونەکان و دەستوری عیراقیش لەبەردەم هەموارکردنەوەو گۆرانکاریدایە، لەچوارچێوەی هێز و هاوسانگی تازەی نێوان حزبەکانی کوردستان و لایەنە عیراقیەکاندا. ئەگەر ئەو لایەنانەی کەئێوە ئاماژەتان پێکردوە بۆ پڕۆژەکەیان باس لەدەستور و یاسای عیراقی دەکەن، ئەوا نوێنەری پارتیش لەلیژنەی دارایی پەرلەمانی عێراقدا، باس لەوە دەکات کەدەستورو یاسای عێراقی ڕیگە بەوە نادات کەحکومەتی هەرێم ڕاستەوخۆ بەکارتی ئەلکترۆنی موچەی فەرمانبەران بنێرێت. بۆیە کێشەی موچە وەک ناکۆکییەکی سیاسی لەنێوان حیزبەکاندا دەمێنێتەوە وچارەسەرکردنی سەختتر دەبێت.
تائەو جێگەیەی بەسەرنجی من لەسەر ئەم پڕۆژەیەی کەلایەنە ئۆپۆزسیۆنەکانی کوردستان لەبارەی موچەوە دەستیان بۆ بردوە خستنە ڕووی چەند راستیەک بەپێویست دەزانم:
١/ لەگەڵ ئەوەدا ئەم پڕۆژەیە لێکترازانی ڕیزی حزبەکان لەکوردستان وەک نیشانەیەک لەقەیرانی حکومەتی و فەشەلی سیستەم و دەسەلاتە هاوبەشەکەیان دەسەلمێنێ، هاوکات بەلگەی ئەوەشە کەئەو لایەنەنانەی ئیدعای ئۆپۆزسیۆن بوون دەکەن، لەهەمان ستراتیژ و چوارچێوەی سیاسی پارتیدا ماونەتەوە، ئەوانیش وەک پارتی سیاسەتی گەرانەوە بۆ بەغدا و درێژەدان بەهەمان ئەو سیستەم و دەسەلاتەی کەلەژێر ناوی دیموکراسی و پەرلەمان و دەنگدان، دەستەو تاقمی قەومی و ئاینی و تایفەگەری و هێزە میلیشیایەکانیان، کەسەراپا فاشیست و کۆنەپەرست و گەندەڵن، کۆکردۆتەوە، قبوڵکردوە. بەواتایەکیتر ئەم لایەنانە نایانەوێت شۆڕش بکەن و دەسەلاتی ئێستا بڕوخێنن، بەڵکو هەر دووقاچیان لەو چوارچێوەیەدا ماوەتەوە کە ئەویش ئیسلاحکردنی سیستەمی مەوجودە. ئەوەشی کە خۆیان بەموچەدا هەڵواسیوە بۆ ئەوەیە سواری خواستەکانی خەڵک ببن و لەهەڵبژاردنەکانی داهاتودا دەنگ بهێننەوەو کورسیەکانی پەرلەمان بەدەست بهێنن. ئەمەش لەسەر حسابی ئەوەی کە خەڵکی ناڕازی ڕووی خۆیان لەوخەبات و جولانەوە نارەزایەتییە کەیەخەی حزبەکانی دەسەلاتی گرتوە و سیستەمی ئێستای خستۆتە ژێر پرسیارەوە وەرگێڕن و بەدیار قەرارەکانی دادگای فیدراڵی و حوکمەتەکەی سودانیەوە چاوەروان بمێننەوە. لەکاتێکدا هەمووان ئەوە دەزانن کە حکومەتەکەی سودانی لەسەر گەندەڵی و تاڵانی و داسەپاندنی دەیان ستەم و زوڵم لەخەڵکی کرێکارو زەحمەتکێشی شارەکانی عیراق دامەزراوەو بەڕێوە دەچێت.
٢/ ئەوەی کەلەم پڕۆژەیەدا، نەوەی نوێ و کۆمەڵ و یەکگرتووی لەپاڵ یەکێتیدا کۆکردۆتەوە، و خۆیان وەک لایەنی ئۆپۆزسیۆن ناوزەدکردوە و گوایە خەمی موچەی فەرمانبەرانی کوردستان دەخۆن، خۆی لەخۆیدا کارەساتێکی سیاسی و قێزەونە. لەکاتێکدا یەکێتی یەکێکە لەحیزبەکانی ناوحکومەت و ناوچەیەکی بەدەستەوەیەو کۆنترۆڵی هەموو داهاتەکانی لەدەستدایە. هەڵوێستێکی ئاواش سەلـمینەری ئەو راستیەیە کەئەم لایەنانە لەجەوهەردا سیاسەتێکی جیاوازتریان نییە لەگەڵ یەکیەتی و پارتیدا و هەموویان ئەو ئەزمونە لەدەسەڵاتدارێتیان، قەبوڵکردوە کە ژیانی فەرمانبەران و خەڵکی هەژاری کوردستانی هاڕیوە.
٣/ بەدڵنیاییەوە نەدانی موچە کێشەیەکە، بەلام خۆ فەرمانبەرانی کوردستان هەرکێشەی موچەیان نییە، بێکاری و دانەمەزراندن، نەبونی خزمەتگوزارییەکان، پێشێلکردنی ئازادییەکان، کێشەی گرانی بازاڕ وسوتەمەنی ونەبونی دەرمان، تا ئەو هەموو باج و خەراجەی بەسەر خەڵکدا سەپێندراوە… ئەی ئەم لایەنانەی خۆیان خستۆتە خانەی ئۆپۆزسیۆنەوە لەسەر ئەم کێشانە چی دەکەن!. ئایا بۆ ئەمانەش خەڵکی کوردستان هەر دەبێ چاو لە حکومەتی عێراق بەکەن تا یاساو دەستوری عیراقی ڕیگەبدات، خەڵکی کوردستان لەنەهەماتیەکانی ئێستای دەرچێت؟. ئەمە ئەو ڕەوتە چاکسازیەیە کەنایەوێت خەڵک دەست بۆ شۆڕش و گۆرانکاری ڕیشەیی وشۆڕشگێرانە لەدژی دەسەڵاتی ئەحزابی بۆرژوازی کورد و سیستەمەکەی بەرێت و لەچاوەروانیدا بەدیار بەغداوە دای بنێت، کەدیارە بەتەحەمولکردنی دەیان ساڵی تری نەهامەتییەکانی ئێستا لەسەر شانی خەڵکی کوردستان، تەواو دەبێت.
بەبروای من لەکوردستان بزوتنەوەیەکی چینایەتی لەدژی دەسەڵاتی ئەحزابی بۆرژوازی کورد بۆ موچەو نان و مەعیشەت لەئارادایە و هەموو حیزبەکان بەئێمەشەوە لەهەوڵی ئەوەدایە بەسیاسەتەکانیان ڕەنگی بکەن و رابەریەکەی بگرنە دەست. حیزبەکانی دەسەلات دەیانەوێت بەناوی چاکسازی و “مستەحەقاتی دارایی و دەستوریەوە” لەبەغدای وەربگرن. لایەنە ئۆپۆزسیۆنەکانیش بەگەرانەوە بۆ بەغداو دادگای فیدڕاڵ وپەرلەمانی عێراقیەوە، واتە بەڕێگای قانونی ئەم بزوتنەوەیە بخەنە ژێر سێبەری سیاسەتەکانی خۆیانەوە، بۆ حیزبی ئێمەش مەسەلەی موچەو مەعیشەت و ئەو جولانەوە نارەزایەتیەی کە بۆ باشترکردنی دۆخی ژیان و کار بەڕێ کەوتووە، وەک بنەمایەکی کۆمەڵایەتی لەدژی دەسەڵات و هوشیارکردنەوەو ڕیکخراوبوونی خەڵكی ستەمدیدەی کوردستان سەرنج دەدەین تا هێزی ئەوە بەدەست بهێنێت کەکۆمەلگەی کوردستان بەرەو ئاڵۆگۆڕێکی ڕیشەیی و شۆڕشگێرانەی وابەرێت کەنەک دەسەلات و سیستمەی ئێستا هەڵوەشێنێتەوە، بەڵکو بەرێوەبردنی کۆمەلگە بەنوێنەران و حاکمیەتی جەماوەری بسپێرێت. لەسەرێکی تریشەوە ئەوە بڵێم لە کوردستان نەقسی سەرمایەو داهاتی نییە، حکومەتی هەرێم دەتوانێ بەو داهاتانەی کەلەدەست حیزبەکان و کۆمپانیاکاندایە، نەک هەر موچەی فەرمانبەران بدرێ، بەڵکو ئەگەر دەسەڵات لەدەست خەڵکدا بێت، دەکرێ لەڕیشەوە سیستمێک دامەزرێ کەنان و بژیوی و ژیانێکی باشتری پێ دابین بکرێ بۆ خەلك. بۆیە من پێموایە موچەخۆران و خەڵکی نارازی دەبێ یەخەی دەسەلاتداران هەم لەکوردستان و هەم لەعیراق بگرن و موچەو قوتی خۆیان لەبازنەی کێشمەکێشی حزبەکان چ لەکوردستان و چ لەعێراق دەرکێشن و بەدیار هەوڵی نەزۆکانەی ئەو لایەنانەوە دانەنیشن کەبەرواڵەت ئۆپۆزسیۆنن و لەپشتیشەوە خۆیان بەحکومەتەکەی سودانی و فاشیستگەلێکی وەک یوسف کیلابی و مالیکی و عامری وعەبادی وئەوانیترەوە گرێداوەتەوە…
ماویەتی