جوڵانەوەی شورایی ئاسۆیەکی چینایەتی تازە! … جوڵانەوە بۆ ئازادی و ژیانێکی باشتر بەردەوامە

جوڵانەوەی شورایی و شوراکانی کوردستانی عێراق، جوڵانەوەیەکی کۆمەڵایەتی تازە بوو کە لە پێداویستی و نیازی کۆمەڵایەتی و چینایەتی تازە و لەبوونی چینی کرێکارێکی شاری لە کوردستان و لە مەسەلەی تازە و پێویستی وەڵامی چینایەتی جیاواز بە مەسەلەکانی پەیوەست بە خەباتی لە پێناوی ژیانێکی ئازادتر و خۆشبەختتر، سەرچاوەی گرتبوو. بە مانایەک شورا و جوڵانەوەی شورایی پێویستییەکی ناچاری خەباتی چینایەتی و هەڵقوڵاوی نیازی چینی کرێکار و چینە بێبەشەکان بوو بۆ بە بەڕێوەبردنی ئیرادەی ڕاستەوخۆی خۆیان لە دیاریکردن و بە دەستەوەگرتنی چارەنوسی سیاسی خۆیان و کۆمەڵگە و بۆ دەرچوون لە سایەی نفوزی سیاسی جوڵانەوە سیاسیەکانی بۆرژوازی.

ئەو ڕۆژانە کە میللیگەرایی و ڕاستڕەوی سواری سینگی کۆمەڵگە ببوو و پیرۆزی چەک و پێشمەرگایەتی سایەوسێبەری کێشابوویە سەر هەموو شتێک و هەموو دەنگێکیتری خنکاندبوو، ئەم جوڵانەوە لاو و ڕادیکاڵە چینایەتیە کە خوازیاری عەدالەت و یەکسانی و ئازادی وخۆشبەختی بوو، پێست و چوارچێوەی وەڵام وسوننەتە سیاسیەکانی زاڵ و باوی چینەداراکانی کوردستانی شکاند و پیرۆزی چەک و پێشمەرگایەتی ومیللیگەرایی وەک پێوەری ئازادیخوازی خستەژێر پرسیار. لەجیاتی پێشمەرگەو چەک نیشتیمانپەرەستی و نەتەوە پەرەستی و ڕابەرانی بۆرژوا، ئاڵای گەڕانەوە بۆ ئیرادەی ئازاد و ڕێخکراوی جەماوەری کرێکاران و بێبەشانی بۆ بەدەستەوەگرتنی چارەنوسی خۆیان و بەدەستەوەگرتنی کۆمەڵگەی بەرزکردەوە. هەربەم هۆیە لە شارو گەڕەک و کۆڵان و ناوەندی کاردا چەکەرەی کرد و لە ئاستێکی کۆمەڵایەتی گەورەدا وەرگیرا و پێشوازی لێکرا. جوڵانەوەیەک کە لە دڵی کۆمەڵگەوە هاتبووە دەر و لە دڵی کۆمەڵگەوە، لە دڵی ڕەتکردنەوەی چەوسانەوەی چینایەتیەوە هاتبوو، بە بێ هیچ پێشینەیەک گۆڕا بە هێزێکی خۆشەویستی کۆمەڵگە. جوڵانەوەیەکی شورایی ڕادیکاڵ کە بۆخۆی لە بەشێکی گرنگیدا بەرهەمی بوونی چینی کرێکار و سەرمایەداری و شار و واقیعی خەباتی چینایەتی ناچاریی قوڵایی کۆمەڵگە بوو،  لەبەشێکی تریدا بەرهەمی سەرهەڵدانی  خەت و کۆمۆنیزمێکی ڕادیکاڵی کرێکاری و کۆمەڵایەتی بوو کە مانایەکی تازە و جیاوازی بە پرسی ئازادی و ڕزگاری مرۆڤی لە چەوسانەوە هێنابووە ناو خەباتی سیاسی و کۆمەڵایەتیەوە. جوڵانەوەیەک کە دەڵێ مێژووی واقیعی، مێژووی خەباتی چینایەتیە و ئەوە پراتیک و ئیرادەی  کۆمەڵایەتی و چینایەتی مرۆڤە کە مێژوو و کۆمەڵگە دەگۆڕێت. ئەوە بزوتنەوەی مرۆڤی چەوساوەی ئەم سەردەمە، چینی کرێکاری کرێگرتە لەدژی سەرمایە و کۆیلایەتی کاری کرێگرتەیە کە چارەنوسی ئاڵوگۆڕ بە قازانجی ئاڵۆگۆڕی ڕیشەیی، بە قازانجی ئازادی وخۆشبەختی هەموان دیاری دەکا. بزوتنەوەیەکی سیاسی و چینایەتی کە پێی وایە ئازادی و مەسەلەی خۆشبەختی پرسێکی  سۆفیانە و عیرفانی نییە، ئیرشاد و ڕێنوێنی و ڕۆشنگەرانە و فەلسەفی نییە. بەڵکو ساسی و واقعییە. بۆ ئەوەی مرۆڤ ئازاد بژی دەبێ دەست بۆ ڕیشەی ئەو شێوە چەوسانەوەیە بەرێ کە ڕێگری لە خۆشبەختی و ئازادی ژیانی مرۆڤ دەکا و بۆ ئەوەی ئەو کارە بکا ناچارە بە شێوەی سیاسی و لە خەباتێکی سیاسی و جیددی لە ئاستی کۆمەڵایەتیدا، دەوڵەت و دەسەڵات و سەرەنجام کۆمەڵگە لە دەستی چینە چەوسێنەرەکان، لە دەستی بۆژوازی دەربهێنێ. بە مانایەکی تر بۆ ئەمری ئازادی و خۆشبەختی دەبێ بە شێوەی  سیاسی و لە مەیدانی سیاسیدا سەربکەوێ. بزوتنەوە و کۆمۆنیزمێک کە پێی وایە ڕادیکالیزم و ئەو پەڕخوازی نەک لەژێر لێوەوە قسەکردن و منجەمنج دەتوانێ ببێتە هێز، هەموو ئازادی داواکردن و نەک تیکەکە کردن و سەروگوێلاک کردنی قسه و خواستەکانی بۆ ئازادی و خۆشبەختی، نەک تەسلیم بوون بە هەلومەرجی چینایەتی باو، بەڵکو ڕەتکردنەوەی تەواو و پڕاوپڕی هەلومەرجی چینایەتی باو و چەوسانەوە، دەتوانێ ڕادیکاڵیزم و عەدالەتخوازی کۆمۆنیستی بگۆڕێ بە هێزی سەرەکی سەردەمی خۆی.

جوڵانەوەی شورایی کوردستانی عێراق، دەرکەوتە و جیلوەیەکی تایبەتی ئەم جوڵانەوە و ئەم خواست و ئاسۆ چینایەتی و ئەم کۆمۆنیزمە کۆمەڵایەتییە کرێکارییە بوو لە دڵی یەکێک لەتاریکترین ڕاستڕەویەکانی مێژووی مرۆڤایەتیدا.

تاڵەبانی و بەرەی بۆرژوازی کورد کە هەر لەسەرەتاوە لە دژی ئەم جوڵانەوە دەستی دایە درۆ هەڵبەستن و تەنانەت چەکیان لەدژی ڕاکێشا، گەواهی ئەوە بوو کە کێشمەکێشی سەرەکی و لەمە بەدوای کۆمەڵگەی کوردستان، کێشمەکێشی ئەم دوو چینە، کێشمەکێشی ئەم دوو ئۆردوە چینایەتیە دەبێ و‌ ئایندەی ئازادی و خۆشبەختی یان بەدبەختی و بێمافی سیاسی و کۆمەڵایەتی لە کوردستاندا، بە کێشمەکێشی ئەم دوو ئوردوە چینایەتیەوە گرێی خواردوە.

هەرچۆنێک بێ ئەو  بەهارەی  کەمیللیگەرایی و بورژوازی خەوی پێوە دەبینی هاتەدی و لە دڵی ئەو بەهارەدا زستانی بێمافیەکی سیاسی و کۆمەڵایەتی و ئابوری بۆ چینی کرێکار و بێبەشانی کۆمەڵگەی کوردستان دەستی پێکرد. هەزاران ژن بێکەس کوژ کران، هەزاران گەنج ولاو لەجەنگی دەستبەسەرداگرتنی مودەقەدەراتی کۆمەڵگە و سەروەت و سامانەکەی کوژران و سەقت و گیرۆدەوار کران. هەزاران هەزاری تر بەهۆی قبوڵ نەکردنی ئەم شێوە ژیانە نا شایستەیە سەری خۆیان هەڵگرت و هەندێکیان نەگەیشتنە هیچ شوێنێک و لە دەریا وکێوەکان ڕەق بوون و خنکان. ئێستا ئیتر  ڕزگاربوون لەوشێوە ژیانە چینایەتییە و لە دەسەڵاتی ئەم کەمایەتیە گۆڕاوە بە خەون و ئارەزویەکی گەورەی کۆمەڵایەتی لە کوردستانی ئەمڕۆدا.

 بە پێچەوانەی شیمانەی تاڵەبانی شورا و جوڵانەوەی شورایی هەرچەندە شەختە و سەهۆڵبەندانی کوردایەتی و میللیگەرایی لە گۆی خست و پاشەکشەی کرد، ئەمڕۆ ڕەگی شوراو جوڵانەوەی شورایی و ڕەگی داخوازی و ئامانج و ئاواتەکانی لە دڵی ئەو کۆمەڵگەیەدا و لە قوڵایی ئەو خەباتە چینایەتیەی ئێستای چینی کرێکار و بێبەشانی کوردستاندا نەک هەر وشکی نەکردوە، بەڵکو تەواوی واقیعیەتی چینایەتی ئەمڕۆی کوردستان، تەواوی ئەو قڵشتە چینایەتیە گەورەیەی ئەمڕۆ، تەواوی ئەو بێمافیە سیاسی و کۆمەڵایەتییەی ئەمڕۆ پێمان دەڵێ شورا و جوڵانەوەی شورایی پێویستیەکی گەورەی دەستبەجێ و چارهەڵنەگرە، نەک هەر بۆ ڕزگاری و بۆ سەرکەوتنێکی سیاسی و سۆشیالیستی و کرێکاری و عەدالەتخوازانە، بەڵکو بۆ کۆنتڕۆڵکردن و هەوسارکردنی کۆنەپەرەستی بۆرژوازی دەسەڵاتداری ئەمڕۆ. ئەمڕۆ زایەڵەی ئەم بزوتنەوەیە لە هەولێر وسلێمانی لە هەرکات ڕەساتر دەبیسترێ و دێتەدەر، کاتێک دەڵێن ئەم جەهەننەمە چینایەتییە قبوڵ ناکرێ، کاتێک دەڵێین ئەم حاکمییەتە هی ئێمە نییە و ئێمە و ئەوان دوو ژیانی جیاواز دەژین، کاتێک دەڵێین قبوڵ نییە کۆمەڵگەیەک هەبێ، تیایدا ماڵ وحاڵی ئێمە ئاو و لافاو بیبا، گەنجی ئێمە هەناسە ساردبێ، ئێمە سەرپەنامان نەبێ و بێبەش بین لە داهات و ئیمکاناتی خۆشبەختی، کاتێک دەڵێین ئێمە سەرکوتی ئازادی ودیکتاتۆرییەتی ئەو کەمایەتیمان قبوڵ نییە.

ئەم ڕزگارییە چەند پێویستی بە حیزبی سیاسی کۆمۆنیستی کرێکاری و ڕادیکاڵی خۆی هەیە، ئەوەندەش پێویستی بە شورا و جوڵانەوەیەکی شورایی ڕادیکاڵ هەیە کە دەتوانێ ئیرادەی ڕاستەوخۆی سیاسی و چینایەتی جەماوەری چینی کرێکار و بێبەشان بگۆڕێ بەو هێزە گەورەیە کەبتوانێ سەرکەوتنێکی سیاسی چەپگەرا و عەدالەتخوازانە دابین بکات، پێویستی بە ڕابەرانی ڕادیکاڵ هەیە کە ئەم ئیرادەیە و خواست بۆ ڕزگاری لە زنجیری مەیل و ڕەوتی گۆڕانی نیوە و ناچڵ و سەروگوێکراوی ئۆپۆزیسێۆنی بۆرژوایی ڕزگار بکەن. ئەە پێویستییەکی خەباتی چینایەتی ئەمڕۆی کوردستانە و مەرجێکی هەر سەرکەوتنێکی سیاسی جیددیە لە پێناو ڕزگاریەکی بنەڕەتی تر.

ئیبراهیم حسێن

۱۱.۳.۲۰۲۳