بەشێكی تر لەدەقی قسەی من بۆ مردویەك
بەشێكی تر لەدەقی قسەی من
بۆ مردویەك
ئەگەر لەخوا نەترسامایە
خۆم ئەدایە بەر گوللەو
شمشێرێكی ژەنگاویم لەجەستەی خۆمدا دەڕواند
هەموو پەنجەرە داخراوەكانم
ئەدایە بەرد بەردو و ئەمشكان
زۆرجار پێمووتی سێبەری دڵی من بەكەڵكی ئەوەناێت بیدەیت بەكۆڵتاو
كۆڵانەو كۆڵان لەگەڵ خۆتدا بیگێڕیت
من دەمێكە هاوار دەكەم و ئەڵێم
بالەتوڕەبونی مندا وەقرەدەگرێت و
هێور هێور دەبێتەوە
ئەگەر لەخوا نەترسامایە
شووشەم بەپەنجەرەی ماڵەكەتانەوە
نەدەهێشت
هەموو ئینجانەكانم بۆ پڕدەكردیت
لەتێزاب نەمدەهێشت یەك گوڵ لەباخەكەتانا بڕوێت
بەبنكەی پۆلیسی گەڕەكەكەتانم دەووت
ئەو ماڵە شەوانە درۆ دروستدەكەن و
لەسەر شەقامەكان دەیچێنن
ئەگەر لەخوا نەترسامایە
هەموو نامەكانم ئەسوتانیت و ئەمدایە
دەست ڕەشەباو سەرم لەقوڕ دەگرتیت و
نەمدەهێشت شیعرێكم بخوێنیتەوە
نەمدەهێشت پێم بڵێیت كراسەكەت
بۆنی عارەقی لێدێت
پەنجەكانی قاچت لەگۆرەویەكانەوە هاتۆنەتە دەرەوە
ئەگەر لەخوا نەترسامایە
چۆن دەمهێشت بەكۆڵانەكانی ڕۆحما بڕۆیت و
دوایش بوختانم بەدەمەوە بكەیت و
بڵێیت دەستی خستۆتە ناودڵمەوەو
درۆی گەورە گەورەم
تیادەنوسێتەوە
من شەرم لەخۆم دەكەم
كەدەستی تۆمگرت و وتم بابڕۆین
بۆگۆڕستان و نامەی ئەو مردوانە
بخوێنینەوە كەبەدڵشكاوی سەریان نایەوە
ئەگەر لەخوا نەترسامایە
نەمدەشوبهانی بەمریەم و
ملوانكە مێخەكەكەی دایكمم نەدەكردە ملت
پێمنەدەوتیت ئەڵا چەندە بۆنت خۆشە
كوتومت بۆنی دایكمت
لێدێت
هەرچیدەنوسیت بنوسە
بەس مەنوسە خۆشمدەوێیت
………
میرزا