بەشێکی تر لە دەقی جانتاكەم پڕە لەدڵی شكاو
بەشێکی تر لە دەقی
جانتاكەم پڕە لەدڵی شكاو
تەواو تەواو سەرم لێ ونبووە
نیوەم لەژوورێكی بچكۆلەدا داناوەو
نیوەكەی تریشم خستۆتە جانتاكەمەوە
لەهیچ شتێك تێناگەم
نەدەچمەوە سەر جارانی خۆم و
نەدەشتوانم بارانێكی توڕە لەسەر بارانێكی
بێ نیشتیمان موتوربەكەم
……………...
توڕەم دەكەن
هاوڕێكانی گۆڕستانم
ڕقیان لەو پۆست چیانەیە
كەنامەی درۆ دەگەێنن
نامەوێت ئیتر بەوكۆڵانانەدا بڕۆم
كەباران بەڕوتی تیاناسوڕێتەوەو
پەڕەسێلەكە بەسەریا نافڕێت
توڕەم دەكەن
هاوڕێكانی گۆڕستانم زۆر غرورن
بەكراسی ئوتوكراوەوە نەبێت پیاسە بەسەر شەقامەكانی
بەهەشتا ناكەن
……………..
نازانم ئەوە كێیە بەم نیوەشەوە درەنگە لەدەرگاكەم دەدات و
بەگریانێكی هەنجیریەوە دەیەوێت
تۆڵەی ئەو زەردەخەنانەی خۆیم لێبكاتەوە
كەلەشەڕی ناوخۆدا زیندە بەچاڵمان كردن
هەراسانم دەكەن گەڕانی ئەوسواڵكەرانە
هەراسانم دەكەن
كەبەو قرچە قرچی نیوەڕۆیە
لەدەرگای ماڵی سەرۆك دەدەن
………………
تەواو تەواو دەستم لەخۆم بەرداوە
بەهەر شوێنێكدا دەڕۆم
شتێكی منی تیاكەوتووە
خۆمم بۆكۆناكرێتەوە سەریشم لەخۆم
شێواندووە
نازانم ئەم هەموو قرچە قرچە چییە
لەناومدا دەگەڕێت
تۆبڵێی بۆڵە بۆڵی هاوڕێ ڕۆژنامە نوسەكانم بێت
كەبەفەرمانی سەرۆك زیندە بەچاڵ كران
خۆمم بۆناناسرێتەوە ناتوانم
بەیانیەكی تەماوی قاوەیەكی سادە لەگەڵ
هاوڕێكانی گۆڕستانما بخۆمەوە
……………..
جانتاكەم پڕە لەدڵی شكاو
لەچاوی ڕەشو سپی
لەگۆرانی زەرد هەڵگەڕاو
تەواو تەواو دەستم لەخۆم بەرداوە
ئەم بێ نیشتیمانییە هەراسانی كردوم
درۆی سەرۆك و پێڵاو دانانی پیاوەكانی
ناو پەرلەمان خۆمیان لەبەرچاو خستوم
هیچ شتێكم بۆناخوێنرێتەوە
دایكم بەدەنگێكی ژنانەوە. پێم دەڵێت
كوڕم لەكەلی شەیتان
وەرە خوارەوە
سەرۆك و پاسەوانەكانی دڕن دڕ
جانتاكەم پڕە لەدڵی شكاو
لەگۆرانی پرچ بڕاو
……………..
٢٦/٩/٢٠١٩ حەكیم میرزا