ئاسۆی سەرکەوتنی بزووتنەوەی ئێستا و پێویستیی یەکگرتوویی کرێکاران… لە فارسییەوە کراوەتە کوردی

ئەو بزووتنەوە ناڕەزایەتییە گەورەیەی کە دوو هەفتەیە لە شارە جیاوازەکانی ئێران دەستی پێکردووە، نیشانەی قەیرانێکی قووڵی ئابووری و سیاسییە. ئەمە دەری دەخات کە کۆماری ئیسلامی چیتر ناتوانێت وڵات بەڕێوە ببات و خەڵکیش ناتوانن لە ژێر ئەم هەموو گوشار و ستەمەدا بێدەنگ بن.

بڕیاری ڕژێم بۆ گرانکردنی کەلوپەلە سەرەکییەکان (جگە لە گەنم و دەرمان) بوو بە پریشکی ئەم ئاگرە. گرانی تەنها بەهۆی دۆلارەوە نییە، بەڵکو بەهۆی گەندەڵی، خەرجییە زۆرەکانی سەربازی، نەبوونی بەرهەمهێنان و سیاسەتە چەوتەکانی دەسەڵاتە. ئەم بارودۆخە ژیانی خەڵکی ڕەشوڕووتی بەرەو نەهامەتی بردووە.

بەرپرسانی ڕژێم دەڵێن ئەمە کاری “دەستی دەرەکی” یان “ئاژاوەگێڕانە”، بەڵام راستییەکە ئەوەیە کە ئەم بزووتنەوەیە لە بنەڕەتەوە سیاسییە. خەڵک و گەنجان بە ئاشکرا دەڵێن کە کێشەی سەرەکی خودی ڕژێمەکەیە و دروشمی ڕووخانی کۆماری ئیسلامی دەدەن. ئەمە نە کاری بیانییە و نە کاری پاشایەتیخوازەکان، بەڵکو داخوازی ڕاستەقینەی خەڵکە.

بۆ ئەوەی ئەم ناڕەزایەتییانە ببێتە لافاوێک و ڕژێم ڕابماڵێت، پێویستە ئەم چەند خاڵە جێبەجێ بکرێن:

١. هاتنە مەیدانی چینی کرێکار: کرێکاران گەورەترین هێزی کۆمەڵگان. دەبێت بە یەکگرتوویی و بە سەربەخۆیی بێنە ناو مەیدانی خەبات.

٢. بەرنامەی شۆڕشگێڕانە: پێویستمان بە بەرنامەیەکی ڕوون هەیە بۆ گۆڕینی بنەڕەتیی کۆمەڵگا (بەرنامەی سۆشیالیستی) کە ژیانێکی شایستە بۆ هەمووان دابین بکات.

٣. دروستکردنی ناوەندی خەبات: دەبێت لە ناو کارگەکان، قوتابخانەکان و گەڕەکەکاندا، گرووپی بچووک و ڕێکخراوی شۆڕشگێڕ دروست بکرێت.

٤. خەباتی سیاسی: خەبات تەنها بۆ نان نییە، بەڵکو بۆ ئازادی و دەسەڵاتی خەڵکە. کرێکاران دەبێت ڕابەرایەتی ئەم خەباتە سیاسییە بکەن.

٥. تێکەڵکردنی داواکارییەکان: پێویستە خەبات بۆ زیادکردنی مووچە و باشکردنی بژێوی، تێکەڵی خەباتی سیاسی دژی ڕژێم بکرێت.

٦. یەکگرتوویی هێزە ئازادیخوازەکان: هەموو ئەو هێزانەی کە بڕوایان بە سۆشیالیزم و ئازادیی کرێکاران هەیە، دەبێت دەست بدەنە دەستی یەک.

دروشمەکانمان:

• بەهێز بێت یەکگرتوویی کرێکاران!
• بڕووخێت ڕژێمی کۆماری ئیسلامی بە دەستی کرێکاران و زەحمەتکێشان!
• بژی حکومەتی شوورایی (ئەنجومەنی) کرێکاران!
• بژی سۆشیالیزم!

توانا محەمەد نوری
٢٣/١/٢٠٢٦