(خەونێکی ساویلکە)…. بەندی عەلی
ڕۆمانێکی
ڕیالیزمی ئەفسوناوی دەخوێنمەوەو
سەیری فیلمێکی کۆمیدی
دەکەم، ئەمشەو ..
بەباڵی خەیاڵیش بەرەو
هەسارەیەکی تر دەفڕم ..
ئەم سەرزەمینە چیتری تیانەماوە،
غەیری خوێن و
سەربڕینی کۆترەکانی
باخە گشتییەکانی ئومێد ..
ئیتر دڵ شوێنێ شك نابا
بۆ گلەیی و بۆ شکایەت!
ئەم سەردەمە.. لە دواهەمین
ڕۆژەکانی بەر لەنەفخی سور دەچێت و
ئەم جیهانەش
چیتر بەکەڵکی ژیان و ئەوین نایەت!!…
ویستم ناونیشانێ دانێم
بۆ ئەم پارچە کورتە شیعرە،
چیترم بە خەیاڵا نەهات، گونجاوتر لە؛
(شەوی ڕاچڵەکین لەخەوێکی
ساویلکە)!