برسێتی ڕەگی هاری پێوەیە یان هۆکارێکە بۆ بێدەنگ کردن!؟… نەژاد عوسمان
سەرنجێک لە چواردەورت بدە تێ ئەگەی کە هیچ شتێک لەجێگەی خۆی نەماوە. بۆت روون ئەبێتەوە کە مرۆڤەکان ناتوانن بەتەواوی هاوسەنگی لە نێوان وتار و کرداریان دا دروست بکەن و ئەو حەقیقە چەپێنراوەی لە ناخیاندا پەنگی خواردۆتەوە بیکەنە وەرچاخانێک بۆ نەهێشتنی زوڵم و وەستاندنی ئەو پرۆسە بەرنامەڕێژیەی کە لەم ڕۆژگارەدا بۆ برسیکردن و بێکارکردنی خەڵک گیراوەتەبەر. بێدەنگیەکی کردەیی باڵی کێشاوە بەسەر ئەو کۆمەڵگەیەی کە لە دووگەورەترین نیعمەت بێبەشکراون کە ئەوانیش ئاسایشی فیزیکی و ئاسایشی خۆراکە کە خۆی لە مووچە و بەبازاڕکردنی ئەو داهات و سەروەتە نیشتیمانیەدا ئەبینێتەوە کە لەبەرژەوەندی چەندکەسانێکی بنەماڵە سیاسەکاندا وەگەڕخراوە و ئێستا ئەوان بەسیاسیان کردووە بۆ پەردەپۆشکردنی شکستی شاخ و شاریان !
ئەم هەموو بێدادی و ناڕێکی و برسیکردنە هەیە چەقۆی قەساب لەسەر ملت دانراوە! کەچی کاردانەوەکان لەچوارچێوەی بۆڵەبۆڵی میدیایی و سۆشیەڵ مێدیا تێناپەڕێت و شەقامی ناڕازی ڕاستەقینە جمەی نایەت و هێشتا گەمژەکان هەر لەسەر کورسی دەسەڵاتن! لەوە خراپتر ئەوەیە هەندێک کەس ئەو جوڵەیەشیان نییە کەچی لەگەڵ ئەوەشدا سەرزەنشت ئەکرێیت کاتێک تۆ ئەتەوێت لەجیاتی ئەوان دەست بخەیتە سەر کەم و کوڕیەکان !
کورد ئەڵێ برسێتی ڕەگی هاری پێوەیە و ماکیاڤیللیش ئەڵێ هۆکاری ڕەدووکەوتنی خەڵکە بۆ دەسەڵاتێکی چەوسێنەر. من زیاتر لەگەڵ بۆچوونەکەی ماکیاڤیللیم، چونکە زۆر بە ئاشکرا کۆمەڵگە لەلایەن دەسەڵاتە خۆسەپێنەکانەوە بەش بەش و برسی و بێدەنگ ئەکرێن تا ئەگەر ڕۆژێک ئەو ڕەگی هاربوونە تەشەنەی کرد ئەوا هەموو کۆمەڵگە نەگرێتەوە و مەجالی کۆنتڕۆڵکردنی تیا هەبێت !
خۆ ناشکرێت و ڕاست نییە بڵێی جارێ کۆمەڵگەی کوردی هێشتا برسی نییە، بۆیە خەباتی جددی دەست پێنەکردووە؟! ژیانی خەڵک لەبەرچاوماندا ئەو گومانە ڕەد ئەکەنەوە! ئەوەتانێ کۆمەڵگە بەشێکی کەمی بە سەربازیکراو تێرکراوە بۆ پەلاماردان و سەرکوتکردنی بەشە زۆرینە برسیکراوەکە مەدەنیەکە .
بۆیە گومانی تیا نییە تا خاوەنی پارتی و یەکێتی بین، تاخاوەنی میللەتێکی ئاوا خەمسارد و پەرت و بێ بەرنامەبین، کارەسات و ژینگەیی و ژیاری و مرۆییەکان ڕوو لەزیادبوونە !
خۆزیا میللەت هەر ئێستا درەنگتر نەبێت درکی بەو مەترسییە ئەکرد کە سیاسیەتی هەرزەیی و نەزانی پارتی و یەکێتی دروستیان کردووە. خۆزیا گەل ئێستا مەنهۆڵی ئەو زەلکاوەیان هەڵئەدایەوە و ئەو دەسەڵاتەیان ئەکرد بەڕابووردوو کە سی و چوار ساڵە بەردەوامی هەیە، نەک درێژە بکێشێ بۆ چەند ساڵێکی تر. بۆئەوەی چارەسەرەکان زیاتر لە گرێژنە دەرنەچن و زووتر بتوانرێت کۆمەڵگەکە جارێکیتر بخرێتەوە سەرپێ و هەناسەیەکی بە بەردابێتەوە .