ڕەگەزپەرستی… نووسینی: میرۆ عبدولکەریم

ڕەگەزپەرستی… نووسینی:میرۆ عەبولکەریم

ڕەگەزپەرستی هەر ئەوە نیە کە میلەتێک یان نەتەوەیەک بە بەرزتر بزانێت لە نەتەوەیەکی تر و بە شان و باڵی ئەمیانا هەڵدەیت و بە دایکو باوکی ئەویانا بێیتە خوار.
دەربڕینی ڕەگەزپەرستانە ئەکرێت وێناکردنێکی ئایدیاڵ ، ستیرۆتایپ و سەرو مێژوویی میلەتێکی دیکە بێت ، دروستکردنی نمونەیەکی باڵا و ئەبەدیشە لە نەتەوە یان میلەتی جێی باس و هێشتنەوەیەتی لە قەفەزی ئەبەدیەتدا.

هەر لەسەر ئەم بناغەیە تەنها دژە جولەکەکان، ئەوانەی جولەکە یەکسان دەکەن بە زایۆنیزم و دەوڵەتی ئیسرائیل ڕەگەزپەرست نین، تەنها ئەوانەتان بیری ڕەگەزپەرستانە کاوێژناکەنەوە کە لەگەڵ باسی هەر تاوانێکی دەوڵەتی ئیسرائیلدا دەنوسن جو یان جولەکەی دڕندە بەڵکو ئەوانەشتان کە وێنایەکی ئایدیاڵ و سەرو مێژوویی پۆزەتیڤ لە جولەکە دەکێشن ( وەک ئەهلی زانست، یان زیرەک و لێهاتو و زۆرزان، هێزێک کە ئاگای لە وردو درشتی کاروباری جیهان هەیە) هەمان عەقڵیەتی ڕەگەزپەرستانەتان هەیە.

لە پاڵ ڕەوتی ڕەگەزپەرستانەی ڕوانین لە مرۆڤی نا ئەوروپی وەک نیمچە مرۆڤ یان نزمە مرۆڤ ڕەوتێکی دیکە هەبو کە لە گەلانی ژێر دەستە وێنەیەکی ئەبەدی دەخوڵقاند ؛وێنای “کێویە خانەدان و جوامێرەکان “ . لەم ستراتیجیەدا ، بە ئاڕاستەیەکی پێچەوانە ، هەمان بیری ڕەگەزپەرستی بەرهەم دەهێنرێتەوە؛ میلەتێک ، بە وردو درشتەوە ،بە هەمو چین و توێژەکانیەوە، لە هەمو دۆخێکی ئابوری- کۆمەڵایەتی و قۆناغێکی مێژوویدا، هەر لە بەرەبەیانی مێژوەوە تا ئێستا وەک جەنگاوەر و شۆڕەسوار، میوان دۆست، یان خاوەنی ئەخلاقیاتی بەرز …..وێنادەکرێن.

بەهەمان شێوە “جولەکە دۆستەکان “ کە لە ڕاستیدا زایۆنیدۆستن هیچ جیاوازیەکان نیە لەگەڵ ئەو دژە جولەکانەی ، کە دەوڵەتی ئیسرائیل و زایۆنیزم یەکسان دەکەن بە هەڵگرانی ئاین و ناسنامەی جولەکە و هەمو تاوانەکانی ئیسرائیل دەدەنە پاڵ جولەکە ( لە کاتێکدا بە هەزاران هەزاریان دژی زایۆنیزم خەباتیان کردوە و دەیکەن). ڕەگەزپەرست هەر ڕەگەزپەرستە چی پەسن کەر بێ، چی سەرزەنشت کەر.

خۆشەویستی و ڕق نێوانیشیان هێندە ناخۆش نیە، ڕق دەکرێت بگۆڕێت بۆ خۆشەویستی و بە پێچەوانەشەوە؛ بۆیە دەبینین کەسێک ڕۆژێک وەسفی جولەکە دەکات بەو ستیرۆتایپانەی سەرەوە و تیۆریای پیلانگێڕیمان لێدەکات بە ستراتیژی سیاسی و بۆ سبەیش، پاش بینینی وێنەی دو مناڵی بێتاوانی غەزە، هاوشێوەی ئیخوانیەکان دەرزەنێک جنێو و تۆمەتی ڕەگەزپەرستانە بەرامبەر بە جولەکە ڕیزدەکات.