کورتە چیرۆک… نووسینی: ئارام حەسەن

دوو چڵ داری خستە نێو زۆپاکە، مشتێک کەڕەگەڵای کرد بە بەرگڕ، بەر لەوەی ئاگریان پێوەبنێت، گوێی لە لوورەی گورگە ڕەشەکە بوو، بە پەلەپەل بەرەو سەربانی گەوڕەکە ڕایکرد.

یەکێک لەو چڵانە ڕانی چنارێک بوو، ئەوی دیکەش باسکی دارەبەنێک، چنارەکە زۆر دەترسا، پچڕ پچڕ لە دارەبەنەکەی پرسیی:

ــ “ئێرە کوێیە، ئەو کابرایە بۆچی لێرە دایناین؟”

ــ “نازانم کوێیە، بەڵام شوێنێکی ساردوسڕ و تاریک و ترسناکە”

کەڕەگەڵایەکی پۆرتکاو، کە ساڵانێک لەسەر مەچەکی داربەڕووێکی دنیادیدە ژیابوو، لە بەرگڕەکەوە سەری دەرهێنا، وەڵامی هەردووکیانی دایەوە:

ــ ئێرە دۆزەخی دارزادەکانە، کابرا سەرمایەتی هاکا گەڕایەوە، بۆئەوەی بە تینی ئێوە خۆی گەرم بکاتەوە، سەرەتا ئاگر بە ئێمەوە دەنێت و کەمێکی تر..

زریکە و هاواری بە کۆمەڵمان دەبێت به دووکەڵی شین و گۆشتیشمان بە خۆڵەمێش.

*کەڕەگەڵا: وشکەگەڵا، ساڵێک بەسەر هەڵوەرینیدا تێپەڕێبێت.

*پۆرتکاو: ڕزیو، درزبردوو.