من خۆم پێناچنرێت!… ڕێبوار حەمە شەریف
لە کوێ دوو دەست، بێنم و
یەک دوو پەنجەی ڕاستگۆ و. شریتێکی بیرەوەری و
سێ چوار… هەناسەی ئازادی و
بە تەنیا- ش هەر دوو پێ !…
کاسەی سەرم پڕ بووە لە گومان،
گومانی شین و، کەسک و سوورو
تا سپی، گەر لە وێنەی بەفریش بچێ …
عەوامێکە, هەر خۆم ئەندازیاری خۆمم
نەخشەی خۆم دەکشم ،
خاکێکم،
لە هەزار لاوە… کێڵگەیەکی بەیارو
کوێرە بیرێکی دوێنێم و
هەر خۆم خۆمم بێ ئەوەی پەتێک هەبێ
خۆم خۆم هەڵدەگۆزم!
من خۆمم بێناچێنرێت!
دەنکۆڵە گەنمێکم، وشک و ڕەق وتەق،
لە بەرد ئەچم، نەزۆک.
جووتێ چاو، لە ژێر دوو برۆی ئێشکگرتوو
لە دووکانێکی کراوە ئاسا،
کەچی …. نیگایەکی پێنابینم،،
ساڵانێکم ڕووت و قووت و بێ پێڵاو
(زمانێک)، لە دەمدا تۆقلە نیشتوو،
(زووانێک)؛ لە کاسەی سەردا ماڵە و
هەتا ئێستاش ـ قەڵەمێکی بێ رشووەم و
هەر ئەنووسم بێئەوەی دێڕێک فێر بووبم !؛
وشەکانم،،
کۆنتر لە وشەی عیبری و بزماری و
تا بە ئارامیش – ناچێت ؛
سەیرم بە خۆم دێ….
کە ناتوانم ناوی خۆم بە چەند پیتێک بنووسم ؛
خۆم خۆم نادۆزمەوە …..
کەوتومەتە نێو تراویلکەی (بێ ئاو و بانە) وە؛
ئەڕۆم ئەڕۆم ئەڕۆم…..
تا ئەوپەری یاخیبوون بچێ …
دەڤەرێکم بێ باو فەڕەو
بەرێکم بێ دەنگ ،،،
هەزاران وشەی درۆ لە سەر سینەما ئە نووسنە وە
بێئەوەی دڵۆپێک خوێن لە جەستەم دا چۆڕێت !؛
ئاخر خۆم خۆمم بۆ نانووسرێتە وە
قەڵەم و پەنجەو دڵ و چاو و پی و
هەنگاو بڵێن چی…
هەر خۆم بەرگی درۆ لەبەر ئەکەم …
زمان دێنمە سەر خەت و
پەنجە بە ناو ژەهری مەرەکەبا ئەکەم،
ڕستەو یاسایەک بڵێن چی ،،،،
خۆم خۆمم بۆ ناچێنرێت .
**************