بەغداد پایتەختێکی تاریک… نووسینی: جەلال قادر
لە دوا سەردانیم بۆ پایتەختی عێراق، تووشی نەخۆشی دەروونی هاتم! ئەو دیمەنەی من بینیم هەرگیز لە زەینم دەرناچێت. دوانزە مانگی ڕەبەقە نە نان خواردنم ئاساییە، نە وەک جاران بە ئاسوودەیی دەژیم.!
پارساڵ، سەردانی (عیماد)ی هاوڕێمکرد لەشاری (بەغدا)، ئەو شارەی سەردەمانێک کوڕوکچ دەست لەناودەست بە شادمانییەوە پیاسەیان تیا دەکرد، کەچی ئێستا بووە بە شاری ڕەگەزی نێڕ، زۆر بەکەمی ژن و مێردێک دەبینیت دەستیان لەناو دەست بێت، یاخود ژنێک بێسەرپۆش بێت! لەم شارە ژن لەبنی پێیەوە تا تەوقی سەریان بە لەچک و چارشێو داپۆشراوە و رووناکی نابینن. ئەم دیمەنە بۆ من نامۆ بوو، چونکە لە ساڵانی حەفتاو هەشتاکانی سەدەی رابردوو، ژینگەی شار و ژیان بە شێوەکیتر بوو، ژن هەستی بە رووناکی شارەکە دەکرد، ئێستا بووەتە تاریک و ترسناک ودەڵێی خێو بەسەرسەریدا دەخولێتەوە.
بەهەرحاڵ… هاوسەرەکەی (عیماد)ی هاوڕێم ناوی (نادیە) بوو، لە دوکانێكی وێنەگرتن لە گەڕەکی (مەنسور) کاریدەکرد. پاش نیوەڕۆ بە سواری تڕۆمبیلەکەی عیماد چووین تا نادیە خان لە سەرکار هەڵگرین و بچین بۆ رەستورانتێک ژەمێک نان پێکەوە بخۆین.
کاتێک گەیشتینە بەردەم دوکانەکە، پیکابێکی فۆردی مۆدێل نوێمان بینی، کە لە سندوقەکەیدا جۆلانەیەکی سووروسپی جوانی تێدا پاڵخرابوو.
چووینە ناو ستۆدیۆکە، نادیە لە ژووری وێنەگرتنەکەی کە بە پەردەیەکی شینی تۆخ داپۆشرابوو هاتە دەرەوە، تەماشای ئێـمەی کرد و خێرا پەنجەی نا بەسەر لێوی، ئاماژەی کرد کە بێدەنگ بین. پاشان زەنگێکی لێدا، لە چایخانەکەی تەنیشتیان مێردمنداڵێک بەسەر سینیەکەوە دوو چای گەرمی بۆ هێناین.
ئینجا لەژوورە تاریکەکە پیاوێکی بەتەمەن دزداشەیەکی سپی وخاوێنی لەبەردابوو لەگەڵ کیژۆڵەیەکی پەرچەم لەسەر هاتەدەرەوە. سەرەتا من وامزانی باوک وكچن.
پیاوەکە لەسەر مێزی وێنەبڕەکە پشتی لێمان کردو کیژۆڵە بچکۆڵانەکەشی لەبەردەم خۆی شاردەوە.
لە کاتێكدا پیاوە بەتەمەنەکە خەریکی پارەدان بوو، نادیە خانم وێنەکانی خستە ناو زەرفێکی بچکۆڵانە ودایە دەست کیژۆڵەکە.
ئینجا پیرەمێردەکە گووتی: تکایە وێنەکانمان لەناو کامیراکەش بسڕەوە.
نادیە خانم پێیگووت: خەمت نەبێت، هیوادارم متمانەت بە ئێمـە هەبێت.
لەم کاتەدا؛ کیژۆڵەکە لە جەستەیەکی بێ گیان دەچوو، دەستە ناسک و بچکۆڵانەکەی لەژێر تاریکی کراسە ڕەشەکەی دزەیکرد ودەریهێنا، بە ترسەوە گووتی: من دەمەوێت زوو بچینەوە ماڵێ تا سواری جۆلانەکە بم.
هەر کە لە دوکانەکە چوونە دەرەوە، نادیە خانم بە دەنگێکی خەماوییەوە گووتی: چەند گوناهە ئەو كچە بچکۆلانەیە، دایک و باوکی پێشکەش بەم کابرا دەوڵەمەندەیان کردووە!
کیژۆڵەکە تەمەنی هەر یانزە یان دوانزە ساڵێک دەبوو. تەنانەت نەیدەتوانی سواری ئۆتۆبیڵەکەش بێت. پیاوەکە کردییە باوەشی وخستیە ناو پیکابەکەوە.
من بەدرێژایی ئەو ماوەیە حەپەسابووم، هەرگیز دیمەنی ئەو پیکابە، و ئەو کچە بچکۆلانەیە، وئەو جۆلانەیەم لەبیرناچێت.
عیمادی هاوڕێم لە هاوسەرەکەی پرسی: تۆ چۆن دەزانیت کە ئەو کیژۆڵەیە هاوسەرییەتی؟
* سەرەتا کە هاتنە ناو ستۆدیۆکە، کچەکە چاوی پڕ لە فرمێسک بوو، دیاربوو بۆ دایکی دەگریا.
پیاوە بەتەمەنەکە پێیگووتم کە تازە هاوسەرگیری لەگەڵ کردووە، و دەیەوێت پاسەپۆرتی بۆ دەرکات و لەگەڵ خۆی بیبات بۆ حەج.
ئەگەرچی ئەو ئێوارەیە، هەرسێکمان چووین بۆ رەستوورانتێکی خۆش، وکاتێکی خۆشمان بەسەربرد. بەڵام من لەناخەوە دڵم ئۆقرەی لێبڕاوە وخوێنم لەگەرمیا قوڵپی دەدا، گێژو کاس بووم، دەمویست زوو ئەو شارە بە جێبێهڵم.
لە کۆتاییدا عیمادی هاوڕێم هەستی بەم دڵتەنگیەم کرد، هەربۆیە بە گێڕانەوەی یادگارییەکان، هەوڵی دەدا وێنای ئەو ڕووداوەم لەبیربباتەوە. کەچی من؛ لەگەڵ دەرکەوتنی شەفەق، کاتێک هێشتا مانگ وەک شمشێرێکی تیژ شەڕی تاریکی دەکرد، پایتەختم بەجێهێشت!