دەربارەی ناڕەزایەتی و مانگرتنی مامۆستایان و فەرمانبەران و ئاینندەی ئەم بزوتنەوەیە… کامەران محەمەد وەڵامی داوەتەوە…
پرسی رۆژ: مانگرتنی مامۆستایان وفەرمانبەران ودەرسەکانی.
ماوە ١٥ رۆژ ١٣ مامۆستا وفەرمانبەر، وەک شێوەیەکی تری نارەزایەتی لەبەرامبەر هەلومەرجی نالەباری ژیان وگوزەرانی خەڵکی کوردستان لەسایەی حکومەتی هەرێمی کوردستان، لەوانە بێمووچەیی ودواکەوتنی وراگرتنی دەرماڵە وتەرفیع وکەموکوڕی لەزۆرێک لەخزمەتگوزاریەکان.مانگرتنێکیان لەخواردن رێکخست وسۆزی خەڵکی کوردستان وئازادیخوازانیان لەسەرتاسەری کوردستان وعێراق ودەزگا مەدەنی وحکومیەکانیان بۆلای خۆیان راکێشا.
بەڕێز (کامەران محەمەد) نووسەر وچالاکوانی مەدەنی وەڵامی ئەم پرسەی داینەوە.
بەرای ئێوە: پرسی رۆژ: چین ئەو دەرسوتەجروبانەی کەدەتوانین لەوبزووتنەوە تازەیە وەربگیرێت؟
کامەران محەمەد: وانەکانی ئەو خۆپیشاندان و ناڕەزاییانەی دوایی، فرە رەهەندن، جگە لە دیوی ماف، دیوێکی دیکەی هەیە ئەویش ئەوەیە داواکارییەکان تەنیا ڕوو لە دەسەڵات نین، بەڵکو داواکاری دیکەش لە ئەستۆ دەگرێت لە کەسانێک کە لەدەرەوەی دەسەڵاتن، بۆ نمونە ئەو خۆپیشاندانە سەلماندی کە لەو پەڕی بێئومێدیشدا هێشتا و هەمیشە کەسانێک هەن، لە پێناو ژیانی خەڵک ئامادەن گیانی خۆیان بخەنە مەترسییەوە، بەڵام ئەم قوربانیدانە دواجار پێویستی بە جولانەوەیەکی ئۆپۆزسیۆنی سیاسیی حەقیقی و خاوەن ئیرادە هەیە تا بتوانێت درێژە بەو ناڕەزاییانە بدات و تا دوا وێستگە نەوەستێت، لە غیابی ئەو جولانەوە هەقیقیە و بەهۆی ملهوڕی ئەو دەسەڵاتە، هیچ ناڕازییەک ناتوانێت ئامانجەکانی بپێکێت. وانەیەکی دیکە لەم خۆپیشاندانەی سلێمانی پێی گوتین، ئەو حزبانەی کە ئێستا وەکو ئۆپۆزسیۆن دەرکەوتوون، حزبی هەلسوڕێنەر نین و ئیرادەی سنگ دانە پێشیان نییە، بەڵکو چاوەڕێی بەرزبوونەوەی شەپۆڵەکە دەکەن هەتا سواری بن و تێیدا ببنە پاڵەوان، لە هەڵسوکەوتی پەرلەمانتارەکانییان بە ئاشکرا ئەمە بەدی دەکرا! وانەیەکی دیکە ئەوەیە کە باشتر بۆمان دەرکەوت، ئەم دەسەڵاتە هێشتا قۆناغی خێڵی تێنەپەڕاندووە و لە بچوکترین مەترسی دەگەڕێتەوە سەر مەعدەنە خێلەکییەکەی خۆی و هاوڵاتی شارێکی دیکەی دەرەوەی دەسەڵاتی خۆی بە بێگانە دەزانێت، بۆیە پێویستە زۆر بە هۆشیارییەوە لەگەڵ ئەم جۆرە عەقڵە مامەڵە بکەین هەوڵبدەین زیاتر گیانی تەبایی و هاوسۆزی لە نێوان خۆماندا زیاد بکەین و بەگژیدا بچینەوە، چونکە برەودان بە ناوچەگەری، مەترسییەکەی لە مەترسی بڕین و دزینی قوتی میللەت ترسناکترە.
قۆناغی دوای ئەو هەنگاوە چییە؟
کامەران محەمەد: قۆناغی دوای ئەم ناڕەزاییە، بەردەوامی دانە بە ناڕەزاییەکان هەر بەشێوەی مەدەنییانە، بەڵام بە خۆڕێکخستنەوە و کارکردن بۆ پتەوترکردنی شێوازی دەربڕینی ناڕەزاییەکان، دروستکردنی لیژنەی سەرپەرشتی لەهەموو شار و شارۆچکەکان، گفتوگۆکردنە لەگەڵ هێزە سیاسییەکانی دەرەوەی دەسڵات بۆ گۆڕینی ڕۆڵەکانییان لە نمایشەوە بۆ قوربانی دان. دیاریکردن و جیاکردنەوەی هێڵی ئۆپۆزسیۆن و دەسەڵات، ناکرێت باوەڕ بە حزبێک بکەین کە لە دەسەڵات بێت و سەرچاوەی نەهامەتییەکان بێت، کەچی وەکو هاوسۆز و هاوپشت مامەڵەی لەگەڵ بکەین!