هەندێ جار…
هەندێ جار دەبێ خاریش بی
بۆ ئەو پەنجانەی، سیخوڕی
بۆ سـیـابـاکـان دەکەن و
شکۆفەی ( داد ) دەوەرێنن ..
هەندێ جار دەبێ ماریش بی
بۆ ئەو پێیانەی بێ شـەرم
دێن و بۆ هەوەس، سنووری
سووری حورمەت دەبەزێنن ..
هەموو کاتێ، بە هاریش بی
بۆ ئەوانەی تۆوی ئومێد،
لە دەشتی دێمی ئەمڕۆدا
بە ئەسرین و ئارەقەو خوێن
بۆ سبەینێی (حەق) دەچێنن
زۆر جار دەبێ گڵ بی بۆ گوڵ
خۆربی بۆ ئەشکەوتی دیدە و
باران بی بۆ خاکی تینو ..
بۆ گەرمەسێری ڕەنجیش ، با
( هەندێ جار ….. نــــا)
بەندی عەلی