یەکەی زیرەکی…ڕووزار ئەحمەد

خۆشەویستی بووە کرێچی ڕۆح

هەر باڵا دەنوسێ

فەناو فەوتان بەویستە ماددیەکان دێنێ و

پرۆسەی پەرستن خۆش دەکا،

ئاسوودەترین نیشتنەوە

سافی و سادەیی و مەقامی صۆفیانەیە،

نوێترین ڕێگای مەعریفە ناسی

هەڵبژاردنی خوودە

بەلاڕێ بردنی عەقڵە

لەناو ئەو ئەفسانانەی دەورت

تۆ لەهیچیان نەچیت،

وەکو نێزک

لەپێناوی جوانناسیدا بگەڕێیت و

لەمەودای نەریتی باو دەرچیت ،

حەقیقەت مەلەوانێکی نەفەس درێژە

لەلێوارەکانی بیرکردنەوەدا دەخنکێت ٫

گرانترین ماچی جیهانت بیستوە!

بڕۆ ڕۆمانی “خاکی زیکۆلا” بخوێنەوە

ڕاستە مرۆڤ مەحکومە بەخۆشەویستی

بەڵام بەجەنگەوە،

ڕەنگەی چوار لاپەڕەی دڕاو

سەرداوی پڕچێژترین ڕۆمانی دونیا بێت،

قەت مامەڵەت بە(یەکەی زیرەکی)کردووە؟!

لەبڕی ڕزگاری بێ بەرانبەر جەنگاوی؟

هەرکاتێ بووی بەتۆپ تێدەگەی

تەنها لەناو جامخانەو

ئەوکاتەی بوویە (هاتریک)

تۆپشوو ئەدەی!

 

بەرد لەجێی خۆی سەنگین نی یە

لەهزری ئەو پەیکەر تاشەدایە

دەیکا بەپێناسەیەک بۆ ئازادی،

کەشناسی دەقێکی مردوە

لەناو بێ بارانیدا

کەس نایخوێنێتەوە،

وەک من و تۆ

گەر نێوانێکی تر

لەعەردو ئاسمان دورتر هەبوایە

دەمگوت هێشا تۆ دورتریت،

چیبکەین لەخەیاڵ

یەخەی گرتووم و دەڵێ؛

تۆ دەوڵەمەندترین پیاوی دونیای

لەگەمژەیی دا…….