دەربارەی تێپەڕاندی پرۆژە یاسایی هەمواری باری کەسێتی لە پەرلەمانی عێراقدا، لە ڕێکەوتنێکی پڕ شەرمەزاریدا… چەند هەڵسوراوێکی بەرگری لە مافی ژنان و مناڵان وەڵامیان داوەتەوە… بەڕێز هاوڵاتی( محەمەد ئەمین) ئەم وەڵامەی بۆناردووین:
محمەد ئەمین: بە شێوەیەکی گشتی ڕێککەوتنی کوتلە و حیزبە جیاوازەکان، تەنانەت ناکۆکەکانیش، بۆ نمونە ئۆپۆزیسیۆن و دەسەڵات، لە پەرلەمان بۆ تێپەڕکردنی پرۆژە یاسا، کارێکی ئاساییە و لە زۆر پەرلەمانی دنیا ئەمە ڕودەدات. ئەوەی ئاسایی نییە ڕێککەوتنە لەسەر تیرۆرکردن و تێکشکانی شکۆ و کەسایەتی مناڵان. ئەوەی لە پەرلەمانی عیڕاق ڕویدا، بەیاسایکردن و شەرعیەتدانە بە دیارەی دەستدرێژی سێکسی بۆ سەر مناڵانێك کە ناتوانن هیچ بەرگریەك لە خۆیان بکەن. یاسا دەبێت بۆ پارێزگاری لە مافەکانی قوربانی بێت، نەك پاڵپشتی و دانانی پارێزبەندی بۆ تاوانباران! ئەم بابەتە تەنها لە چوارچێوەی دەستدرێژی سێکسی نامێنێتەوە، کۆمەڵێك پرسی دەروونی و کۆمەڵایەتی و تەنانەت یاسایی تر بەدوای خۆیدا دروستدەکات، مناڵیك کە خۆی هێشتا لە دەسپێکی سەرەتایی پرۆسەی پەروەردەکردنە، و لە قۆناغێکدایە تەنانەت دایکان و باوکان پێویستیان بە کۆمەکی کەسانی پسپۆرە، لێرەوە پێویستی قوتابخانە و مامۆستا دێتە کایەوە، چونکە لای مناڵان لە تەمەنی ٦ تا ٧ ساڵی پرسیار دەربارەی سروشت و دەوروبەر دروست دەبێت، ئەم یاسایا دێت لەم قۆناغە هەستیارە بە مناڵەڵان دەڵێت، ئیتر ئێوە نەك هەر پێویستیتان بە پرۆسەی پەروەردە نییە، بەڵکو لە ئێستاوە ئێوە دەبێت ئەرکی ماڵ و بەخێوکردنی مناڵ لە ئەستۆ بگرن، ئەمە جگە لەوەی کە ئەو مناڵانە خۆیان کەسایەتیان تێکشکاوە و شکۆیان بریندارکراوە و لە ئاڵۆزترین و ترسناکترین تراوماوە دەژێن و تەوای قۆناغی مناڵی و هەرزەکاریان، دەتوانم بڵێم تەواوی ژیانیان لێ زەوتکراوە
پرسیارێك کە گرنگە بکرێت؛ دوای ئەو بڕیارە ئایا یاسا چۆن دەڕوانێتە ئەو مناڵانە؟ ئایا تەمەنی یاسایی و کەسایەتی یاساییان وەك گەورەیەکی سەرو ١٨ ساڵ دەبێت؟ یان هەر مناڵن؟ ئایا تەمەنی ١٨ ساڵی کە جیاکەرەوەیی نێوان مناڵ و گەورەیە لە یاساکاندا دەمێنێتەوە؟
لێرەوە دەبینین؛ ئەم بەناو پرۆژەیاسایە جگە لەوەی شەرعیەتدانە، تاوانێکی قێزەونە، لە هەمان کاتدا گەرەلاوژێ و فەوزایەکی وا بەدوای خۆیدا دەهێنێت کە زۆر بەهای تری کۆمەڵایەتی دەخاتە ژێر پرسیارەوە.
ئەرکی هەنوکەیی هەموو تاکێکی عیراقیە کە شکۆی مرۆڤ و ژیانی ئازادی مرۆڤ لە ڕیزبەندی سەرەوە و لە چەقی بیرکردنەوەی خۆیان ببینن، لە بەرەیەکی یەکگرتوو لە ناوە و دەرەوەی عێڕاق دژ بەم یاسا بەربەریە بوەستن. دەکرێت ڕێکخراوەکانی مافی مرۆڤ، میدیا جیهانیەکان و ئۆرگانە پەیوەندیدارەکانی یەکێتی ئەوروپا و نەتەوەیەکگرتوەکان لەم تاوانە ئاگادار بکرێن و فشار بۆ پوچەڵکردنەوەی بکەن….