هەورێک! هۆنراوەی: ڕووزار
هەورێک’، هەورە
نەکەوێتە ژێر پێشبینیەکانەوە
من ئەو هەورەم خۆشدەوێ
وامەرحەبای باران ناکاو
نایەوێ کەس بیبینێ و
دەچێت لەدەشتێکی ڕوت و قووت
تێر تێر دەگرێ و
دەبێ بەعیسای
تۆوێکی مردوو،
هەورێک هەورە
نەکەوێتە ژێر پێشبنیەکان و
بەسواڵە سواڵی نوێژەبارانە کۆنەبێتەوەو
منەتی بارینمان بەسەردا نەکا٫
هەورێک لەچلەی هاویندا
نەبێ بەچەتری ماڵە لەق لەقێک
سروشت چۆن پڕنابێ لەتاوان،
کەی ڕەوایا
شێرێک بۆهەوەس
ملی ئاسکەیەک بشکێنێ و
گورگێک بەرخێک بدا بەتای شانیاو
سەر ژمێری بۆ دارستانێکە
شاژنی داستان ئاسکەبێ
نەک بەرازێکی ملکوڵ!
بایەک بایە نەبێ بەکۆیلەی
شەماڵی پەنجەرەی ژنێک
تا درەنگانێ نوستوە…
بەگڤەو یاری ناو سەرێک بەردەوام
بۆ شانەو ئاوێنە دائەنوێ٫
بایەک لەناو حەوشەدا خولی
دەست بەتاڵی لێ دا
چۆن دەبێ بەنوێنەری
کۆچی باڵندەکان و
پۆستەچی زەڕنەقووتە،
بایەک بایە لەکەلەی ئاسکەیەک بداو
بیکا بەخۆشەویستی گەریلا”
زمستان لەبەردەم دەست و قاچی کرێکارێک بنیشێتەوەو
بڵێ بمبورە لەخوێن ساردیم!
من ئەو ژنەم خۆش دەوێ
تائێستا زریزەی کچێنی نەپساندووەو
لێدانی چرکەکانی دڵی پێوە
قوڕمیشکردوە،
ژنێک بۆمۆڵەتی خۆشەویستی پیاو وەرگەڕێ
هەقوایە پیاو “پەنچەر”یش بوو
دڵی خۆی نەگۆڕێت!
لەقوتابخانە ژن وەکو
فەلسەفەو چارەیەک
بۆدەرون ناسازی پیاو بخوێنرێ
چونکو ئاماژەو داتاکان دەڵێن
پیاو هەزارباڵی هەبێت
دەدۆڕێت بەنیشتنەوەی ژنێک،
بەنیشتنەوەی ژنێک
سەدو یەک خەیاڵ یەخەت دەگرێ و
زۆرجار نازانیت بۆچی لەو شوێنەی٫
زۆرمان ئێستاش بەخەونی مناڵییەوە دەتلێنەوەو
ڕەنگێکی سور دەبینین
هەمان گوڵی مەکتەب و
دارگوڵەکانی دراوسێمان دێنەوە یادو
چەندجار دڕکی خۆشی پەنجەی بریندار کردوین
تاوەکو گوڵێکمان دەست کەوێ،
چەندجار ویستومانە گوڵێک بدەین
بەو مامۆستایەی والەگەڵمان هاوڕێ بوو،
خۆشەویستی بەزۆر ناچێتە گیرفانەوە
تۆوەکو کۆتر دانی شیعری بۆنەڕێژی
وەکو جۆگاو دەمی ڕووبار
نەیکەی بەهاوڕێی کەپرو کۆپری و
لەپاییزدا دەم و دۆت لەگەڵیدا خۆش نەبێ!
ئاخر هیچ وەکو دڵ و سەر
ناکەونە بەر تیرو تانە
کاتێ ڕوی مەسڵەحەت دەچەرخێنی ،
لەشوێن پەچای خۆشەویستی ژنێک
هەر ئایەتێکی جوانی تر بخوێنیتەوە
بەرخی تەمەنت لەنیوە ڕێگا گورگ دەیخوا!
ئیشق نەیڕێسی نابێ بەگڵۆڵە
بەدەوریدا نەسوڕێی
دڕک پێیەوە دەئاڵێ،
گشت دەنگێکی خۆش شەرت نیە
ببێ بەگۆرانی بێژو
شاعیر نابێ بەکۆترباز
بەڵام فەرزە کۆتری خۆشبوێ!
ناتکا بەخاوەن ماڵێکی بەختەوەر
بەڵام دەتکا بەئەکتەرێکی ناو بەرزترین قولەی خەیاڵ و
لەوانەیە نیگار کێش و
شاعیرێکی باش بین
بەڵام ئیشق و گیرفان
دوو هاوکێشەی دژە باون
دوو سیکەی قیتاری یەکتربڕن
من دابەزیم
تۆ دەبێ سەرکەوی…
کێ بۆنی شوشە عەتری شکاوی کردوە ؟!
لەبێزاریدا شەقی لەبەردی ڕێگاکان داوە،
بابڕواتەوە ماڵی تەنیایی و
کرێچی خەون و خەیاڵ
خۆشەویستی ختۆکەیەکی نامۆیە
سەدجار لەپێش ئاوێنە دەتگۆڕێ.