هەر رۆژە هەڵسوڕاوێکی بزوتنەوەی یەکسانیخوازی ژنان لەسەر هەمواری یاسای باری کەسێتی بۆ بۆپێشەوە دەدوێن بەڕێز (زانیار وەلی) توێژەر لە زانکۆی کۆیە
لە دوای ڕووخانی ڕژێمی بەعسی فاشیستی عێڕاق لە ساڵی ٢٠٠٣، و دامەزراندنی دەوڵەتی نوێی عێڕاق، لە ژێر ناوی دەوڵەتی فیدڕاڵی کە گوایە حکومەتی نوێی عێڕاق فیدڕاڵی دیموکراتیە و پێشکەوتووترە لە ڕژێمی فاشیستی بەعسی ڕوخاو. کەچی لە ناوەرۆکدا ئەم دەوڵەتە نوێیە دەوڵەتێکی مەزهەبی و تائیفی دواکەوتووە، و مەزهەبی شیعە زاڵکرا بەسەر دەوڵەتی نوێێ عێڕاق، و ڕۆژ بە ڕۆژ ئەم دەوڵەتە بەرەو دواکەوتوویی و کۆنەپەرستی زیاتر دەبەن. بەهەموو شێوەیەک هەنگاو دەندرێت بەرەو ئەوەی هاوشێوەی کۆماری ئیسلامی ئێرانی شیعە مەزهەب لە عێڕاقیش بێتە کایەوە. کە بەداخەوە لە هەندێک ڕووەوە دواکەوتووتریش!
لە نوێترین هەنگاوی ئەو ئایدۆلۆژیایە ئەوە بوو هەمواری یاسای باری کەسێتی ژمارە ١٨٨ ی ساڵی ١٩٥٩ ی عێڕاق بکەن، و خوێندنەوەی یەکەم ودووەمیشی لە پەرلەمانی عێڕاق بۆ کرا. بە شێوەیەک کە دەستکاری بڕگەکانی بکەن بەرەو یاسایەکی کۆنەپەرستی و دواکەوتوو کە لە جیهانی ئەمڕۆدا وێنەی نییە! بۆ نموونە ئەوەی کە وەکو سەردەمی کۆن مەلاکان بتوانن بەبێ دادگا ژن مارەبکەن لە دەرەوەی دادگا. هەروەها ڕێگە بدرێت منداڵی تەمەن ٩ ساڵ مارەبکرێت! کە گوایە ئەمە بەپێی شەریعەتی ئیسلامە و کچ لە تەمەنی ٩ ساڵیەوە پێدەگات، و دەتوانێت شووبکات و هاوسەرگیری پێکبهێنێت. ئەمە تاوانە دەچێتە قالبی دەستدرێژی بۆ سەر منداڵان، ٩ ساڵ بە هەموو پێوەرێک منداڵە و بیرکردنەوە و جەستە و توانای بڕیاردان و هیچ شتێکی منداڵێکی لەو تەمەنە ئامادە نییە بۆ ئەوەی هاوسەرگیری بکات.
ئەو بابەتە تاوانێکی گەورە و قێزەونە. ئەمە جۆرێکە لە بازرگانی و فرۆشتنی منداڵی کچ بە پیاوی دەوڵەمەندی هەوەسباز لەلایەن ئەو خێزانانەی هەژار و کەمدەرامەتن، و ناتوانن منداڵەکانیان بەخێوبکەن وەکو پێویست. کاریگەری زۆر خراپی لەسەر داهاتووی عێڕاق هەیە لەسەر کلتور و ڕەفتاری تاکی عێڕاقی کاریگەری زۆر خراپ دادەنێت. پێویستە لەسەر ڕێکخراوەکانی کۆمەڵی مەدەنی و زانکۆکان و لایەنە سیاسیەکان، ڕۆشنبیران و توێژە جیاوازەکان لە سەرتاسەری وڵات بەگژ ئەو هەوڵە ترسناکە کۆنەپەرستییەدا بچنەوە، و بە توندی بەرپەرچی هەر هەوڵێکی لەو جۆرانە بدرێت کە هەوڵ دەدەن زیاتر و زیاتر عێڕاق بەرەو دەوڵەتێکی دواکەوتوو ببەن.