پرسی رۆژ: بەڵێنەکانی هەڵبژاردن وجێبەجێکردنیان لەبەرنامەی حکومەتی داهاتووی هەرێمی کوردستان. بەڕێز( بەهزاد موحسین) چالاکوانی مەدەنی ئەم پرسەی بۆتاوتوێکردین.
هەڵمەتی هەلبژاردنی خولی شەشەمی پەرلەمانی کوردستان بەدەرنەبوو لەبەڵێندانی گەورە بەجەماوەری خەڵکی کوردستان. بەڵێنی سیاسی، کۆمەڵایەتی، ئابووری وماڵی وخزمەتگوزاری حکومەتی رەشید …تاد. بەتایبەت دووهێزی پارتی دیموکراتی کوردستان ویەکێتی نیشتمانی کوردستان. پێتانوایە بەرنامەی کاری حکومەتی داهاتوو دەگاتە ئاستی جێبەجێکردنی ئەو بەڵێنانانە؟
بەهزاد موحسین: وتەیەک هەیە دەڵێ، گرنگی مێژوو لەوەدایە، تا پەندی لێوەربگرین. ئێمە بە خوێندنەوەی ئەم پێنج شەش دەیەی ڕابردوی هێزی کوردی و هەر ڕێک (پارتی و یەکێتی)، وەک دوو کاراکتەری سەرەکیی ئەوسا و ئێستای گۆڕەپانی بەناو کوردایەتی، ئەوکاتە پشتیوانی و پشتگیرییان لە پەیام و دەسکەوتە نیشتیمانی و نەتەوەییەکان کردووە، کە ڕاستەوخۆ ئەو دەسکەوتانە یەکسان بووە، بە بەهێزبوونی پێگەی حیزبی و بنەماڵەییان.
هەر کاتێکیش هاوکێشەی خەبات بۆ بەدەستهێنانی دەسکەوتە نیشتیمانی و نەتەوەییەکە پێچەوانەی پێگەی حیزبییان بوبێتەوە، ئەوا بە دەیان بەهانەی لاوازی دۆڕاوانە پشتیان لە دەسکەوت و مەبدەئە ڕوکەشەکەیان کردووە و خەڵکیان جێهێشتوە و خۆیان بۆ ئەو دیوی سنورەکان ڕزگار کردووە. تەنانەت زۆر جار لە خۆ رزگارکردنێکی ئاساییش هەورازتر چوونە و ڕێک جاشایەتیان هەڵبژاردوە و دوژمنیان بۆ سەر خاک و سەروماڵی خەڵکی کوردستان هێناوە، سادەترین نمونەش ٦٦ و ٣١ی ئابە.
چەندین جاریش بە دروشمی شۆڕشگێڕی و کوردپەروەیانە خەڵکی ئاسایی و سڤیلیان هانداوە و خستونیانەتە بەرەی شەڕی دەستەویەخە و دواتر خۆیان بەرامبەر دوژمن شکاون و لە تەنگانەدا خەڵکی خۆیان جێهێشتوە، کە باش دەیانزانی ئەم خەڵکە سادە و شۆڕشگێرە دەکەونە بەر ڕەحمەتی زیهنیەتی چەوسێنەر و کوردکوژێکی وەک ڕژێمی بەعس. بۆ نمونە چۆڵکردنی سەنگەرەکانی بەرگریی شارەکانی هەولێر و کەرکوک و سلێمانی و دهۆک بە کەمترین بەرگری، دوای چەند ڕۆژێک ئازادکردنیان لە ڕاپەڕینی ١٩٩١.
دەزانم لە وەڵامی پرسیارەکەتان دور کەوتوومەتەوە، بەڵام ویستم بەم خوێندنەوەیەی سەرەوە، بۆ ناساندنی ماهیەتی نەهجی نیشتیمانی و نەتەوەیی ڕابردوی ئەم دوو حیزبە، ئاسانتر و ڕوونتر پێشبینی بەرنامە و کاری داهاتویان بکەین. ئەوان کە چەندین جار درۆیان لەگەڵ پەیام و مەبدەئەکەی خۆیان کردوە و بۆ مانەوەی خۆیان خاکیان ڕادەستی دوژمن کردوە، ئیتر زۆر ئاساییە، کە کابینە دوای کابینە هاوڵاتیانی خۆیان بێنازتر و برسیتر و زیاتر سەرکوت بکەن.
لە هێڵە سەرەکیەکانی ستراتیژی ژمارەی کابینەکان جیاوازیەکی ئەوتۆ نابینین، واتە وەک چۆن کابینەی پێنج درێژکراوەی کابینەی چوار بوو وکابینەی نۆش هی هەشت بوو و هەر ئاواش کابینەی دە درێژکراوەی کابینەی نۆیە.
بەو مانایەی هەمان پرۆگرام و پرۆسە و پلان و پیلانی دژەئازادی و قاچاغی بازرگانیی دەروازە سنوریەکان و دزی و چەتەیی لە بەرگی یاسای موزەییەفی کۆمپانیاکانیان و برسیکردنی خەڵک و تێرکردنی کوڕ و نەوەکانی خۆیان، جێبەجێ دەکەن.
هەر لە سەرەتای یەکەم حکومەتی ١٩٩٢ی دوای ڕاپەڕینەوە تا ئێستا، ئەم دەسەڵاتە چەتە و گەندەیە هەمان کابینەکانی حکومەتی هەرێمی کوردی بەسەر ژمارەدا دابەش دەکا، نەوەک ژمارە بە بەها جیاوازەکانیەوە دابەشی سەر کابینەکانی بکا، بۆیە هەر کابینەیەک دێ، ئەرکە دژە هاوڵاتیەکانی تەواو دەکا، کە کابینەکەی پێش خۆی کات ڕێی نەدابوو، تەواوی بکا. نەک ئەوەی وەک چۆن کابینەی نوێ لە ژمارە جودایە و لە نەهجی خزمەتگوزاری و خزمەتی هاوڵاتیانیش جیابێ و سەردەرە و ئاسۆیەکی ڕوون بە ڕووی هاوڵاتیەکانیدا بکاتەوە و سەردەمێکی نوێ بێنێتە کایەوە.
بە داخەوە بێئومێدم لەوەی بە کردار کابینەی دە خۆی لە کابینەکانی پێش خۆی جیابکاتەوە و بیسەلمێنێ، ئازادیەکی زیاتر بۆ تاک و مافێک بۆ خۆدەربڕین و گیرفانێگی گەرمتر بۆ هاوڵاتیانی ئەم هەرێمە بەرهەم بێنێ.