بریارێکی درەنگ وەختی دادگای نێودەوڵەتی بۆ چەند تۆمەتبارێکی جەنگ و جینۆساید!!
دادگای تاوانی نێودەوڵەتی، لە بەرواری ٢١ نۆفەمبەر فەرمانی دەستگیركردنی بۆ بنیامین نەتەنیاهۆ، سەرۆك وەزیرانی ئیسرائیل و یوئاڤ گالانت، وەزیری بەرگریی پێشوی ئەو وڵاتەو هەروەها محەمەد زەیف، فەرماندەی كەتیبەكانی عزەدین قەسام باڵی سەربازیی بزوتنەوەی حەماس دەركرد.
دادگای دادی نێودەوڵەتی سەبارەت بەو بڕیارە دەڵێت، فەرمانی دەستگیركردنیان بۆ نەتەنیاهۆ و گالانت بەهۆی ئەنجامدانی “تاوانی جەنگ” لە غەززە دەركردوە، لەوانە بەكارهێنانی برسیكردنی خەڵك وەكو چەك و هەروەها كوشتن و كۆمەڵكوژكردنی خەڵكی مەدەنی لە هێرشەكاندا بۆسەر غەززە…
بریاری دادگای نێودەوڵەتی بۆ نەتانیاهۆ و وەزیری بەرگریەکەی، هەم درەنگ وەخت و هەم زۆر کەمە… لەلایەکەوە پێویست بوو زۆر زوو هەم نەتانیاهۆ و وەزیری بەرگری بدرێنە دادگاو بریاری دەستگیرکردنیان بۆ دەربچیت، هەم سەرجەم کابینە جەنگی و بەرپرسانی تری مەیدانی بەتاوانی ئاشکرای وێرانکاری و کۆکۆژی لە غەززە، بریاری دەستگیرکردنیان بۆ دەرچوبایە، تا لانی کەم دەستیان بلەرزێت لەو هەموو تاوانەی رۆژانە ئەنجامی دەدەن و خەریکیشن هەمان تاوانکاری و کۆکوژی بگوازنەوە بۆ لوبنان و تەنانەت ئەگەر بۆیان بکرێت بۆ ناوچەکە…
ئەم بریارەی دادگای تاوانی نێودەوڵەتی گورزێکی کەمەر شکێنە بۆ دەسەڵاتی نەتانیاهۆ و سەرجەم دەوڵەتی ئیسرائیل… گومان لەوەدا نییە، گەیشتنی دادگای نێو دەوڵەتی بۆ بریاردان بە دەستگیرکردنی نەتانیاهۆ و وەزیری بەرگرییەکەی، بەجیا لە گوشاری فراوانی شەقام کە لە بزوتنەوەی دژە داگیرکاری و جەنگدا بەرجەستەبۆتەوە، هاوکات لە ژێر گوشاری رای فەرمیدایە لە ئاستی کۆمەڵگەی نێودەوڵەتیدا، بەتایبەتی کە دەوڵەتی ئیسرائیل بەجیا لەوەی پابەندی هیچ بریارێکی کۆمەڵگەی نێودەوڵەتی نابێت و تەرو وشک بەیەکەوە دەستوتێنێت، خەریکە هەمان تاوانکاری و کوشتار دەگوازێتەوە بۆ لوبنان. جیا لەوانە دادگای دادی نێو دەوڵەتی وەکو بەرهەمی دیموکراسی بۆرژوازی، لە ژێر گوشاری ریسوایی دیموکراسی بۆرژوازیدایە. ئەمریکا و غەرب بەکردەوە هاوکارو پشتیوانی ئەم کۆمەڵکوژییەی دەوڵەتی ئیسرائیلن. دنیا شاهیدی ئەو راستییەیە کە ئەگەر ئیسرائیل لە پشتیوانی بەردەوامی جبەخانەی سەربازی و مادی و مەعنەوی ئەمریکا و غەرەب بەهرەمەند نەبوایە، وە ئەوان لە ژێر ناوی” مافی بەرگری لەخۆکردن”دا، دەستیان بۆ جینۆسایدی خەڵکی فەلەستین و غەززە لەلایەن ئیسرائلەوە ئاوەڵا نەکردایە، دەوڵەتی ئیسرائیل زۆر زوو ناچار بەوە دەبوو، هەم دەستپاریزی بکات و هەم جەنگ رابگرێت و بچیتە سەر میزی گفتوگۆ. دادگای تاوانی نێو دەوڵەتی دەیەوێت شانی خۆی لەم شەرمەزاریە خاڵی بکاتەوە و دیموکراسی بۆرژوازی لە تاوانەکانی دەوڵەتی ئیسرائیل، داببرێت. کاردانەوەی خێرای دەیان دەوڵەت لە ئەوروپادا، بۆ جێ بەجێکردنی داوای دادگا و دەستگیرکردنی نەتانیاهۆ، نیشانەی ئەوەیە کە دەوڵەتەکانی ئەوروپاش هیچیتر ناتوانن بێدەنگە لەم تاوانکاریانەی ئیسرائیل بکەن کە ئیستا دەکرێت، بەتایبەتی بۆسەر لوبنان، ئەوە جیا لەوەی قڵشتی ئاشکرای خستۆتە وڵاتانی ئەوروپا لەلایەک و لەگەڵ ئەمریکاش لەلایەکی ترەوە.
دەوڵەتی ئیسرائیل و نەتانیاهۆ بەجیا لەوەی هیشتا بەکەمترین ئامانجیان نەگەیشتوون، ئاسۆیەکیش بۆ بە ئامانج گەیشتنیان لە ئارادا نییە، کەچی بۆ داپۆشینی ئەم شکستەیان هەموو هەوڵیک دەدەن، تا شکستییان بشارنەوە. بەڵام تاوانەکانیان هێندە زەق و بێ پاساون، خۆشخزمەتریین دادگا، ناتوانێت تا سەر چاوپۆشی لەو تاوانکاریانە بکات، بۆیە بۆ گێرانەوەی ئابڕوی خۆی و بەڵینامەیەک کە ئەم دادگایەی بۆپێک هاتووە، ناچارە ئەگەر درەنگ وەختیش بێت، هەڵوێستەیەک بکات. ئەم بڕیارە درەنگ وەختەش تەنها بۆ چەند تۆمەتبارێک لەناو دەیان تۆمەتباری تردا، هەڵوێستەیەکی کەمە، بەڵام بۆ ئیسرائیل و نەتانیاهۆ زۆر.
دیارە کاردانەوەی نەتەنیاهۆ راگەیاندنی بەوەی فەرمانی دەستگیركردنەكانیان “رەفتارێكی دژە جو” ە، “ئیسرائیل دەكاتە ئامانج”. پەی بردنە بەقورسی بریارەکە، بۆیە دەیەوێت ئەم بریارە لە دژی خۆی و وەزیری بەرگریەکەی وەکو هیرش بۆسەر ئیسرائیل و جوەکان بخاتە ڕوو، نەک بەرووی دوو تاوانباری چنگ بەخوێن و کەسایەتی کارای وەرێخسینی جینۆساید، کە قوربانییەکانی بەربەرچاوی دنیاو یەهودی و ئیسرائیلەکانەوە دیارە، نەتانیاهۆ دەیەوێت ئیسرائیلیەکان و جوەکان، بکاتە کەرەستەی ململانێ لە دژی بریاری دادگا و هاوکات دەیەوێت شانی خۆی و بەرپرسەکانی وەکو کاراکتەری دیار لەناو دەستەواژەی ئیسرائیلی و جوەکاندا، خاڵی بکاتەوەو بەرگێکی سیاسی بەو پرسە بدات، لەکاتێکدا لە بنەرەتدا ئەم بڕیارە یاسایی و دیاریکراوە لەسەر دۆسیەی ئاشکرای حاشاهەڵنەگر.
بۆپێشەوە