لێکەوتەکانی دواخستن و دابەش نەکردنی موچە، لە ئەستۆی دەسەڵاتی پارتی و یەکێتییە!
جارێکی ترو لە درێژەی بەردەوامی دواکەوتنی موچەو لێبرین و پاشەکەوتکردنیدا، تا ئێستا موچەی مانگی ئۆکتۆبەری فەرمانبەران دابەش نەکراوە. هەروەها هەرەشە لەسەر موچەی مانگەکانی داهاتووی ساڵی ٢٠٢٤ هەیە.
دابەش نەکردنی موچەو دواخستنی بەردەوامی موچە، لە کاتێکدا کرێکاران و کارمەندان و موچەخۆران بێ پسانەوە و خەریکی دەوام و کارکردنن، روداوێکی سادە و گێرانەوەی بەسەرهاتێک نییە، بەڵکو تاوانکارییەکی ئاشکرا و زیندوە بەرامبەر بە موچەخۆرانی هەرێمی کوردستان.
دواکەوتنی بەردەوامی موچەی فەرمانبەران، لە کاتێکدایە تا ئێستا دەیان جار سەرانی وردو درشتی پارتی و یەکێتی و لایەنەکانی تر رایان گەیاندووە کە کێشەی موچە چارسەرکراوە دوا ناکەوێت، لە هەڵمەتی هەڵبژاردنەکانیشدا، دیسان چ پارتی و چ یەکێتی، بەڵێنی چارسەرکردنی دواکەوتنی موچەیان دەدا، کەچی دیسان کیشەی دواکەوتنی موچە بەردەوامە و بۆتە مەترسیەکی گەورە لەسەر ژیان و گوزەرانی موچەخۆران.
پارتی و یەکێتی کە دەستیان بەسەر هەموو سامان و داهات و قوتی هاوڵاتیانی کوردستاندا گرتووە، و فەرمانبەرانیش لە هەرێمی کوردستان و لەژێر سایەی دەسەڵاتی هەردوو زۆنەکەدا خەریکی کاری خۆیانن، کەچی بە پاساوی جۆراو جۆر و بێ بنەما شانی خۆیان لە دابەش کردنی موچە خاڵی کردۆتەوە. یەکێتی کیشەی موچە دەخاتە سەرشانی پارتی و پارتییش هۆکارەکەی بۆ بەغدا دەگێرێتەوە، و قوربانیانی ئەم دۆخەش موچەخۆرانن.
نەبوونی موچە و دابەش نەکردنی یانی سەندنەوەی ژیانکردن لە سەدان هەزار خێزان، کە تاکە سەرچاوەی ژیان و گوزەرانیان کار و موچەکەیانە. لێکەوتەی نەبوونی موچە و گیرفانی خاڵی هەر ئەوە نییە کە فەرمانبەران ناچارن شتی ناو ماڵەکانیان بفرۆشن یان بکەونە پارە قەرزکردن لەم و لەو…. بەڵکو دەشێ ببێتە تێکدانەی شیرازەی خێزانەکان، ببێتە هۆکارێک بۆ دەستبردن بۆ کاری نەشیاوی ناچاری، ببێتە هۆی دەرهێنانی مناڵەکانیان لە خوێندن و پەروەردە، وە ببێتە سەرچاوەی زۆربوونی تاوان و تاوانکاری، ببێتە هۆی خۆکوژی و نائومیدی… ئەوەی لەهەموو ئەو لێکەوتانە بەرپرسیارە پارتی و یەکێتین.
موچەخۆرانی هەرێمی کوردستان، بەدژی ئەم هەلومەرجە بەردەوام خەریکی نارەزایەتی و کۆبونەوەی نارەزایەتی و مانگرتن و بایکۆت و یاداشت نووسین و … بوون. ئیستاش دوای گەمەی هەڵبژاردنەکان و بەڵینەکانی حزبەکان، پیویستە فەرمانبەران بە تین و تەوژمێکی نوێوە، درێژە بە نارەزایەتیەکانیان بدەن… کۆبونەوە نارەزایەتییەکان ببەنە بەردەم بارەگای سەرەکی حزبەکان و دەسەڵات، سەرانیان ریسوا بکەن، لەو جێگایانەی لە داهاتیان هەیە، دەست بەسەر داهاتەکاندا بگرن و لەرێگای کەسانی دڵسۆزەوە موچە کارمەندان و پێداویستی بەردەوامی ناوەندو دامەزراوەکان دابین بکەن… لەوە زیاتر پێویستە موچەخۆرانی هەرێم پشتیوانی بکرێن و بەتەنها جێ نەهێلرێن… دەکرێت کریکاران و کارمەندانی بەشەکانی تر بچنە پشت دواخوازییەکانیان و لەگەڵیان بن… دەسەڵاتی پارتی و یەکێتی، باکیان بە نەبوونی و ژیانی هاوڵاتیانەوە نییە، دەبێ بەهیزی جەماوەری و بە کاری رێکخراو بەزۆر مافەکانی خۆیان لە قورگیان دەربهێنن.
ئەگەر دەڵین داهات نییە، ئەو هەموو کەناڵە میدیاییە بەچی دەچەرخێن؟ ئەو هەموو سامان و سەروەتە لە کوێوە دەچیتە گیرفانی خاوەن کۆمپانیا و سەرمایەدارەکان و بەرپرسە حزبەکان؟ داهاتی فرۆشی نەوت بۆ کوێ دەچیت؟ داهاتی باج و رسومات، لای کێیە؟ کوا داهاتی خاڵ و دەروازە سنوریەکان؟ داهاتە ناوخۆۆەکانی تر بۆ کوێ دەچێت؟… تاد.
تاکە رێگا و تاکە ڕیگا، تەنها وەرێخستنی بزوتنەوەیەکی کۆمەڵایەتی فراوانە لەلایەن فەرمانبەران خۆیانەوە بۆ یەخەگرتنی دەسەڵات و پشتیوانی چینی کرێکار و بەشەکانی تری کۆمەڵگەیە، لێیان.
بۆپێشەوە