بەشێک لە ژینگە پارێزەرانی ڕانیە بەهۆی نەدانی موچەکانیان دەستیان دایە کۆبونەوەی ناڕەزایەتی!
جارێکی تر بەشێک لە ژینگە پارێزانی سنوری ڕاپەرین” قەڵادزی، رانیە، حاجیاوا” لەبەرامبەر بە دواخستنی موچەکانیان لەلایەن کۆمپانیاکانەوە، دەستیان دایە کۆبونەوەی ناڕەزایەتی… بەپێی لێدوانی چەند کرێکاریک ئەوە بۆ سێ مانگ دەچێت، موچەیان پێ نەدراوە. کرێکارانی ژینگە پارێز ئەو بەشە لە کرێکارانن، کە ئەرکی پاککردنەوەی گەرەک و شارو شارۆچکەکانیان پێ سپێرداوە و ئەگەر کاری تاقەت پروکێنی ئەوان نەبێت، شارو شارۆچکەکان و گەرەکەکان…. نوقمی خاشاک و پیسی دەبن و لەوەش زیاتر دەبێتە سەرچاوەیەکیش بۆ بڵاوبوونەوەی بۆنی ناخۆش و نەخۆشی…
لە کاتێکدا ئەم بەشە لە کرێکاران موچەکانیان لە ٣٠٠ بۆ ٣٥٠ هەزار تێپەڕ ناکات و ئەو موچەیە بەهیچ پێوەرێک نەک بەشی بەڕێوەچوونی خێزانێک، بەڵکو بۆ کەسیکیش لە دۆخی گرانی بازار و شمەک و خەستەخانەو پێداویستیەکانی ژیاندا، کەمە…. کەچی دیسان بە پاساوی جۆراو جۆر ئەو موچە کەمەش دابەش ناکەن و بۆ چەند مانگ دوای دەخەن.
دیارە ئەوە یەکەمین جار نییە، کرێکارانی ژینگە پارێز، رووبەرووی ئەو ستەم و تاڵانکاریییە دەبنەوە، بەڵکو لە چەند ساڵی رابردوودا یەکێک لە کیشەی سەرەکی کرێکارانی ژینگە پارێز لە کوردستاندا، پرسی دواخستنی موچەو دابەش نەکردنی بووە. دابەش نەکردنی ئەو موچەیەو دواخستنی، بۆتە مۆتەکەی سەر ژیان و گوزەرانی ئەو خێزانە کرێکاریانە… سەرمایەدارەکان و کۆمپانیا چاوچنۆکەکان، بە پشتیوانی حکومەت و دەسەڵاتی پشتیوانیان لەپێناو قازانجی زۆتر و زۆرتر و کەڵەکەی سەرمایەدا، چاو لەو ناحەقییە دەپۆشن و بیرێک لە مناڵ و خیزان و ژیان و گوزەرانی ئەم بەشە لە کرێکاران نادەنەوە و لێکەوتەکانی نەبوونی و برسێتی، درک ناکەن.
کرێکارانی ژینگە پارێزو سەرجەم بەشەکانی تری کرێکاران بۆ مافی رەوای خۆیان و موچە دواخراوەکانیان، ناچارن دەست بۆ مانگرتن و کۆبونەوەی نارەزایەتی ببەن و یەخەی کۆمپانیاکانیان بگرن بۆ وەرگرتنی موچەکانیان. لەو هەنگاوەشدا پێویستە بەشەکانی تری کرێکاران لە ژینگە پاریزانەوە تا کرێکارانی بەشەکانی تر پیشتیوانی لە کرێکارانی مانگرتوو ناڕازی بکەن و ریزی نارەزایەتیەکانیان بەهێز بکەن. لەوەش زیاتر پیویستە خەڵکی چ لە ئاستی گەرەکەکان و چ لە ئاستی شاردا، دەنگیان بخەنە پاڵ دەنگی کرێکارانی ژینگە پارێز تا گوشار بخەنە سەر کۆمپانیاکان، بۆ ئەوەی موچەی کرێکارەکان لەکاتی خۆیدا دابەش بکەن.