هەژماری من و تەوتین…لە گەمەی ململانێی سیاسی نێوان پارتی و یەکێتی و هەرێم و بەغدادا!
لە کاتێکدا موچەخۆران بەدەست دواکەوتنی بەردەوامی موچەی مانگانەیانەوە دەناڵێنن و بەکردەوە کراونەتە چاودێری درۆ دەلەسەی بەرپرسان و هاموشۆ و کۆبونەوەی بێ برانەوەی شاندی هەرێم و بەرپرسانی بەغدا. هاوکات هەمیشە باسی چارەسەری پرسی موچە دەکرێت، کەچی نەک پرسی دواکەوتنی موچە ئاسۆیەکی دیار نییە، بەڵکو ململانێی نیوان دەسەڵاتی هەرێم و دوو زۆنەکە لەسەر “هەژماری و من””تەوتین” لەلایەک و ململانێ بەغدا و هەرێمیش لەسەر چۆنیەتی دابەشکردنی موچە لە رێگای بانقەکانەوە بۆتە گرفتیکی سەربار. جیا لەوانە هەموو مانگێک باسی کەموکوری لە لیستی ناوی موچەخۆران، ناوی دوبارە و کەم و کوڕی تر … بونەتە هۆکاری ئەوەی موچە دوابکەوێت.
لە سەرەتای ئەمساڵەوە و لەسەر سكاڵای ژمارەیەك لە موچەخۆرانی هەرێمی كوردستان، دادگای باڵای فیدراڵی عێراق بڕیاریدا موچەی موچەخۆرانی هەرێم لە بانكە فیدراڵییەكانی عێراق تەوتین بكرێت و لەلایەن حكومەتی عێراقەوە دابین بكرێت، لە بنەرەتەوە ئەو بڕیارە بەو پاساوە پەسەندکرا کە موچەی موچەخۆرانی هەرێم لە ململانێی سیاسی نێوان هەولێرو بەغداد دوربخرێتەوە، کەچی بەجیا لەوەی ئەم ململانێیە لە نێوان دەسەڵاتی هەرێم و بەغدادا ماوەتەوە، هاوکات ناكۆكییەكی نوێی هێناوەتەوە ئاراوە لەسەر ئەوەی ئایا پرۆژەی “هەژماری من” یان “تەوتین” و بانكە فیدراڵییەكان، بەرپرسیاریەتی دابەشکردنی موچە بگرنە ئەستۆ. هەروەها ئەو ململانییە لە نێوان هەژماری من و تەوتین، گواستراوەتەوە بۆ ناو خانەوادەی بۆرژوازی کورد و دوو زۆنی دەسەڵاتدارێتیەکە… پارتی هەژماری من بەدەستەوە گرتوەو یەکێتی پێدارگری لەسەر دابەشکردنی موچە لەلایەن بانقە عێراقیەکان” تەوتین” دەکات.
ئەوەی چاوەروانکراویشە، حکومەتی هەرێم لە هەولێر دەسەڵاتی بەسەر زۆنی سەوزدا نییە، بریارەکانی بەجێگایەک ناگات و دەسەڵاتی ئەو زۆنە کارکردن بە هەژمارەی من رەتدەکاتەوە و هەولیریش لە رێگای حکومەتەوە هەرەشە لە دام دەزگاکانی زۆنی سەوز دەکات، کە پابەندی هەژماری من و بریاری حکومەت بن.
لەم نیوەدا دابەشکردنی موچە بۆتە گرفتێکی تری سیاسی لە نیوان پارتی و یەکێتی و بۆتە مۆتەکەیەکی تری سەر سنگی موچەخۆرانی هەرێم… موچەخۆرانی هەرێم و سەرجەم خەڵکی کوردستان و دوو زۆنەکە، پیویستە بەرووی ئەو ململانییەدا بچنەوە کە سفرەو گیرفانی ئەوانی کردۆتە بارمتەی کێبەرکێی ئەم دوو دەسەڵاتە چاوچنۆک و مافیایەی بزوتنەوەی کوردایەتی.
موچەخۆرانی هەرێم مافی خۆیانە موچە و شایستە داراییەکانی خۆیان لە کاتی خۆیدا و بێ لێبرین وەربگرن و نەکرینە زەخیرەی ئەو ململانێیەی نیوان بەغدا هەرێم و دەباشان و سەری سەری ڕەش.