پرسی رۆژ هەڵبژاردنەکانی کوردستان و کاریگەری میدیا لە هەڵبژاردنەکان و لەسەر کۆمەڵگە… هاوڕێ شوان سدیق رۆژنامەنووس وەڵامی پرسیاری رۆژی داوەتەوە
پرسی رۆژ لەگەڵ ڕۆژنامەوان (شوان سدیق)، دەربارەی هەڵبژاردنی پەرلەمانی کوردستان، ڕۆڵی میدیا لە بانگەشەی هەڵبژاردن و چاوەڕوانی خەڵکی کوردستان، لەو گۆڕانکاریانەی کە چاوەڕێ دەکرێ ڕووبدەن.
“لە کوردستان، دەسەڵات لەهێزی چەکدارەوەیە، نەک دامەزراوەی سیاسی و یاسایی”
“سۆشیال میدیا کاریگەری لەسەر بەربژێرەکان هەیە”
“پارتی و یەکێتی، نابنە ئۆپۆزسیۆن، ڕێکەوتنی ناچاری دەکەن”
پرسیی رۆژ: بانگەشەی هەڵبژاردنی ئەمجارەی پەرلەمانی کوردستان، لەسەر ئاستی میدیا چۆنە؟
شوان سدیق: بانگەشەی ئێستە لەڕووی میدیاوە، بەراورد بەساڵانی ڕابردوو گۆڕاوە. ئەمڕۆ سۆشیال مێدیا بووەتە سەکۆیەک لایەن و بەربژێرەکان بە باشی دەتوانن پەیامی خۆیان لەسەر ئاستی تاک و لیست بگەیەنن.
دیارە سۆشیال مێدیا کاریگەری زۆری لەسەر گەیاندنی پەیامی بەربژێرەکان هەیە، دەتوانین لەڕێگەی سۆشیال مێدیاوە بەبێ ویستی ئێمە بەربژێرەکان داوای دەنگ لە هاوڵاتیان بکەن، باسی پرۆژەو؟ کاری خۆیان بۆ داهاتوو دەکەن.
هەر بەڕێگەی سوشیال مێدیاش هاوڵاتی دەتوانی بەڵێن یان بەربژێرەکان ڕەتبکاتەوە، بەربژێرەکانیش بەڕێگەی سۆشیال مێدیا پەیامی گەشبینی یاخوود دڵتەنگیان پێدەگات تاچەند هاوڵاتی لەگەیاندن و پشتیوانیان دەکەن.
پرسی رۆژ: لەرووی راگەیاندنەوە، هەموو جۆرەکانی بانگەشەی هەڵبژاردن چۆن هەڵدەسەنگێنی راگەیاندنی حزبی وسێبەر وسەربەخۆ؟
شوان سدیق: لە هەرێمی کوردستان، مێدیای سەربەخۆ نییە، ئەوەی هەیە مێدیای فەرمی حزب، و سێبەرە. دیارە مێدیای حزب ئاراستەی کارکردنیان دیارە، و بەرپرسیاریەتی زیاتر هەڵدەگرن. مێدیای سێبەر ئەرکی زۆریان پێدەسپێرن دەیانەوێ وەها دەربکەون بێلایەنن و تەرەفگیرنین. بەڵام لەلایەکی دیکە زۆر خراپ لایەنگر و تەرەفگیر دەردەکەون. ئەم جۆرە مێدیایانە کاریگەریان زیاترە لەنێو کۆمەڵگە، و دەتوانن شەقام بجووڵێنن. مێدیای سێبەر لەم کاتی بانگەیەشەدا تاڕادەیەک هەوڵیانداوە، بەربژێرەکان لە کەسی جیاواز و لیستی جیاواز لە خۆیان کۆبکەنەوە. ئەوە بارودۆخی سیاسی و کۆمەڵایەتەکەیە لەدۆخی ئێستە پڕیەتی لە قەیران، مێدیاکەشی بەخۆیەوە سەرقاڵکردوە، بەتایبەتی مێدیای سێبەر، چونکە مێدیای سێبەر ڕۆڵی زیاتر دەبینێ و لەسەر ئاستی سیاسیش حزبەکان ڕەواجی پێدەدەن.
پرسی رۆژ: ئایا راگەیاندن رۆڵی پسپۆری خۆی بینیوە لە گەیاندنی پەیامی پرۆسەی هەڵبژاردن؟
شوان سدیق: ئەمڕۆ مێدیا لە کوردستان، لەڕووی جۆرو چۆنایەتی زۆر گۆڕانی بەسەرهاتووە، گۆڕانێکی نوێ و کوالێتێکی باش و کەسانی پسپۆڕ کاری تێدا دەکەن، بەڵام وەکو گەیاندنی پەیام و چۆنێتی کارکردن، نەگۆڕاوەو ناگۆڕێ، دواجار کاری مێدیاکان ڕەنگدانەوەی سیاسەتی کۆمەڵگەو ژیانی خەڵکە. ڕاگەیاندن نایەت ڕێگایەکی باشترو جیاوازتر لە پەیامی حزبەکان پێشانی کۆمەڵگە بدات، چونکە ڕاگەیاندنەکان هەمووی هی حزبە. ڕاگەیاندن کاتێ جیاواز دەردەکەوێ و پەیامێکی پەروەردەی تەندروستی پێ بکات، دەبێ ئەو ڕاگەیاندنە نیشتمانی بێ، بەڵام ڕاگەیاندنی ئێمە نیشتمانی نین، ڕاگەیاندنی حزبن و ڕاوی بینەروبیسەر دەکەن!
پرسی رۆژ: بەبۆچوونی تۆ هیچ گۆڕانکاریەک ڕوودەدات لەهەڵبژاردنی ئەمجارەی پەرلەمانی کوردستان.
شوان سدیق: هەردوو حزبی باڵادەست هەموو جارێ، ٥١ کورسیان هێنابێ، پێکەوە دەبن، گرنگن نییە ١٦ بەرامبەر ٣٥ کورسیش بێ. هەردوو هێز کەسیان نایانەوێ لەدەرەوەی دەسەڵات بن، چونکە ئەوان هێزیان هەیەو هەرێمیش دەسەڵاتی لەهێزەوە سەرچاوەی گرتووە! نەک لەدامەزراوەی سیاسی و یاسایی.
سەیری یەکێتی لەسێ قۆناغی جیاواز هەر دەسەڵات و دەسەڵاتی هەبووە، ئەو سیناریۆیانەش بەسەر پارتی دووبارە ببنەوە هەمان شتن!
پێموایە گۆڕانکاریەکی ئەوتۆ ڕوونادات، قەیرانە سیاسیەکان درێژەیان دەبێ، هیچ لەژیانی سیاسی و ئیداری هەرێم ناگۆڕێ، هەلومەرجی ناوچەکە وادەخوازێ هەرێم، بەدوو زۆنی ڕۆژئاواو ئێران بمێنێتەوە، واتە هەر دوو ئیدارەیی بێ، سێکتەری ئابووریش بەشی زۆری دەکەوێتە دەست عێراق، بەڵام جێگیر نابێت.