خەڵکی کوردستان نابێ ڕیگە بدەن کەشی ترس و تۆقاندن و نائارامی سایە بکاتە سەر شوێنی کارو ژیانیان….
دەستپێکی بانگەشەی هەڵبژاردنەکان، بەسوکایەتی و بێ ڕێزی و شکاندن و ناو زراندن و هەڵدانەوەی فایلی تاوانکارانەی یەکتری دەستی پێکرد، لەگەڵ چوونە پێشەوەی بانگەشەکان و نزیکبوونەوی هەڵبژاردنەکانیش ئاستی جنێو و سوکایەتی و ناوزراندن و هەڵدانەوەی دۆسیەی تاوانکارایانەی یەکتریش روو لەهەڵکشانە… ئەم جۆرە لە بانگەشەی هەڵبژاردن، بەجیا لە ناوەرۆکی چینایەتی و تایبەتمەندێنی ئەو حزب و لایەنە سیاسیانە، بەرهەمی نەبوونی هیچ بەرنامەو پلاتفۆرمێکە بۆ پرس و کێشە زۆر و زوەندەکانی کۆمەڵگەی کوردستان. حزبە سیاسیەکانی بەشدار لەم سیستەم و دەسەڵاتە سیاسییە، کە هۆکاری گرانی و نەبوونی و هەژاری و برسێتی و نەبوونی موچە و خزمەگوزارییەکان و مافە فەردی و مەدەنییەکانی هاوڵاتیان و سەرچاوەی پشێوی و دەستێوەردانی دەرەکی و راگرتنی کوردستانن لە دۆخێکی نەخوازراوی بی ئاییندەدا، ناتوانن ببنە فریاد رەس و وەڵامدەرەوەی هیچ خواست و مافێکی هاوڵاتیان. بۆیە لە جێگای پلاتفۆرم و بەرنامەی هەڵبژاردن، خەریکی دروشمی سیاسی پوچ و جنێو بەخشینەوە و سوکایەتی بەیەکتر کردنن، هێندەش تۆماری تاوانکاری تاوانکارانەیان هەیە، کە دەتوانن هەر رۆژە دۆسیەیەکی یەکتری هەڵبدەنەوە و بیخەنە روو.
ئەم جۆرە لە بانگەشەی هەڵبژاردن نیشانی دەدات کە خودی هەڵبژاردن لە ژێر سایەی ئەم دەسەڵات و حزب و لایەنە سیاسیانەدا، لە جێگای ئەوەی رێگایەک بێت بۆ ئاڵوگۆر و دەروازیەک بێت بۆزاڵ بوون بەسەر گرفتەکان و وەڵام دانەوە بە رێگرییەکان، خۆی کۆسپێکی بەردەم کۆمەڵگەی کوردستان و لەمپەری بەردەم ئاڵوگۆر و ژیانێکی باشترە… لەوەش زیاتر مەترسییە بۆسەر ئارامی کۆمەڵگە.
لە ئێستادا کە هەڵبژاردن نزیک دەبێتەوە، لایەنەکانی دەسەڵات خەریکی سازکردنی سیناریۆی ساختەن و کەڵک لەهەموو کەنال و تواناییەکی تەکنەلۆژی و زانستی وەردەگرن بۆ سوککردنی یەکتری و بیانوو سازکردن بۆ پەڵپ بەیەکتری گرتن و رەتکردنەوەی ئاکامەکانی هەڵبژاردن. ئەمەش مەترسییەکی گەورەیە بۆسەر کۆمەڵگەو لیخنکردنی… ئەم شێوازە لە مامەڵە لەگەڵ هەڵبژاردن، ئەو راستییە دەخاتە روو کە هیچ هەڵبژاردنێک لە دۆخی سیاسی هەرێمی کوردستان، بەشێوەی ئاسایی خۆیدا ناچیتە پیشەوە و ئاکامی هەڵبژاردنیش، رەنگدانەوەی هەڵبژاردن و دەنگی هاوڵاتیان نییە، ساختەکردن، تەزویر بۆکردن، لە پاڵ بەبارمتەگرتنی قوتی خەڵک، ناچارکردنی خەڵک بە دەنگدانی بەزۆر و بە لیستی دیاریکراو، تا دەگاتە پارە بەخشینەوە و کارت کرێن و دەنگ کرین… گۆشە بەگۆشەی ئەو رەفتار و نەریتەیە کە پوچی گاڵتەجاری هەڵبژاردن دەخاتە روو.
خەڵکی کوردستان، پێویستە بە هوشیارییەوە مامەڵە لەگەڵ بانگەشەکانی هەڵبژاردن و هەڵمەتی درۆبەخشینەوە و گرژییەکان بکەن و ڕیگە نەدەن، کەشی شار و شارۆچکەکان نائارام و خەڵکەکەی توشی دڵە ڕاوکی بکەن… وەستانەوە بەرووی ئەو هەموو بێ رێزی و سوکایەتی و ناو زراندن و ساختەکاریی و ئامادەکارییەی بۆ بیانوو هێنانەوە بۆ دواخستن هەڵبژاردن یان بۆ رەتکردنەوەی ئاکامەکانی دەکرێت، کارێکە دەبێ لەچوارچیوەی نارەزایەتی و وەستانەوە بەرووی گاڵتەجاری هەڵبژرادندا، دەستی بۆ ببرێت و گاڵتەجاری هەڵبژاردنەکان بە شکست بکێشێت.
بۆپێشەوە