واز لە بەڵێن و دروشمی سیاسی پوچ بۆ دوای هەڵبژاردن بهێنن، موچەی مانگی ٩ ی فەرمانبەران دابین بکەن!!

لە کاتێکدا سەرانی وردو درشتی بۆرژوازی کورد، بەتایبەتی پارتی و یەکێتی لە هەڵمەتی بانگەشەی هەڵبژاردندا خەرکی بەخشینەوەی بەڵین و درۆو فریوکارین و باسی ئاوەدانی و ئارامی و خزمەتگوزارییەکانیان دەکەن، کەچی پرسی دابینکردنی موچە بۆتە مۆتەکەی سەر سنگی فەرمانبەران و رۆژ بەرۆژ بەدەست دواکەوتنی موچەوە بەڕیوەچوونی ژیان و گوزەرانیان سەختر و سفرەی ماڵەکانیان کەم رەونەقتر و خاڵی تر دەبێت. ئەوە ناوەراستی مانگی ١٠ یە موچەی مانگی نۆ دابەش نەکراوە… ئەوە هەموو لە کاتێکدایە کە گرانی بازار بێداد دەکات و کەمترین خزمەتگوازری لە کۆمەڵگەدا نەماوە… خەستەخانە گشتییەکان بەرەو نەمان و خەستەخانەی تایبەتی دەستی ناوەتە گەروی هەر خێزانێک کە کەسێکیان توشی نەخۆشی ببێت. سەرەتای ساڵی تازەی خوێندنەو کەرتی خوێندن و پەروەردە بەرەو وێرانی دەچیت و پیداوستی خوێندن، یەخەگیری خوێندکاران و خێزانەکانیانە. هەروەها هێشتا کیشەی ئاو و کارەبا چارەسەر نەبووە روبەرووی زستان و سەرماین و باسێک لە دابەشکردنی نەوت بە خۆرایی یان بە نرخێکی رەمزی نییەوە. سەیرە خەڵک ئیستا کیشەی هەیەو چەندین داخوازی خێرای هەیە، کەچی دەسەڵاتی تاڵانچی و مافیایی کورد، لە جێگای وەڵامدانەوە بەو داخوازییە سەرەتایی و دەست بەجێیانە، بەڵینی گەورە گەورە بۆ داهاتووی نادیاریان دەخە روو… ئەوەش نیشانەی ئەوەیە کە دەیانەوێت لە ڕیگای بانگەشە وبەڵینی دروزنانە، پەنجە مۆری هاوڵاتیان بۆ دوبارە داسەپاندنەوەی دەسەڵاتیان بەسەر سەری خەڵکی کوردستاندا بسەپێنەوە، و دواتریش خۆیان لە سەرەتاییترین خواست و ویستی هاوڵاتیان بدزنەوە. بێ هیچ ئەمما و ئەگەرێک پیویستە موچەخۆران موچەی مانگانەی خۆیان لە کاتی خۆیدا وەربگرن و چیتر کایە بە ژیان و گوزەرانیان نەکرێت.

لە کاتێکدا سەرچاوەکانی داهاتی کوردستان لە نەوت و باج و رسومات و…تاد، داهاتی بەغدا دەچیتە خەزێنەی پارتی و یەکێتی کەچی هیچ ئاسۆیەک بۆ چارەسەری پرسی موچەی فەرمانبەران لە ئارادا نییە و بۆتە گرفتێکی گەورەی بۆ بەڕیوەچوونی ژیان و گوزەرانی هاوڵاتیان و لە جوڵەخستنی جموجۆڵی بازار…

بەخشینەوەی بێ سنوری بەڵێنی درۆ و فریوکاری بۆ دوای هەڵبژاردن، لە کاتێکدا موچەی فەرمانبەران لە کاتی خۆیدا دابەش ناکرێت و مانگەکان دریژ دەکرێنەوە بۆ ٤٠ رۆژ و پەنجا رۆژ و زیاتر، نیشانەی ئەوەیە کە ئەو دەسەڵاتە خوی بە درۆ و خۆدزینەوە لەمافی زۆر سادە و رەوای هاوڵاتیان گرتووە، بۆیە پیویستە فەرمانبەران بە بایکۆت و بەشداری نەکردن لە هەڵبژاردن و لەوەش زیاتر بە وەرێخستنی کۆبونەوەی نارەزایەتی لەبەردەم دامودەزگا پەیوەندیدارەوکان و دەسەڵات، لەلایەکەوە گاڵتەجاری هەڵبژاردن بەشکست بکێشن و لەلایەکی تریشەوە گوشار بخەنە سەریان تا موچەیان پێ بدرێت.