کوڕانی ملیۆنێری باوکی هەژاران، گردکە میراتی باوکمانە و هەر کات ویستمان دایدەخەین!
لە ناو جەرگەی ئەزمەیەکی قوڵی سیاسی و رێکخراوەییدا کە بزوتنەوەی گۆڕان دەرگیریەتی و گۆرانی کردۆتە چەند خەت و باڵی پێک ناکۆک، کوڕانی نەوشیروان مستەفای باوکی هەژاران لە ململانیی ناوخۆی خۆیاندا، دەرگای سەرەکی مەکۆی گۆڕانیان داخست. پاساوی داخستنی ئەم دەرگایە هەر چییەک بێت، هیچ خەوشیک ناخاتە سەر ئەو راستییە، کە کوڕانی نەوشیروان مستەفا گردەکە بە موڵکی بۆ
بە میرات بەجێماوی باوکیان دەزانن، هەروەک و چۆن سەرجەم سەروەت و میراتە ملیۆنیەکەی بەر لە مردنی خستە سەر کوڕەکانی.
نەوشیروان مستەفا، بە خۆنمایش کردنی وەکو کەسێکی خاکی و تێوە نەگلاو لە گەندەڵی و دزی و تاڵانی، و دژایەتیکردنی تەوریسی سیاسی، توانی خەڵکێکی زۆر لەکاتی جیابوونەوەی لەیەکێتی و لە پرۆسیسی دامەزراندنی گۆڕاندا لە خۆی کۆبکاتەوە. کەمیش نەبوون ئەو نووسەر و قەڵەم بەدەستانەی هێندەی بۆیان لوا، بە شان و باڵی کاراکتەری نەوشیروان مستەفادا هەڵیاندا و ویستیان نازناوی باوکی هەژارانی بەسەردا ببڕن، و وەکو کاراکتەرێکی دژ بە دەسەڵاتی بنەماڵەیی نیشانی بدەن، بەڵام بەر لە مردنی بەگواستنەوەی سەروەت و سامانە ملیۆنیەکەی و بە تاپۆکردنی گردی زەرگەتە لەسەر کوڕەکانی، هەم خاکی بوون و سادەبوون تێوە نەگلانی خۆی لەدزی و گەندەڵی و هەم وەستانەوەی بەرووی دەسەڵاتی بنەماڵەییدا سفر کردەوە. تەنانەت ئەو کاریزما بوونەی لەناو گۆڕان و بزوتنەوەی کوردایەتیدا هەیبوو، کردە بڵقی سەر ئاو. دوای مردنی نەوشیروان مستەفاش کەم نەبوون ئەوانەی باسیان لە درێژەدان بە ڕیبازی نەوشیروان دەکردو کورەکانیان وەکو “حەسەن و حوسێن”ی کوڕانی “ئیمام عەلی” ستایش دەکرد، کەچی ئێستا خەریکن باجی ئەم کورت بینی و ڕوانینە پێ لەهەوایەیان دەدەن.
داخستنی دەرگای مەکۆی سەرەکی مەکۆی گۆڕان لەلایەن کوڕانی نەوشیروان مستەفاوە، لە لایەکەوە ماهیەتی پوچێ بزوتنەوەی گۆڕان و رەوشتی سیاسی دارزیوی ئەو بزوتنەوەیە لە ناکۆکی سیاسی ناوخۆی دەخاتە روو، لەلایەکی تریشەوە بە هەق ئەوە نیشان دەدات کە گردەکە موڵکی شەرعی بنەماڵەیە… ئەم رەفتارەی چیا و نما، ئەوە بەبیر دەخاتەوە، کە کاتێک یەکێتی و نەوشیروان مستەفا، نیگەرانی کار و چالاکی حزبی کۆمۆنیستی کرێکاری عێراق بوون، لە ساڵی ٢٠٠٠ دا، بە بریاری نەوشیروان مستەفا، بەر لە هێرشی چەکدارانە، ئاو و کارەبا و تەلەفۆنی نووسینگەکانی حزبیان بڕی، کاتێک پرسیار لە نەوشیروان کرا کە بۆ ئاو و کارەبا و تەلەفۆنی نووسینگە و بارەگاکان بڕاوە، بە ڕاشکاوی لە وەڵامدا وتی، ئاو و کارەبا و تەلەفۆنی خۆمانەو نایدەن بەئیوە!!… نەوشیروان و سەرانی تری بزوتنەوەی کوردایەتی کاتێک ئاو کارەبا و خزمەتگوازری بە موڵکی خۆیان بزانن، وەکو چەکیک لەدژی نەیارانیان و بەدەستیەوە بگرن، ئەوەش ئاساییە کە مادام تاپۆی گردەکەیان هەیە، دەرگاکەی دابخەن و بڵێن هێ ئیمەیەو نایدەین بەئێوە. یان هەروەکو چۆن کورانی تاڵەبانی دەزگای چاودیر و بنکەی گەلاوێژیان لە ململانیی خۆیان لە مەلا بەختیار وەرگرتەوە.
بزوتنەوەی گۆڕان و گەیشتنی بەدۆخی ئەمڕۆی لە بنەرەتدا سیاسییە و ئەم رەفتارانەش دەرهاویشتەی ئەو بن بەستە سیاسی و ریكخراوەیەن، کە ریشەی لە بێئاسۆی سیاسی و نەبوونی دیدێکی دیار بۆ داهاتوودا هەیە.. دیارە پرسی رابەری و کاراکتەرێک کە سەرانی کۆبکاتەوە و ببێتە چەسپی راگرتنیان، هۆکارە بۆ قوڵبونەوەی ناکۆکی ناوخۆیی بەدوای مردنی نەوشیروان مستەفاوە.
گۆران بووە بە رابردوو، رابردویەک کە ناتوانرێت بگێردرێتەوە، بەتایبەتیش دوای ئەوەی نەوشیروان مستەفا بەر لە مردنی هەم وەکو ملیۆنیر مرد و هەمیش ئەلگۆی بنەماڵەیی کردە میراتیكی پیرۆز!!…. بۆ گۆڕانخوازان!!.