حەسەن نەسروڵا کوژرا، کێشەی خەڵکی فەلەستین زیندووە!
لە چوارچێوەی هێرشی بەردەوامی دەوڵەتی ئیسرائیل و کردەوە ئینسانکوژ و تیرۆریستیەکانیدا، بە جیا لە کوشتاری بەردەوامی خەڵکی سفیل و بێتاوان و خاپورکردنی شوێنی کارو نیشتەجێ بوونی هاوڵاتیان، هاوکات چەندین فەرماندەی سەربازی و حەماس و حزب اللە، هاوکات حەسەن نەسروڵا، ئەمینداری حزب اللە، کوژرا. ئەم کوشتارە بەردەوامەی دەوڵەتی ئیسرائیل بە پشتیوانی ئاشکرای ئەمریکا و غەرب و بەدیاریکراوی ئەمریکا دەچیتە پێشەوە، هیچ بۆ
نیشانەیەک لە سەرکەوتنی ئیسرائیل ناخاتە ڕوو، بەڵکو لە بنەرەتدا کارانەوەیەکی بە نەخشەی ئەو شکستەیەکە دەوڵەتی ئیسرائیل روو بەروویەتی.
لەگەڵ ئەوەدا دەوڵەتی ئیسرائیل زۆر بە تواناییە سەربازیی و تەکنۆلۆژیاکەیەوە دەفشێت، بەڵام ئەم کوشتارە کوێرانە بەکۆمەڵ و هیتلەرییە، بەر لەوەی نیشانەیەک لە پێشرەوی و سەرکەوتنی ئیسرائیل لە باری سەربازییەوە بخاتە ڕوو، کاولکاری و جینۆسایدیکی نوێ لە دنیای هاوچەرخدا نمایش دەکات. کە هێندەی لەو رێگایەوە ئینسانیەتی ئەم سەردەمە دەخاتە بەردەم ترس و ئابرووی بی ئابڕووی دیموکراسی بۆرژوازی دەبات، هێندەش شکستی دەوڵەتی ئیسرائیل و دەوڵەتەکانی پشتیوانی، لە ئامانجەکانیاندا دەخاتە روو.
بریار بوو دەوڵەتی ئیسرائیل، حەماس لە بەین ببات و بارمتەکان ئازاد و هەیبەتی تیكشکاوی لە ئاستی ناوچەکەو ناوخۆی ئیسرائیل و دنیادا، بۆخۆی بگێرێتەوە و بەر بە کاردانەوە و بەرگری خەڵکی فەلەستین بگرێت، کەچی نە حەماس کۆتایی هاتووەو نە بارمتەکان ئازاد بوون، نە هەیبەتی تیکشکاوی ئیسرائیل، ئابروی بۆ گەڕاوەتەوە و نە نیشانەیەک لە پاشەکشەی بەرەنگاری حەقخوازنەی خەڵکی فەلەستین لە مافەکانی دەبینرێت. ئێستا دەوڵەتی ئیسرائیل زیاتر لە هەمیشە لە چاوی هەموو ئینسانێکی ئازادیخوازو ئینسان دۆست لەسەراسەری دنیادا، رەمزی گورگێکی بریندار و لەدەست دەرچووە، کە پەلاماری وەحشیانە دەدات و هەر رۆژێک کورەی ئینسان کوژی گەرم تر دەکات و شێوەی نوێی قەسابی بوونی خۆی دەخاتە ڕوو.
ئەم کوشتار و درندەییەی دەوڵەتی ئیسرائیل، ژینگە و زەمینەی بەیەکدادانەکانی داهاتوو نەخشە رێژ و ئاییندەی ململانیی لەگەڵ رەوتە ئیسلامی و قەومی و خەڵکی فەلەستیندا درێژ تر خوێناوی تر دەکات و پرسی چارەسەری کیشەی فەلەستینیش ئاڵۆزتر دەکات.
کیشەی فەلەستین، لە بنەرەتدا دەرهاویشتەی داگیرکاری دەوڵەتی ئیسرائیل و پشت کردنە لە چارەسەری سیاسی و کارساز و تەنانەت گوێنەدانە بەدەیان بریاری نەتەوە یەکگرتوەکان!! بۆ چارەسەری ئەم کێشەیە. دەوڵەتی ئیسرائیل لە رێگای کوشتار و تیرۆریزمێکی هەوسار پچراوی پشتیوانی کراوی ئەمریکا و غەرب، دەیەوێت خۆی لە چارەسەری کێشەی فەلەستین بدزێتەوە، بەڵام داگیرکاری دەوڵەتی ئیسرائیل و ئەو تیرۆریزمە بی سنور و بەربەری ئاساییە، نەک کیشەی فەولەستین و پرسی چارەسەری ئەم کێشەیەی نەبردۆتە کەنار، بەڵکو پرسی فەلەستین و گرنگی چارەسەری ئەو پرسەی لە هەمیشە زیاتر خستۆتە بەردەم کۆمەڵگەی ئەم سەردەم و ناوەندە نێودەوڵەتیەکان. حەسەن نەسروڵا و هەنیەو دەیان فەرماندەی تر کوژران، بێ ئەوەی ئاسەوارێک لە پاشەکشەی کیشەی فەلەستین دیار بێت، ئەوە ئەو شکستەیە کە چ ئەمریکا و غەرب و چ دەوڵەتی ئیسرائیل، لەگەڵی بەرەو ڕوون. جیا لەوانە درۆی مافی بەرگری لەخۆکردنی ئیسرائیل، کە ئەمریکا و غەرب لغاویان لەسەری راهاتووە، لە بەرامبەر داگیرکاری بەردەوامی دەوڵەتی ئیسرائیل و تیرۆریزمەکەیدا، نەک بە جێگایەک نەگەیشتووە، بەڵکو بۆتە مایەی ئابڕوچوونێکی گەورە لە ئاستی دنیای ئەم سەردەمەدا و بواریشی کردوتەوە بۆ ئەوەی وڵات و دەوڵەتانی وەکو ئیران هاوشیوکانی بەهرەبەرداری لەم دۆخە بکەن و لە ململانێی فراوانترەکانی خۆیاندا لەگەڵ ئەمریکاو غەرب بەدەستیەوە بگرن.
چینی کریکار و ئینسانیەتی ئازادیخوازی و ئاشتی خوازی دنیا، ئەو هیزەیە کە بە بەرین بوونەوەی نارەزایەتیەکانی و سەراسەری بوون و ریكخراوبوون و فراوان بوونەوەی لە ئاستی دنیادا، دەتوانێت سیناریۆی نەخوازراوی ئیستا بگۆرێت و دەستی تیرۆریزمی دەوڵەتی ئیسرائیل ببەستێت و ئەمریکا و غەربیش ناچار بکات، پابەندی ئەو ژمارە زۆرە لە بریارەکانی نەتەوە یەکگرتوەکان و ئیمزای خۆیان بن، بۆ چارەسەری کیشەی فەلەستین و دروستکردنی دەوڵەتێک بۆ فەلەستینیەکان، کە ئەمە نەک تەنها چارەسەری کیشەی فەلەستین دەکات، بەڵکو هۆکارێکی سەرەکیش دەبێت، بۆ گێرانەوەی ئارامی بۆ ناوچەکەو رۆژهەڵاتی ناوەراست.
بۆپێشەوە