لە دووەمین ساڵیادی ڕاپەڕین و بزوتنەوەی شۆرشگێرانەی ئیراندا، خواستی روخاندنی رژێم زیندووە!
ئەم رۆژانە دووەمین ساڵیادی ڕاپەڕین و بزوتنەوەی شۆرشگێرانەی خەڵکی ستەم لێچووی ئێرانە. دووەمین ساڵیادی بزوتنەوەیەکی شۆرشگێرانەیە، کە لە درێژەی بزوتنەوەی نارەزایەتی کرێکاری و جەماوەری چوار دەهەی رابردوودا، هاتە مەیدان. کوشتنی ژینا ئەمینی لەلایەن پۆلیسی مۆراڵی!! دەسەڵاتی نەنگینی ئیسلامی سەرمایە، بووە هۆی تەقینەوەی توڕەیی و نەفرەتێکی بەرینی کۆمەڵایەتی و جەماوەری، کە ژنان و لاوان، پیشەنگی ئەم راسانە بوون. ئەگەر دەسەڵاتی جمهوری ئیسلامی لەگەڵ هاتنە سەرکاریدا ژیان و ئازادی و مافەکانی لاوان و بەتایبەتی ژنانی ئیرانی، پایماڵ کرد و بەزۆری هێز و سەرکوت، ژنانی ناچار بەوە کرد، سەرپۆش بکەن، ئەوا رەتکردنەوەی سەرپۆش و حجاب دوای زیاتر لە چوار دەهە، هاوکیشەکەی پیچەوانە کردەوە و بووە هۆی چەخماغەدانی بزوتنەوەیەکی شۆرشگێرانە کە ریشەی زۆر واوتر لە کیشەی ستەم و بێمافی و حجابی ئیجباری ئیسلامیدا بوو. بزوتنەوەی شۆرشگێرانەی ئیرانی دوو ساڵی رابردوو، شەپۆلێکی تر لەو شەپۆلانە بوو، کە هەر چەند ساڵ جارێک دەسەڵاتی ئیسلامی سەرمایە لە ئیراندا دەکاتە نیشانە. هەر جارەش بە شکۆیەکی زیاتر و بە ئاستێکی فراوانتر و بە کەڵک وەرگرتن لە ئەزموونەکانی پێش خۆی، خۆی نمایش دەکات. بزوتنەوەی دوو ساڵی رابردوو بزوتنەوەی روخاندنی دەسەڵات بوو، بزوتنەوەیەک کە لەسەر بنەمای نارەزایەتییە بزوتنەوە کۆمەڵایەتییە نەبراوەو بەردەوامەکانی کریکاران و لاوان و ژنان و مامۆستایان و فەرهەنگیان و سەرجەم توێژە بێبەشەکانی کۆمەڵگەی ئیران باڵای کردبوو. بزوتنەوەیەک کە توانی بە شیوەی رادیکاڵ و دەستەمۆ نەبوو لەلایەن باڵەکانی بۆرژوازییەوە، توانای خۆی نیشان بدات و مۆری خۆی بدات لە میژووی خەباتکارانە و هاوچەرخی ئیران. بزوتنەوەیەک کە سنور و رەنگە نەتەوەیی و مەزهەبیەکانی کەنار خست و بە قامەتی سەربەخۆی خۆیەوە ئاڵای” ژن، ژیان، ئازادی” بەرز کردەوە.
بزوتنەوەیەکی سەراسەری و ماوە درێژ… بزوتنەوەیەک کە رێگای گەرانەوەی لێ بەستراوەو رەوتی روو لە پیشی خۆی دەپێوێت. بزوتنەوەی شۆرشگیڕانەی دوو ساڵی رابردوو، توانی هاوسەنگی هیز بەسودی جەماوەری بگۆرێت و تەلیسمی ترس و تۆقاندنی جمهوری ئیسلامی تۆقاند و تێک شکاند. بزوتنەوەیەک کە خاراوتر لە جارانی پیشوو، رادیکاڵ تر و رێکخراوتر لە رابردوو. رۆشنتر و بە هیزتر و هاوکات هەماهەنگتر بوو. دروشم و بانگەوازەکانی هیندە رادیکاڵ و پیشرەو بوو، کە هیزە بۆرژواییەکانی لە ئاریا میهریەکان و شاهەنشایەکان تا دەگاتە رەوتە ناسیونالیستە رەنگاو رەنگەکان، توشی راچەنین و سەرە گێژە کرد. خواستەکانی سەراسەری و جەماوەری بوون، خواستی روخاندنی رژێم سەرەکی ترین پاڵنەری ئەم بزوتنەوە شۆرشگێرانەیە بوو. ئەم بزوتنەوەیە نەک هەر بۆرژوازی و باڵە رەنگاو رەنگەکانی تەکان و خستە کەنارەوە، بەڵکو بە ناوەرۆکە ئینسانی و سەراسەری و چەپی خۆیەوە، چەپ و کۆمۆنیزمی ئیرانی لە ئامادەیی و شۆرشگێر بوون و رادیکاڵ بوونی خۆی بیدار کردەوە.
بزوتنەوەی شۆرشگێرانەی دوو ساڵی رابردوو، بە ئامانجەکانی خۆی نەگەیشت کە روخاندنی جمهوری ئیسلامی بوو، بەڵکو دوای بەرامبەرکێیەکی گەورە و قوربانیەکی زۆر پاشەکشەی پێکرا و لە شەقام دورخرایەوە، بەڵام دەرس و ئەزمونەکان و دەستکەوتەکانی سەرمایەیەکی گەورەن بۆ بزوتنەوەی شۆرشگێرانەی ئیستاو داهاتوو… لەگەڵ ئەوەدا بزوتنەوەکە لە ئاستی شەقام و بە شیوەی جەماوەری هاوئاهەنگ و سەراسەری پاشەکشەی پێکرا، بەڵام بزوتنەوەکە نەوەستاوەو هەموو رۆژە بەرامبەرکێی چینی کریکار و ژنان و لاوان و توێژە بێبەشەکان، بەردەوامی هەیە و دەستکەوتەکانی ئەم بزوتنەوەیە لە توردانی حیجابەوە بۆ رەمزەکانی ئیسلام و دژایەتی سەرجەم ولایەتی فەقییەو خواستی روخاندنی رژێم بە هیزی خۆیەوە ماوەتەوە. وە هیزی ئامادەی جەماوەری، ئامادەیە لە هەر دەرەتانێکی گونجاودا، دوبارە هیزی خۆی بهێنێتەوە مەیدان و درێژە بەو کاروانە بدات کە روخاندنی رژێم لە هەنگاوی یەکەمیدا، ئامانجییەتی و لەگەڵ روخانی ئەم رژێمە هارەی سەرمایەدا، تەواوی ناوچەکەو رۆژهەڵاتی ناوەراست لە بەڵایەک رزگاری دەبێت و دەروازە بۆ ئاڵوگۆڕی شۆرشگێرانە لە ناوچەکەدا دەکاتەوە…
بۆپێشەوە