یادێک لە یادی خەباتکارانەی بەکر عەلی شاعیر و ڕابەری بێ خانەو لانەکان…

*  هاوڕی بەکر عەلی شاعیر و رابەری ئاوارەو بێ خانەولانەکان… لە ساڵی ١٩٦٨ لە شاری سلێمانیدا چاو بە دنیای زوڵم نابەرابەری هەڵهێناوە… بەکر عەلی زۆر زوو زوڵمی چینایەتی ناچاری خەبات و وەستانەوەی دەکات، زۆر زوو لەبەرەی خەڵکی هەژارو نەداردا دەوەستێت و دەبێتە هەڵسوراوێکی چالاک و تێکۆشەرێکی نا وتن بە دنیای سەرەوخواری پر ستەم و نابەرابەری سەرمایەداری… لەساڵی ١٩٩٣ و لە هاتنە ئارای مەسەلەی روخاندنی خانوە بێ تاپۆکانی شاری سلێمانی هاوڕی بەکر وەکو رابەرێکی ماندونەناسی بەرگری لە هاوڵاتیانی ئاوارەو بێ خانەو لانە، دەدەکەویت و دەبێتە سیمایەکی خۆشەویست و ناسراوی ناو ئاوارەکان و خەڵکی بێ خانەو لانە… دوای پشتیوانی لێبراوانە یەکێتی بێکارانی ئەو کاتە لە خەڵکی بێخانەو لانە، هاوڕی بەکر و ژمارەیەکی بەرچاو لەخەڵکی ئاوارەو بی خانەو لانە روو لە یەکێتی بێکاران دەکەن و بەکر عەلی دەبێتە یەکێک لە ئەندام و رابەرانی یەکێتی بێکاران… پاشان بەکر عەلی دەبێتە روخسارێکی ناسراو و خۆشەویستی بێبەشانی هەر جێگایەک کە ئەو هەڵسورانی تیادا دەکات… هەر ئەمەشە بەکر عەلی دەبیتە یەکێک لە هەڵسوراوی یاد و بۆنە کرێکاریی و ئاکسیۆنە کرێکارییەکان و یەکێک دەبێت لە وتار بێژانی ئاکسیۆنی شکۆداری یەکی ئایاری ساڵی ١٩٩٤ ی مەلعەبەکەی شاری سلێمانی… لێبراوی و تیکۆشانی بەکر عەلی بۆ وەستانەوە بەرووی روخاندنی خانوە بیتاپۆکانی شارو حامیەی سلیمانی، رۆڵی رابەری و پێشرەوی ئەو بەکر عەلی دەکاتە خۆشەویست و جیگا متمانەی کرێکاران و زەحمەتکێشانی و نەداران و خەڵکی بێخانەو لانەو ئاوارە، هاوکاتیش دەبێتە چقڵی چاوی ستەمکاران و تاڵانچیانی کوردایەتی… بۆیە جگە لە هەرەشەو چاوسورکردنەوەی دەسەڵاتدارانی سلێمانی، چەندین جار دەستگیری دەکەن و هەرەشەی کوشتنی لێدەکەن بۆ وازهێنان لەپشتیوانی و تیکۆشانی لە خەڵکی ئاوارەو بیخانەو لانە…بەڵام باوەری بەکر عەلی بۆ ئاڵوگۆر و باشترکردنی ژیانی هەژاران و نەدارانی کۆمەڵگە، ئەو سورتر دەکات لە خەبات و تێکۆشان و گرتنەبەری رێگای ریکخستنی نارەزایەتی جەماوەری و رابەری کردنیان… تا لە رۆژی ١/٩/١٩٩٤دا، لەکاتی رابەریکردنی خۆپیشاندان و رێپێوانی ئاوارەو بێ خانەو لانەکانی حامیەدا، دەدرێتە بەر دەستڕیژی گوللەو دوای ئەوەی بریندار دەکرێت، بەدەستی قارەمانەکانی کوردایەتی و پارێزگارەکانی پاریزگای سلێمانی ئەو کاتە، دەکوژرێت و دڵە پڕ هیواو ئومێدەکەی لە جوڵە دەخەن… سەرباری حاشاکردنی پاریزگاری سلێمانی لەو تاوانکارییە، ئەم دۆسیەیە بە کراوەیی ماوەتەوە و هەر کاتێک دیمانە یان میکرۆفۆن بخریتە بەردەم پارێزگار پرسی بەکر عەلی چۆنیەتی کوشتنەکەی دەبێتە تەوەرەیەک، ئەوەی کە وای کردووە ئەم دۆسیەیە بە کراوەی بمێنێتەوەو سالار عەزیزی پارێزگاری ئەو کاتەی پێ تۆمەتبار بکرێت… لەلایەکەوە ئەم کەیسە بە شیوەی یاسایی یەکلایی نەبوتەوە، لەلایەکی تریشەوە بڵاوبوونەوەی بەڵگەنامەیەکی نووسراوە کە بەکری حاجی سەفەر بۆ پارێزگاری سلێمانی نووسیوە کە بکوژی بەکر عەلیان، بە پلان و نەخشەیەک لە کاتی جەنگی ناوخۆدا لە پشتەوە!! کوشتووە، تا دۆسیەی کوشتنی بەکر عەلی و رۆڵی پاریزگاری سلێمانی تیاییدا دیزە بە دەرخۆنە بکەن… شایانی باسە بەکر عەلی تەنها رابەرو هەڵسوراوێکی خەڵکی کرێکارو هەژارو نارازی نەبوو، بەڵکە ئەو شاعیرێکی یاخی و هاوکات هەست ناسک وپڕ خۆشەویستی بوو… خاوەنی چەندین هۆنراوەی ناوازەو جوانە کە بەشی زۆریان ئاوازیان بۆ دانراوەو کراون بە گۆرانی…