موچەخۆرانی هەرێم نابێ باجی ململانێی بەغدا و هەرێم و دەباشان و سەری ڕەش بدەن!!
دوای چاوەروانیەکی زۆری نزیک بە دوومانگ، موچەی مانگی هەشتی فەرمانبەرانی هەرێم لە بەغداوە هات!!، ئەوە لە کاتێکدایە موچەی مانگی حەوتی موچەخۆران هێشتا دابەش نەکراوە. بەپێی لێدوانی بەرپرسانی بەغداو بەشێک لە بەرپرسانی هەرێم، بەغدا موچەی مانگی حەوت نانێرت، چونکە لە شەش مانگی رابردوودا بەغدا پارەی زۆرتری ناردووە و پێویستە لەو پارە زیادەیە موچەی مانگی حەوت دابەش بکرێت…
لەبەرامبەر بە دواکەوتنی موچە و زیاتر لەوەش کێشەی موچە بەشێوەیەکی گشتی، بەرپرسانی دەسترۆشتوی هەرێم، بەغدا بە پەڵپ گرتن لە هەرێم و پابەند نەبوون بە ڕیکەوتنامەکان تۆمەتبار دەکات، لە بەرامبەردا بەرپرسانی بەغدا و تەنانەت بەشێک لە بەرپرسانی هەرێم و پەرلەمانتاران، دەسەڵاتی هەرێم بە بەرپرسیار دەزانن لە چارەسەر نەکردنی موچە، بەتایبەتی پابەند نەبوونی هەرێم بە رادەست کردنی داهاتە نەوتی و نانەوتیەکان، ناردنی لیستی جیاواز و نارۆشن. بەم شیوەیە موچەخۆرانی هەرێم کە هەموو پابەندیەکی خۆیان کە دەوامە جێ بەجێکردووە، کەچی لەململانێی نێوان بەغداو هەرێمدا، بوونەتە قوربانی و هەر جارەی بەپاساوێک و بە هۆکارێک کە پەیوەندی بەئەوانەوە نییە، موچەکانیان دوا دەوکەوێت.
ئەم دۆخە نەک تەنها کاریگەری لەسەر ژیان و گوزەرانی موچەخۆران کردووە، بەڵکو جموجۆڵی بازار و کار و کەسابەتی سست کردووە. لەو نێوەدا دەسەڵاتی دوو زۆنی هەرێم، خەریکن پرسی موچە دەخەنە ناو چوارچێوەی ململانێی نێوان خۆیان و کایەکی پیش وەختە هەڵبژاردنەکان. بە کردەوە موچەخۆران لە ئێستادا خراونەتە نێو بەرداشی ململانێی بەغدا و هەولێر و هاوکاتیش ماتریال و دۆسیەیەکی کایەی هەڵبژاردنەکانی هەرێم.
دیارە ململانێی نیوان بەغداو هەولێر لە بنەرەتدا سیاسییەو پەیوەندی بەدەیان دۆسیەی ترەوە هەیە و لەپێش هەمووشیانەوە پرسی بریار و دەسەڵاتی سیاسی… بەغدا زوربەی دەسەڵات و توانای بریاردانی هەرێمی خستۆتە ژێر هەیمەنەی دەسەڵاتی فیدرالی بەغدا و دەیەوێت تەواوی دەسەڵاتە فیدرالی و لۆکاڵیەکان مل کەچی ناوەند بکات. پرسی دارایی و سامان و نەوت و سنورەکان و بەرگری… ئەو پرسانەن کە بەغدا دەیەوێت بەپێی دەستور و بریارەکانی دادگای فیدراڵی، بگێردرێنەوە بۆ ژێر هەیمەنەی ناوەند، دەسەڵاتی سیاسی هەرێم و بەتایبەتی پارتی لەگەڵ ئەوەدا جگە لە گەرانەوە و تەسلیم بوون بە بەغدا بژاردەیەکی تری نییە، بەڵام دەیەوێت دەستی لەچەند ئیمتیازێک گیر بێت، لەوانە پرسی هەمواری من بە فەرمی بناسرێت و بەشی لە دابەشکردنی موچەی موچەخۆرانی هەرێمدا هەبێت. هەروەها پرسی نوێنەرایەتی بەغدا لە هەرێمدا زۆرتر بە پارتی ببرێت… لەو نیوەدا ئەوەی بۆی گرنگ نییە پرسی موچەخۆرانی هەرێم و ژیان و گوزەرانی هاوڵاتیانە. یەکێتی نیشتیمانیش بەجیا لەوەی خۆی بە خاوەنی هیچ کیشەیەکی نێوان بەغدا و هەولێر نازانێت، هێندەی بکرێت دەیەوێت گوشارەکانی بەغدا دەسەڵاتی هەولێر و پارتی لە مەنگە بدات و لەوەش زیاتر نارەزایەتی موچەخۆران و جەماوەری رووبەرووی پارتی بکات و شانی خۆی لە بەرپرسیاریەتی خاڵی دەکاتەوە. موچەخۆرانی هەرێم و جەماوەری ناڕازی هەرێم، نابێت مل بەو واقعە تاڵە داسەپاوە بدەن و باجی ململانێی بەغدا و هەرێم و دەباشان و سەری رەش بدەن. موچەخۆرانی هەرێم و هەردوو زۆنەکە پێویستە یەخەی دەسەڵاتی خۆجێی هەردوو زۆن و هەردوو دەسەڵاتەکە بگرن و بەریزی ریکخراو یەکگرتوانەی خۆیان موچە لە گەروی ئەو تاڵانچیانەی کورد دەربهێنن.
بۆپێشەوە