گروپە راسیستەکان، دەرهاویشتەی سیاسەتی راسیزمی دەوڵەتین!
بەدوای هێرشی مێردمنداڵێکی پەنابەری تەمەن ١٧ ساڵان بەچەقۆ بۆسەر کۆمەڵێک منداڵ لە خولێکی فێربوونی هاوینەی سەمادا لە شاری ساوسپۆرت کە بووە هۆی کوژرانی سێ منداڵ و برینداربوونی چەند مناڵی تر، گروپە ڕەگەزپەرست و راسیستەکانی بەریتانیا، وەکو نیعمەتێکی خودایی!! لە ئاسمان کەوتووە خوارەوە، کەوتنە قۆستنەوەی ئەم روداوە. بە خێرایی هێرشیان بۆسەر پەنابەران دەستپێکرد. هێرشیان کردە سەر ئەو ئوتێل و شوێنانەی کە پەنابەران تیایدا نیشتەجێکراون، لەوەش زیاتر کەوتنە هێرش بردن بۆسەر کتێبخانە، دوکان و ماركێت و شکاندنی کەلوپەلەکانیان، پاساوی هەموو ئەو تاوانکارییە ئەوەیە کە ئەو مێردمنداڵەی تاوانەکەی کردوە پەنابەرە!! ئەم کردەوە دژی ئینسانیەی رەگەزپەرست و راسیستەکان سەرەتا سنوردار و پاشان چەندی شاری تری گرتەوە لەوانە؛ لیڤەرپوڵ، بریستۆڵ، ساوسپۆرت، هۆڵ، ستۆک ئۆن ترێنت، مانچستەر، بلاکپوڵ، میدڵبرۆ، لانکاشێر، بێلفاست، نۆتینگهام، لیستەر، لیدز، سەندرلاند، ساوزپۆرت و لەندەن، و ماوەی چەندین رۆژە بەردەوامە. دەوڵەتی بەریتانیا بۆ بەرگرتن بە بەرین بوونەوەی ئەو هێرش و پەلامارانە، ژمارەیەکی زۆر لە پۆلیسی رژاندە سەر شەقامەکان و لە ئاکامدا پێکدادان لە نێوان پۆلیس و هیزە رەگەز پەرست و راسیستەکاندا روویدا.
دەوڵەتی بەریتانیا بەوێنەی یەكیک لە وڵاتانی ئەوروپا و وڵاتێکی ئەزمەگرتووی خنکێنەر، ڕیخۆشکەر بۆ سازکردنی ژینگەی راسیزم و رەگەزپەرستی، ئێستا خەریکە باجی سیاسەتە جیاوازی خوازەکانی خۆی دەدات… ویناکردنی هەموو پەنابەرانی باوەڕدار، بە ئیسلامی و ئیسلامی سیاسی، بەکەم تەماشاکردنی غەیرە بەریتانی و ئینگلیزەکان، پەرەدان بە جیاوازی رەگەزی و جنسی و نەتەوەیی و رەنگی پێست، مامەڵەی نابەرابەر لەگەڵ نێوان رەنگەکان… ئەو ژینگەیەیە هەم رەگەز پەرستی و هەم زەمینەکانی بۆ گەشەی راسیزم پەرەپیدا.
ئەو گروپە راسیست و رەگەزپەرستانەی کە هیرش دەکەنە سەر پەنابەران لە منداڵدانی راسیزمی دەوڵەتی بەریتانیا و وڵاتانی تری ئەوروپادا پایەکانی چەقاند، و لە جەنگی نێوان ناتۆ و روسیا لە ئۆکرانیا، بەو پەرێ خۆی گەیشتووە. ئەوەی ئیستا لە چەند شاری بەریتانیا روودەدات رەنگدانەوەو دەرهاویشتەی سیاسەتە جیاخوازییەکانە لە نێوان هاوڵاتیانی نیشتەجێی بەریتانیادا، کە راسیزمی دەوڵەتی ژینگەی بۆ سازکردووە و لە بەرامبەریشدا شانسی داوە بە گروپە ئیسلامیە سیاسیەکان، تا بەهرەبەرداری لەم راسیزمە بکەن و بە ئەڵلەو ئەکبەر خوێنی هاوڵاتیانی غەیرە موسوڵمان حەڵاڵ بکەن.
لەگەڵ ئەوەدا جیاکاری و هەڵاواردن لەسەر بنەمای رەگەز و جنس و رەنگ و نەتەوەو نەژاد، لە بنەرەتدا سیماو تایبەتمەندی نیزامی سەرمایەدارییە، بەڵام لە هەر بڕگەیەکدا بە جۆرێک خۆی نمایش دەکات. سەرمایەداری بۆ لابردنی ئۆباڵی ئەزمەو گرانی و بیکاری و خراپی ژیان و گوزەرانی هاوڵاتیان، لێکەوتەکانی جەنگی نیوان ناتۆ و روسیا لە ئۆکرانیا… لە وڵاتەکانیاندا، پەنابەران دەکەنە سەرچاوە و هۆکاری ئەم دۆخە، و بەم جۆرە زەمینەی رەگەزپەرستی و ئاراستەی دژە پەنابەری، بەهێز دەکەن. لە ناو دڵی کەشێکی ئاوادایە هەر روداوێک کە پەنابەرانێک ئەنجامی بدەن، سەرجەم پەنابەران دەکاتە نیشانەی گروپە راسیست و رەگەزپەرستەکان و بە پێچەوانەشەوە، هەر کردەوەیەکی هاوڵاتیەکی بە “رەسەن” بەریتانی و ئەوروپی، ئەنجامی بدات، غەزەبیی ئیسلام و گروپەکانی بەدژی خەڵکی ئەو وڵاتانەدا دەکاتە بەرەکی خوایی. بەم شیوەیە چ راسیست و رەگەزپەرستەکان و چ ئاراستەی دژە ئەوروپایی و کفار لە دیدی ئیسلامی سیاسی و رەوتەکانیاندا، یەکتری بە هێز دەکەن و هیزی لێ وەردەگرن.
دیارە هاوڵاتیان بەریتانیا، بە بێ گوێدانە رەنگی پیست و رەگەز و نەژاد و نەتەوەو دین و …تاد، نەک هیچ بەرژەوەندیەکیان لە ململانیی ئەو دوو بەرەو ئاراستە دژە ئینسانییەدا نییە، بەڵکو قوربانی ئەم دۆخەن. بۆیە هەموو هاوڵاتیەکی ئاسایی لەو وڵاتەدا بەدژی ئەو راسیزمە هەوساو پچرا و ئەو گروپانەن کە بەهرەبەرداری لەم دۆخە دەکەن… پشتیوانی بێ درێغی خەڵکی بەریتانیا و ئەوروپا بێ گوویدانە ناسنامە قەومی و دینی و رەگەزی و نەژادییەکان، لە خەڵکی فەلەستین و وەستانەوە بەرووی جینۆسایدی دەوڵەتی ئیسرائیل و هاوکارەکانیان، بەڵگەیەکی ئاشکرا و رۆشنە و لەوەش زیاتر بە هیزی بزوتنەوەیەکی ئازادیخوازانەو ئینسان دۆستی لە ئاستی دنیادا دەخاتە روو…
هەر ئەو بزوتنەوە ئینسان دۆست و ئازادیخوازەشە دەتوانێت ژینگەی راسیزم و رەگەز پەرستی وسیاسەتی راسیزمی دەوڵەتی بەشکست بکێشێت.
بۆپێشەوە