داخستنی حزبە سیاسسیەکان بە هۆکاری سیاسی، هێرشە بۆسەر ئازادی هەڵسوڕانی سیاسی!!
٥ ی ئەم مانگە ئەنجومەنی داوەری عێراق، بریاری قەدەغەکردن و داخستن و ڕیگەگرتن لە چالاکی سیاسی بۆ سێ حزبی سیاسی “تەڤگەری ئازادی کۆمەڵگەی کوردستان، پارتی ئازادی و دیموکراتی، بەرەی تێکۆشانی دیموکراسی” دەرکرد. هۆکاری دەرکردنی ئەم بڕیارە بە پێی پاساوی ئەنجومەنی دادوەری عێراق دەگەڕێتەوە، بۆ نزیکایەتی و پەیوەندی و وەرگرتنی پشتیوانی و ئیمکانیات، لەلایەنی دەرەکییەوە.
بوونی پەیوەندی حزب و رێکخراوە سیاسییەکان بە لایەنی دەرەکی و وەرگرتنی هاوکاری و بوونی پەیوەندی پێیانەوە، نەک پێچەوانی هیچ یاسایەک و عورفێکی کاری حزبایەتی نییە، بەڵکو نۆرماڵترین حاڵەتەو کەم حزب و ریكخراوەیەکی سیاسی هەیە، کەڵک لە هاوکاری و ئیمکانات و پەیوەندی لەگەڵ لایەن و تەنانەت دەوڵەتەکانی ناوچەکە و دنیا وەرنەگرێت، کە ئەوە تەواو جیاوازە لە خۆشخزمەتی و نۆکەر پیشەیی و بەکارهێنان.
لە عێراق و کوردستانیشدا، ئەگەر بەپێی بریاری ئەنجومەنی دادوەری عێراق بێت، دەبێ سەرجەم حزب و لایەنە سیاسیەکانی سەر گۆرەپانی سیاسی عێراق، بە دەسەڵات و ئۆپۆزیسیۆنەوە، هەڵسورانیان یاساغ بکرێت و دەرگاکانیان دابخرێت، لەپێش هەمووشیانەوە ئەو حزبانەی ئێستا لە هەرەمی دەسەڵاتی سیاسی عێراق و کوردستاندان.
ئەنجومەنی دادوەری عیراق، بەو شێوە بریارە سیاسیانە و کردنی بەرگی یاسایی بە بەریاندا، پێگەی نایاسایی خۆی و لەوەش زیاتر خزمەتکاری خۆی بۆ دەسەڵاتی سیاسی و بەرژەوەندیەکانیان، دەخاتە ڕوو.
سەیر ئەوەیە ئەنجومەنی دادوەری عیراق، نۆکەر سفەتی و خۆشخزمەتی و تەنانەت کرێگرتەیی ئاشکرای دەیان حزب و لایەن و کوتلەی سیاسی و کاری بە وەکالەت ئەنجامدان بۆ وڵاتەکانی ناوچەکە، بە نایاسایی نازانێت، کەچی هاوکاری و پەیوەند حزبە سیاسیەکان لەگەڵ لایەنی دەرەکی بە نایاسایی دەزانێت!!.
ئەنجومەنی دادوەری عێراق، هاوکاری و پێش لەشکری سوپاو لەشکری وڵاتەکان، بوونی دەیان بنکەو بارەگای سەربازی و هەواڵگری وڵاتانی ناوچەکە، بوونی دەیان باندی ئینسانکوژ و جاسوسی، پێشێلکردنی هەموو رۆژەی “سەروەری خاک و نەتەوە” بەهیڵی سور و خەتا تەماشا ناکات، کەچی هاوکاری و پەیوەندی چەند حزبێکی سیاسی بەلایەنی دەرەکیەوە!! بە مەترسی بۆسەر ئاسایشی” نیشتیمانی و نەتەوەیی” و بە نایاسایی دەزانێت.
نەک تەنها بریاری ئەنجومەنی دادوەری عێراق، بەڵکو خودی ئەنجومەنی دادوەری، بەو مامەڵە و بریارانەی داویەتی، دەکاتە هاوکار و خۆشخزمەتی لایەنی دەرەکی و بوکەڵەیەکی قورمیشکراوی سیاسی دەستیان.
بۆ هەموو کەسێکی هوشیار رۆشنە، بریاری رێگریکردن لە هەڵسوڕانی سیاسی ئەو حزب و لایەنە سیاسیانە، بریاریکی سیاسی و لە بنەرەتدا پەیوەندی بە هاوکاری و بەندو بەستی دەسەڵاتی سیاسیەوە هەیە بەو لایەنە درندە و داگیرکەرەکانی عێراق و کوردستانەوە.
یاساغ کردنی ئەم هێزانە کە زوربەیان نەیاری دەوڵەتی تورکیان و بەدژی سیاسەتە سەرکوتگەرو داگیرکاریەکانی تورکیا وەستاونەتەوە، لە بنەرەتدا پەیوەندی بە چوونە پێشەوەو هاوکاری نێوان دەوڵەتی تورکیا لەگەڵ عێراق و هەرێمی کوردستانەوە هەیە. سەردانی چەند مانگ لەوەپێشی ئەردۆغان بۆ بەغدا و هەولێر و بەدوای ئەوەدا هێرشی دەوڵەتی تورکیا بۆسەر هەرێم، بە هاوئاهەنگی نیوان بەغدا و ئەنقەرەو هەولیر و گڵۆپی سەوزی ئەمریکا، بە ئاشکرا هۆکاری راستەقینەی بریاری ئەنجومەنی دادوەری دەخاتە ڕوو.
ئەنجومەنی دادوەری عێراق، بە چوونە خزمەتی بۆ ناو بازانەی بەندو بەستی سیاسی و هەواڵگری نیوان دەوڵەتی عێراق و توکیاوە، هیچ سەربەخۆیەکی بۆ پیگەو بریارەکانی خۆی نە‌هێشتۆتەوە و بۆتە لایەنێکی واقعی ئەو مامەڵە قێزەونە بۆ لێدان لە هیزەکانی ئۆپۆزیسیۆنی تورکی و ئەو حزب و لایەنانەی پشتیوانی یان هاوسۆزی هیزە سیاسیەکانی ئۆپۆزیسیۆنن. دیارە ئەو بریارەی ئەنجومەنی دادوەری عێراق، تەنها رووی لەحزب و هیزەکانی هاوسۆزو هاوکاری ئۆپۆزیسیۆنی تورکی نییە، بەڵکو ئەوە روو دەکاتە سەر ئەو هێز و لایەنانەش کە هاوکار و هاوسۆزی ئۆپۆزیسیۆنی ئیران یان سوریان.
ئەو بریار و ئەو ئاراستەیەی ئەنجومەنی دادوەری عێراق، کە وابەستەی ئاراستەی دەسەڵاتی سیاسی و بەندو بەستەکانیەتی، چەندە بەدژی حزب و هیزە سیاسیەکانی هەرێم و ئۆپۆزیسیۆنی وڵاتەکانە، هێندەش زیاتر بەدژی خەڵکی ئازادیخوازی عێراق و کوردستان و پێشیلکردنی بریارو ئیرادەی سیاسیان و هێرشیکی ئاشکرایە بۆسەر ئازادی و بەتایبەتی ئازادییە سیاسییەکان… ئەگەر ئەنجومەنی دادوەری عێراق ئەوەی بۆ بچێتە سەر، ئەوا مەترسی بۆسەر ئەو پەراوێزە کەمە سیاسیەی بەرهەمی کەشی نیمچەکراوەی هەرێمە، زۆر زیاتر دەکات و دەستی سەرکوت و زیندانی و رفاندن، ئاوەڵا دەکات. ئەرکی سەرجەم خەڵکی ئازادیخواز و هەموو ئەو حزب و لایەنە سیاسیانەیە کە بانگەشەی ئازادی و ئازادی سیاسی دەکەن، کە بەهەموو شێوەیەک رووبەرووی ئەو مەترسییە ببنەوە و لە پێش هەموو شتیکیشدا، ئەم بریارە دەبێ هەڵبوەشێتەوە.
عەبدوڵا مەحمود