سلێمان ئەحمەد ڕۆژنامەنووس لەلایەن پارتییەوە بەیاسای بەعس ٣ ساڵ زیندانی بەسەردا سەپێنرا!!
سلێمان ئەحمەد کە رۆژنامەنووسەو خەڵکی ناوچەی جندرێسی عەفرینە لە کاتی گەرانەوەی بۆ کوردستانی عیراق دوای پرسەی باوکی، لەلایەن هێزێکی پارتییەوە دەستگیر و بۆ ماوەی چەند رۆژێک بێ سەوروشوێن دەکرێت، بەڵام دوای چەندین رۆژ و لە ژێر گوشاری رای گشتیی و رێکخراوەکانی بەرگریکار لە مافی رۆژنامەنووساندا، ئاسایشی پارتی درەنگانی شەوی ٣٠ی تشرینی یەکەم/ ئۆکتۆبەر ناچاربوو دان بەوەدا بنێت کە ئەو رۆژنامەنووسەیان رفاندووە.
پارتی لە راگەیاندنێکدا هۆکاری رفاندنی ئەو رۆژنامە نووسە دەگێڕێتەوە بۆ کارکردن بۆ پەکەکە و دەنووسێت:
“پەیوەندی بە کاری ڕۆژنامەوانییەوە نییە و بۆ کاری نهێنی و نایاسایی بۆ پەکەکە هاتوچۆی کردووە” لەسەر ئەو بنەمایەش باسی سزادانی ئەو رۆژنامەنووسە دەکەن. ئاژانسی رۆژ نیوز لەبەرامبەر بەو تۆمەتەی دەزگای ئاسایشی پارتیدا، دەڵێن کە سلێمان محەمەد رۆژنامەنووس و هەواڵسازی بەشی عەرەبی ئاژانسەکەمان بووە و لەگەڵ ئەوەدا ئیدانەی ئەو مامەڵەیەی پارتی دەکەن هاوکات داوای دەست بەجێ ئازادکردنی ناوبراو دەکەن.
٢٩/٧/٢٠٢٤ و دوای راگرتنی بۆماوەی ٢٧٩ رۆژ لە لەلایەن ئاسایشی پارتیەوە، دادگای دهۆک سزای سێ ساڵ زیندانی بەسەر رۆژنامەنووس سلێمان ئەحمەدا دەسەپێنێت و رێگای بەشداری کردنی نوینەری یۆنامی لە پرۆسەی دادگایەکەدا نەداوە.
ئەوەی لەم دادگایە و سزایەدا دوبارەو بۆتە مۆد بەدەستی پارتییەوە، سزادانی رۆژنامەنووسانە بە یاساکانی بەعس و پشتکردنە لە یاسای كاری رۆژنامه‌گه‌ری، یاسای مافی به‌ده‌ستهێنانی زانیاری…
پارتی بۆ سزادانی نەیارانی خۆی بەتایبەتیش رۆژنامەنووسان، لە جێگای ئەوەی پەنا بەرێتە بەر یاسای کاری رۆژنامەگەری، پەنا دەباتە بەر سزای سیاسی و بۆئەم سزایەش مادەی ١٥٦ ی رژێمی بەعسی لە گۆڕنراو و هەموارکراو بەدەستەوە دەگرێت.
ئەم مامەڵەی پارتی و دەستگرتنی بە یاساکانی بەعس و سزادانی رۆژنامەنووسان بەو ماددە قورسانە، بەر لەوەی لێپیچینەوەی یاسایی بیت، ترساندنی کۆمەڵگەو ئازادیخوازییە بۆ بێدەنگکردن و پاشەپێکردن بەو پەراوێزە لە ئازادی کە بەرهەمی کەشی نیوەکراوەی کۆمەڵگەی کوردستان و راوەستاوی بلۆکی پیشکەوتنخوازی کۆمەڵگەیە.
سەپاندنی ٣ ساڵ زیندانی بەسەر رۆژنامەنووس سلێمان ئەحمەد دوای راگرتنی بۆماوەی ٢٧٩ رۆژ لەلایەن ئاسایشەوە، تا دەگاتە شێوازی دەستگیرکردنی کە بەرفاندن دەستی پیكردووە، و لەوەش زیاتر تۆمەت بۆ داتاشینی، هەمان دۆسیەی گیراوەکانی پێشووتری بادینانمان بیردەخاتەوە و وەکو درێژەی هەمان کەیس خۆی دەردەخات.
ئەو رەفتارەی پارتی لەگەڵ نەیارانی سیاسی و رۆژنامەنووسان مەترسیەکی گەورەیەو نابێ رێگە بدرێت بەردەوام بیت، بۆیە پێویستە جاریکی تر بەرەی ئازادیخواز و پێشکەوتنخوازی کۆمەڵگە لەپێشیانەوە نووسەر و رۆژنامەنووسانی ئازاد و ئازا، لە ڕێگای وەریخستنی بزوتنەوەیەکی هەمەلایەنەوە گوشار بخەنە سەر پارتی و دادگا و بۆ چاوخشاندنەوە بەو سزایەو سەرئەنجام ئازاد کردنی.
********