چەند شیعرێکی/خالید بایەزیدی(دلێر) پێشکەش بە پەنابەرانێک کە هەرگیز لە دەریاکاندا نەگەڕانەوە و بون بە خۆراکی ماسی..
۱-
چاوەکانمان
گریانی ئەو ڕوژانەن
کە ئیتر هیچ کات ناگرێنەوە
خوزگایە کاتژمێرم بگەڕانایەوە سفر و…
ژیانم لە مەرگ جیاکردبایەوە
۲-
خۆشەویستەکەم
چراکان
بکوژێنەوەو بڕۆ…
ئەو ماڵە تاریکەی من
بە هیچ چرایەک
روناک نابێتەوە
۳-
هیچ گریانێکم
لە بیر نەماوە
جگە لەو گریانەی کە
من و تۆی
لە خورئاوای ئێوارەیەک
لێک جیاکردەوە
۴-
دەمەویست
بیرلە ژیان بکەمەوە
بەڵام!
کۆچی هەموو ڕوژەم
هیچ نەیدەهێشت
۵-
ماسییەکانی دەریا
پرسەیان گرت
کاتێک کە دیتیان
ماسییە بچکولەیەک
خوی بەداوی ڕاوچیەک
هەڵواسی و
کۆتا نیگاکانی لە چاوەشینەکانی دەریادا
بزر کرد
٦-
دەست بڵاوە
ڕۆژەکانی هەفتە
جگە لە حەسرت و ئاە
وە تەمەنی بە «با»چوو
شتێک لەو دەخیلە
شکاوەدا نەماوە
۷-
ماسییەکان
بە دوای ماسییە بچکولەکەیان
شەپول بە شەپۆل دەگەڕێن
کە لە ئیوارەیەکی خەماویدا
لە چاوە شینەکانی دەریادا
وەک ماسییە بچکولەکەی
«سەمەدی بیهرەنگ»
نغرۆ بوو بوون
۸-
یادی پەنابەران
هەتا هەتایە
لە دڵی دەریا دایە
هەر وەکوو:
یادی شەم
لە شەوانی ماتەم و خەم
لەدڵی پەپوولە دایە
۹-
دەریا ئەگریا
شەپۆلەکان
کراسی خویان
دادەدڕی
ئەو کاتەی کە پەنابەران
لە چاوە شینەکانی دا
ئەخنکان
۱۰-
ئیتر بۆ هەمیشە
قینم لە دەریا دەبێتەوە
کە چاوە جوانەکانی توی
خستە ناو قولایی خۆیەوە
۱۱-
کاتێک کە پەنابەران
لە چاوە شینەکانی دەریادا
نغرو ببوون
دەریاش…
شەپۆلەکانی خۆی ناو لێنا
پە‌ری دەریاکان
۱۲-
دیسان بەهار هات
بەڵام من
لە خەونی خەیاڵی گوڵەکاندا
خەوم لێ کەوت
۱۳-
دوێنی
ئاوێنەم هیچ نەناسییەوە
لە دوریت…
تەواوی قژەکانی
سپی کردبوو
۱۴-
کراسی ژیان
تەنیا و تەنیا
بۆ بەری من
بچووک بوو
١٥-
کاتێک کە تۆ ڕویشتی
وەک باڵندەیەکی
لەناو قەفەس
بە پەلە بووم
بۆ هەڵفرین
١٦-
خوزگە!
دەیان توانی
خەمەکانیشم
وێنا کردبان