گۆزەی ئاوات

هێشتا خەونەکانم نەکەوتوونەتە سەرپێ و

کۆتری ئومێدم زمانی فڕینی نەگرتووە

سەفەرمەکە و جارێ زووە

 

هێشتا شەقامی چاوەڕوانیم

پیاسەی دیداری لێ نەڕواوە و

درەختی تامەزرۆییم

هێشووی ئۆقرەیی نەگرتووە

 

مەڕۆ، هەنگاوەکانی سەفەر بپێچەوە و

ڕۆیشتنت هەڵپەسێرە

 

ئالوودەی هەنسکم مەکە و

بەدەست فەرامۆشیم مەسپێرە

 

سەفەر مەکە

 فەهرەستی عیشق بە چەقۆی غەدر نەزیف مەکە و

چاوی خۆزگەکانم کوێرمەکە

 

گوتم سەفەرمەکە

مەڕۆ و وانەی خەفەتم فێرمەکە

 

واز لە خەیاڵی سەفەربێنە و

دڕکی حەسرەت لە  پەرێزی دەروونم دا

مەڕوێنە

 

مەڕۆ و کۆلارەی بەختم مەفڕێنە

سەفەرمەکە و

گوڵی حەزم کاڵ مەکەوە و

گۆزەی ئاواتم مەشکێنە…

 

شەماڵ بارەوانی