سەرچاوەی بژێوی ژیانی پەینوپاڵە…
سەرچاوەی بژێوی ژیانی پەینوپاڵە، کەچی بە ئاشکرا ئەو شانازیە بە چاوانیەوە دیارە، کە بە کوردبوونی خۆی و دەسەڵاتی کوردەوە ئەیکا..
سەیریکەن:
ئەم بەیانەش وەکو گشت بەیانان، بەر لە گەیشتنی ئۆتۆمبێلە زبڵڕێژەکانی شارەوانی ئەو لەوێیە..
بڕوانن: بۆئەوەی شتێکی وا بدۆزێتەوە کەڵکی فرۆشتنەوەی مابێ، چەند زوو گەیشتوەتە نێو پەینوپاڵی مەملەکەت، بەم ڕۆژە تەماویە دەست بۆ خۆڵ و خاشاکی تازەی شارەکە ئەبا..
چاویلێکەن.. چۆن بەدەم تەماشاکردنی چەند نانێک و چەند سانتیەکی ژنانە.. چەندین دایبی ئێکس ئێکس لارج و چەندین پارچە حەبی ماوە بەسەرچووی وروژێنەر.. ئەها چۆن بە دیار چەند شوشەیەک جاک دانیاڵس و مشتێک کاغەزی قومار و بڕێک پارچە دۆلاری خوێناویەوە ڕاما..
ئەوەتە.. لەژێر دەیان عەلاگە وەفاوە ئاڵایەکی دڕاوی کوردستانی بینی و هەڵیگرتەوە، کتێبێکی قەبەی بۆساردگرتوی خوساویشی دۆزیەوە..
تەماشاکەن.. لای منەوە بە ڕوونی دیارە و ئەخوێنرێتەوە، ئەوەتە خۆ بە خەتێکی زەق.. لەسەر بەرگی کتێبەکە نووسراوە:
(ڪورد.. له باشوور)!
ــــــــــــــــــــــــــــــــــــ ئارام حەسەن
*پەینوپاڵ: وشەیەکی لێکدراوی کوردیه، بە مانای خۆڵ و خاشاک، یاخود زبڵ.
*جاک دانیاڵس: بەهێزترین براندی ویسکی ئەمریکایە..