زەنگ!!… هۆنراوە: بەندی عەلی
(زەنگ)
جیهان لەسەر
بۆمبێکی کاتی خەوتووەو
جەنگ دەچرپێنێ بە گوێیدا ؛
بەیانیت باش !
………………………
(جیاوازی)
جەنگ کورتترین
ڕێیە بەرەو شاری دۆزەخ ..
بەهەشتێکیش چێدەکا بۆ
ئیماندارەکانی تەقوای
دونیای سەر و ماڵی فانی !
………………………
(فریودان)
جەنگ کۆنترین
درۆی چاوزەقی واعیزە کوێرەکانە
بۆ ژیانی بێ کۆتایی ئەودیو مردن !
……………………
(ئەنجام)
جەنگ دوو جۆرە لە پڕکردن ،
گۆڕەکان ، بە جەستەی سڕی
سەربازە بێ ناوەکان و
گیرفانی جامبازە بێ ناسنامەکانیش
بە شاباشی بارانی خوێن !!
………………………………
( شۆڤێنیزم )
ئەوەی لەجەنگ جێدەمێنێ
ڕقێکی ڕەقترە لەبەرد ..
ڕێژنەبارانی سەدەیەك ،
کونێکی گچکەلەی تێدا هەڵناکۆڵێ !