دیمانە لەگەڵ چیا عەبدوڵا… سازدانی: هاوژین ڕەشید
هاوژین ڕەشید: سەرەتا خۆ ناساندنێک و ئیش و کار و ژیانی ڕۆژانەت، سەبارەت بە کارکردنی ژنان لە ئێستادا تاچەند گەشبینی؟
چیا عەبدوڵا: ڕۆژانەم وەک هەرکەسێکی ئاسایی دەست پێدەکەم، بەئەنجام دانی بەرپرسیارێتیەکانی خۆم و هاوسەرو منداڵ و ماڵ. پرسی کاری ژن ئێستا زۆر قۆناغی تێپەڕاندوە، باسەکە لەسەر ئەوەیە چ کارێک ئەنجام دەدات تا جێ دەستی دیار بێت، جێ کارو هەڵگرتنی بەرپرسیارێتیەکەی دیار بێت، نەک تەنها قسە لەسەر ئەوە بێت کە کارێک دەکات و تەنها فەرمانبەرێکەو تەواو، ئێستا دەبێت باس لەچۆنیەتی بێت باس لەکوالێتی و تایبەتمەندی بێت، باس لەجیاوازی و دانسقەی و دڵسۆزی بێت، زۆر گرنگە خانمان بەو جۆرە بیربکەنەو و پەیکەڵی بکەن لەهەرکارێک کە ئەنجامی دەدەن.
هاوژین رەشید: ئایا شتێکی باشە کە ژنان هاوشان و بگرە باشتر لە پیاوان هەوڵدەن و داهاتی سەربەخۆی خۆیان هەبێت، یانیش هەر بەشێوەیەکی ئاسایی بژین و پشت بە باوک و برا و مێرد ببەستن؟
چیا عەبدوڵا: مرۆڤ بۆ متمانە بوونی بەخۆی و وجودی و هەستکردن بەژیان پێویستی بەوەیە ڕۆڵ بگێڕێت لەسەر ئەو شانۆیەی تیایی دەژی، ئەوە زۆر ڕاستە ئەرکی ئافرەت چەند بەرامبەرە لەهەڵگرتنی بەرپرسیارێتیەکەدا، خۆی ژن لەئەسڵدا بێکار نییە بەتایبەتی کە هاوسەرگیری دەکات و دەبێت دایک، بەڵام ژیانی ئێستا وادەخوازێت کە لەگەڵ ئەرکی ماڵ و منداڵ دەبێت ئەرکی مادیش لەئەستۆ بگرێت، بەهۆی ئەوەش سروشتی خانمان زیاتر سۆزدارییە ئەو هەوڵانەی لەڕوی هەست و شعورەوە دڵ خۆشی دەکات و کاتێکیش لەڕووی مادیەوە بەرپرسیارێتی خۆی هەڵدەگرێت زیاتر هەست بەمتمانەو جێگیری خۆی دەکات.
هاوژین رەشید: تاچەند زەمینە گونجاوە بۆ کارکردنی ژنان لە کایە جیاوازەکانی ژیاری کۆمەڵایەتیدا لە باشوری کوردستان؟ وە ڕێگریەکان چین؟
چیا عەبدوڵا: وەک کار زەمینە هەیە، بەڵام وەک پێشتر ئاماژەم پێ کرد تەنها کارکردنەکە ئامانج نییە، گرنگە خانمان جۆری ئەو خزمەتگوزاریەی پێشکەشی کۆمەڵگەی دەکەن ناساندنی توانای ئەوان بێت، من دڵنیام خانمی زۆر بەسەلیقەو توانادارمان هەیە بچێتە شوێنی هەستیار و گرنگ کاری گەورەتر لەوەی دەبوایە پیاوێک بیکات باشتر ئەنجامی دەدات.
هاوژین رەشید: مێژووی کاری دەستی لە باشوری کوردستان ئەگەر زانیاریت هەبێت. چەند ساڵە بە کاری دەستی یەوە خەریکی و جۆری کارەکانیشتان چی یە؟
چیا عەبدوڵا: دەست ڕەنگینی خانمانی کورد لەگەڵ هەویری وجودی شێلراوە، لەماڵ و لەدەشت و لەگەڵ ئاژەڵ و بەروبومەکانی هەمیشە هەبوەو باس نەکراوە، ئەوە ماوەی چەند ساڵێکە برەوی پێدراوەو هەوڵ دراوە بەبازاڕی بکرێت بەمەبەستی ئەوەی بکرێتە سەرچاوەی داهات بۆ خانمان کەئەمە هەوڵێکی مۆدێرن و جوانە. هەوڵ بۆ کوالێتی بەئیبراز کردنی بدرێت لەلایەن بەرپرسانەوە کەئاسانکاریشە بۆ ئەوان، داواکاری لەسەر دامەزراندن کەمتر دەبێتەوە و گەنجان سەرقاڵی برەودان دەبن بەتواناو لێهاتویەکانیان و زۆر باشتر بازاڕی پێویستیەکانیش لەناو خۆدا برەو دەدات بەخۆی و لەکۆمەڵگەیەکی بەکاربەرەوە وردە وردە بیگۆڕین بۆ بەرهەمهێنن، کارێکی تابڵێی جێی دەستخۆشی و شانازی کردن دەبێت بۆمان، ئەمەش مەحاڵ نییە هەر یەکێکمان بەتواناو هەوڵی خۆی بەشێکی بچوکی پڕ بکەینەوە، ئەو کات نەک تەنیا ئافرەتان سوردمەند دەبن، بەڵگو هەموو کۆمەڵگە سودمەند دەبێت.
ئەوەی کەئێستا کردومە براندن و کاری لەسەر دەکەم و تەرکیزم لەسەریەتی کەسەرچاوەی داهاتم بێت، هیوایەتی منداڵی و هەرزەکاریمە سوچی حەوانەوەی دەروونم بووە و دەست ڕەنگینی و هونەری فیکرو دەروونمە کەئارامی پێ بەخشیوم و تایبەتمەندی خۆمم تیا هێشتۆتەوە، بەڵام ماوەی دووساڵە کردومەتە کار و براند دڵخۆشم پێی، کوردەوایش پڕە لەڕەنگ و جوانی و ڕەنگینی، زەمینەیەکی لەبارە بۆم تا هونەری خۆممی تیا بنەخشێنم…