ئەوان هەر گوێ لە تەفسیری ون و وێڵی خەون دەگرن… بەندی عەلی
ئەوان هەر گوێ لە تەفسیری
ون و وێڵی خەون دەگرن ..
ئێمە ، مەجبورین خەونەکان بێنینە دی !
ئەوان بۆ کردنەوەی گرێی
گوریسی بەخـت دیسان هەر گوێ
لە قاوەگرەوەکان دەگرن ..
ئێمە ، دەبێ عەرش و تاج و تەخت بگرین !
ئەم هاوکێشەیە بە چیلکەی
دەستی فاڵچی چارە نابێ ..
ئەم گرێیە ، کوێرە دیدەی ..
بە پەنجەو ددانی خۆزگەی
خەواڵوەکان ناکرێتەوە .
بۆ ئەوەی سبەی شکۆفەی
بەیانێکی نوێ بپشکوێ ،
بجمێ چونکە کاری دەوێ ،
درەختی خەون پیرە دارە
دەشتی دێمی ئەم هەوارە
هەم قریشکەی گەرووی هەورو
هەم ڕەوی ڕووباری دەوێ