چەند کورتە شیعریکی: خالید بایە زیدی(دلێر)
١-
تۆ بڵێی
لورەی ئەم بایە
جاری مەرگی کێ ئەدات
٢-
دوای تۆ
مەرگ
چەند کراسێکی جوانە
لەبەرما
٣-
وەکوو فەرهاد
دەبێ تاڵی
بە تاڵ بچێژین و
شیرین
بە شیرین
۴-
ئەی قەلەڕەشەکانی
منارەکان
هیچ پێویست ناکات
فاتیحەم بۆ بخوێنن
من هەر لە دایک بوونمەوە
فاتیحەی خۆم
خوێندووە
۵-
چ نزیکیەکت
لەگە‌ڵ هاوین هەیە
کە ئاوا گەرمای بەسۆزی ئەوینت
گیان دەسووتینێ
٦-
جیهان!
گەیشتۆتە
قەڵەبالغی تەنیایی
هەشت میلیاردی
٧-
شەڕێکی گەرم و
دەستە و یەخەیە
بەینی من و شەقام
کاتێک کە عەترت
خەرامان خەرامان
پیاسە دەکا
٨-
کاتێ کە باوکم
کۆچی کرد
دایکم
بەرزترین کێوی
پێ نیشاندام
وە کێویش…
بەرزە فڕترین هەڵو
٩-
بێ چارە هەژاری
هیچ کەس
لەسەر سفرەکەی
دانانیشت….
وە هەر هەموو خەمەکانی
تەنیا خۆی دەیخوات
١٠-
دەمامکی مەرگ
لەسەر دەم و چاوی ژیانمانە
هەڵفرین
هیوایەتی
هەموو ڕۆژ و شەوانمانە
*******