چەند شیعریکی: خالید بایەزیدی (دلێر) مەهاباد
١
من کرێکارێکم
دەستەکانم قـڵـیشاوە
قاچەکانم ماندوو هیلاک
پێکەنینم
بە هەورەکانەوە ..
توند توند
گرێ داوە
هەرکات بارانێک دەبارێ
مناڵەکانم
خورپەیەک دایان دەگرێ و
بە خەمباریەوە دەڵـێن:
تۆ بڵێی :
هەورە بروسکەی بەهاری
باوکمانی نە سووتاندبێ ..
چرای ژیانمانی نەکوژانبێتەوە ؟
کاتێ باران و هەورە بروسکە
کۆتایی دیت ..
من و جەستەیەکی باراناوی
بەچاوێکی پڕ بە هەورەوە
دێینە ژوورێ
هەر مناڵە و گونایەکم ماچ دەکە ن و
یەکەیەکە هەورەکانی نیگاشم
بەسەر خۆیان دابەش دەکەن ..
منیش کۆتری خەیاڵم
هەڵدەفرێ و
کڵاوەکەی ( لینین )
دەکاتە هێلانەی خۆی
٢
لەو باوەڕەدا نیم شاعیران بمرن
شیعرەکانیان درەختێکە
کە هەموو بەهارێک
خونچەی تازە ئەکەن
مەلەکان لەسەر چڵی
ئاوازی نەمری دەخوێنن
*****