چەند کورتە شیعری: خالید بایەزیدی (دلێر)
چەند کورتە شیعری: خالید بایەزیدی (دلێر)
1
کە لە دایک بووم
وتیان:
منداڵێکی هەژار
رۆڵەی باوکێکی کرێکار
لە دایکێکی خەماوی و گیرۆدەی
کۆمەڵگەی پیاو سالار
چاوی ماتەم و پەژارە و گریانی هەڵێنا
بە ڕووی جیهانی بێ بزەی سەرمایەدار
2-
شنەی با
پرچە تەڵاییەکانی
گوڵەگەنم
شانە دەکا
وە هەر گوڵە گەنمێک
لە کاسەی مناڵانی هەژاراندا
ئارەزویەکە
3-
خوانە ڕەزیلەکانیان
بۆ.. ڕاخستین
پەرداخێک لە فرمێسک
حەسرەتێک لە نان
4-
خەمی نان
لە سوێراوگەی سیاسەتدا
چەپکە گوڵەکانی
تەڵایی یە
5-
پێکەنینی ئازادی
لە ژێرتابلۆی
پێکەنین قەدەغەدا
چاو دەتروکێنێ
ساڵەهایە….
پێکەنینمان دەوەستێنێ
6-
دەکێڵم
چوڵ ودەشتێکی قاقڕ
بەڵکوو….
لەخەیاڵی برسییەکدا
گوڵە گەنمێ بڕووێ
7-
نان!
خۆی یەک بڕگەیە
بەڵام خەمەکەی
جیهانی یە
8-
لە بێژنگی جیهاندا
کردەوەمان
قورسایی بوونمانە
9-
ئەگەر
داسە ژەنگاوییەکان
تیژکەینەوە
برسێتی…
سەیرکردنی ناوێ
10-
دارستان
دڵی لە لێدان کەوت
کاتێک کە
ناڵەی کۆترێکی برینداری بیست
11-
مێروولەیەک
هیلاک هیلاک
ماندوو بە کۆڵە گەنمێکەوە
بەرەو هێلانەکە خۆی دەچوەوە
ئاخۆ ئەمساڵ
چ زستانێکی سەخت و دژوار بێ…!!؟؟