مەملەکەتی تابووت.. شەماڵ بارەوانی
مەملەکەتی تابووت.. شەماڵ بارەوانی
ئازیزەکەم
ئێره دەڤەری بڤەو
مەملەکەتی تابووتە
ئێرە سنوری نەریت
و
دوورگەی زەقنەبووتە
لێرە
ڕۆژ نییە خوێنی دوو ئاشق
نەڕێژن
و
تەرمی دوو لێو بەتاوانی ماچ
نەنێژن
لێره
لێناگەڕێن گوڵی ئامێز
چرۆ بکات
و
کەس لە زاراوەی ئیشق
تێناگات
لێره
هەر دەیجورە دادەگیرسێت
و
هێشووی تریفەی مانگەشەو
هەرگیز پێ ناگات
لێره
گوڵەکان بە گەنجی سەردەنێنەوە
و
وەرزی بەهار بەکاڵی دەکوژێتەوە
خۆشەویستی لەسەر نووکی چەقۆ
ڕێ دەکات
و
مۆرکی مەرگ بۆ ئاشقان
دەبڕدرێتەوە
ئازیزەکەم
ئێمە لە ناو قەفەزی
مەزهەب و
لەکیشوەری
خێڵین
وەرە باچیتر
شەتڵی گریان
لەزێدی عەزابا نەڕوێنین
و
کێڵگەی خەم نەکێڵین
وەره با
ئەم فەسڵی هەڵوەرین
و
مەوتنەی زام
جێ بێڵین
وەرەبا لێ نەگەڕێین چیتر
پەڕەی دەفتەری خەندەکانمان
بە تیغی فرمێسک
کون بـێ
وەرە با بڕۆین
بۆ دوور دوور
و
ناونیشانمان
لەو نیشتمانەی سەراب
ون بـێ..