یاسای خێزان، ئەو یاسایەی ئیرادە بۆ ئینسان بوونی ژن دەگێرێتەوە… دەبێ پشتیوانی بکرێت!
چواری شوباتی مانگی رابردوو ئەنجومەنی یاسادانانی کانتۆنی جزیرەی خۆبەڕێوەبەری لە سوریا، یاسای خێزانی پەسەند کرد… ئەم یاسایە لە ٤١ مادەو برگەدا دارێژراوە، یاساکە هیشتا دەکرێت باشتر بکرێت و هەنگاوی تری بەدوادا بێت و دەوڵەمەند تر بکرێت. هەروەکو خۆیان رایان گەیاندووە …. بەڵام ئەوەی جێگای پێشوازی گەرمی هەموو ژن و پیاوێکی ئازادیخواز و هەموو دەنگێکی رەسای بەرابەریخوازیی و هەموو رێکخراو و گروپێکی ژنانی پێشکەوتنخوازە… ئەوەیە کە هەوڵی جدی دراوە کە گەڵاڵەی یاساکە یەکسانی رەگەزی نیوان ژن و پیاو لەبەرچاوبگرێت و ئەو تابۆیە تێپەڕێنی و تێک بشکێنی کە لەئاستی ناوچەکەدا بۆتە مایەی شەرم و سوکایەتی ئاشکرا بەژن و مافەکانی، تەنانەت دەتوانین بلێین ئەم یاسایە لەهەموو رۆژهەلاتی ناوەراستدا لە پەیوەند بە پرسی ژن و بەرابەرییەوە، پێشکەوتنخوازترین یاسایە لە پەیوەند بەخیزان و مافەکانی ژن و پیاوەوە…
لەم یاسایەدا، فرەژنی، ژن بەژن، هاوسەرگیری خوار تەمەن ١٨ ساڵ، بەزۆر بەشودان و هاوسەرگیری بەزۆر، چەندین دیاردەو حاڵەتی تر نەک هەروەکو تاوان ئەژمارکراوە، بەڵکو شایەتحاڵ و هاوبەشەکانیشیان خراونەتە بەردەم سزای یاساییەوە… لەهەموو ئەوانە زیاتر دەرگای بەرووی گفتوگۆ و دیمکراتیزەکردنی زیاتر و هەموارکردنەوەیدا بە کراوەیی هیشتۆتەوە، کە ئەوە بوار دەدات، تا هەرچی زیاتر ئەم یاسایە یەکسانی هەمەلایەنە لەنیوان ژن و پیاو و مافەکانیاندا زامن بکات و کەم و کوڕی و لایەنە لاوازەکانی پر بکاتەوە…
دەستبردن بۆ پەسەندکردنی یاسایەکی خێزانی بەو ناوەڕۆکە یەکسانیخوازییەوە، ئاڵوگۆڕێکی یەکجار گەورە بەسودی ژنان و بزوتنەوەی یەکسانیخوازی ژنانە، نەهەر لە کوردستانی سوریا و سوریا بەگشتی، بەڵکو کاریگەری جدی لەسەر بزوتنەوەی ژنان لەسەر تەواوی ناچەکە دەبێت و دەسەڵاتە پیاوسالارو کۆنەپەرستەکانی ناوچەکە دەخاتە بەردەم توخم و تەوژمە پێشکەوتنخوازەکان، ئیسلامیەکان و رەوتە سیاسیەکانیان و مەلاو خێڵی دژە ژن تەکان دەدات.. ئەم یاسایە تارادەیەکی زۆر ماف و ئیرادە بۆ ژنان دەگێرێتەوە ئاستی بروا بەخۆبوونیان دەباتە سەرەوە… لەوانەش زیاتر ئەو درۆیەی پوچەڵ کردەوە کە کۆمەڵگە دواکەتووە و قبوڵی یەکسانی ژن وپیاو ناکات و دەبێت هەنگاو بەهەنگاو خەباتی بۆ بکرێت… پەسەندکردنی ئەم یاسایەو نانی هەنگاوێکی ئاوا ئازایانە و یەکسانیخوازانە، و بەکردەوە پیادەکردن و ئامادەیی هەمەلایەنە لەبەرامبەر کاردانەوەی بەرەو بلۆکی ناسیونالیستی و ئیسلامی و کۆنەپەرستانی دژە ژن، دەتوانێت ئاسۆیەکی فراوانتر بۆ گێرانەوەی ئیرادەی ئینسانی ژن فەراهەم بکات و سەرجەم بزوتنەوە پێشکەوتنخوازەکان لە ناوچەکەو دنیادا بۆ پشتیوانی لە خۆی رابکێشێت.. هەنگاوێکی ئاوا و لەهەلومەرجێکدا کە ژنان لە ئیران ئاڵای راپەرین و شۆرشیان بەرزکردۆتەوە، دەتوانێت کاریگەرییەکانی چەند بەرابەر بێت و هاوکاربێت بۆ وەڵامدانەوەی هەر هێرش و کاردانەوەیەکی چاوەروانکراو کە بەرەی کۆنەپەرست دەستی بۆ ببەن… ئێمە لە بۆپێشەوە هەموو پشتیوانیەک لەم هەنگاوە دەکەین و بەرز دەینرخێنین…
بۆپێشەوە
١ی مارسی ٢٠٢٣